Wambrëkikunata yanapë Diospita yachatsikuyänampaq
1. Salmo 148:12, 13 ninqannöpis, ¿imata rurëtataq munayan teytakuna y mamakuna?
1 Jehoväqa wambrakunatapis invitanmi alabayänampaq (Sal. 148:12, 13). Tsëmi teytakuna y mamakunaqa wambrankunata Bibliapita y Diospa Leyninkunallapitatsu yachatsiyan. Sinöqa Jehoväta shonqupita patsë serviyänampaqpis yachatsiyanmi. ¿Imanötaq winayanqanmannö yachatsiyanman?
2. ¿Imanötaq wambrakunata yanapanqa teytakuna rurayanqan?
2 Rurayanqanwanmi yachatsiyänan. Juez Gedeonmi 300 nunankunata kënö nirqan: “Rikäyämarnïmi yachakuyänëki” (Jue. 7:17). Wambrakunaqa teytankuna rurayanqanta rikarmi tsënölla rurayan. Huk cristiänom paqaspa trabajan, y sábado qoyapa punukunampa rantin y alläpa utishqa këkarpis wambrankunata Jehoväpita yachatsikuyänampaqmi pushan. Mana parlashllapam, wambrankunata rikëkätsin Diospa kaqta puntaman churë alläpa preciso kanqanta (Mat. 6:33). ¿Wambrëkikuna rikäyäshunkiku Diosman mañakunqëkita, Bibliata leinqëkita, reunionkunachö comentanqëkita y yachatsikoq yarqunqëkita? Pero hutsasapa karmi, imëpis allillataqa rurayankitsu, tsënö kaptimpis allita ruranëkipaq sinchikuyanqëkita rikäyäshurnikiqa, masmi wambrëkikuna yachakïta munayanqa (Deu. 6:6, 7; Rom. 2:21, 22).
3. ¿Diospa kaqchö imata rurayänampaqtaq teytakuna wambrankunata parlapäyanman, y imanötaq yanapayanman?
3 Jehoväpa kaqchö masta ruranampaq yanapë. Teytakunaqa manam utiyantsu wambrakunata, purïta, parlëta o vestikïtapis yachatsita, hasta yachakuyanqanyaq. Y yachakuriyaptinqa, maskunata yachakuyänampaqmi niriyan. Y cristiano karninnäqa, yachayanqanmannö y winayanqanmannömi Jehoväpa kaqchö masta rurayänampaq yanapayan (1 Cor. 9:26). ¿Librota mana rikashpa comentanampaq y discursonkunata kikinkunalla preparakuyänampaq yachëkätsiyankiku? (Sal. 35:18.) ¿Mëchö tsëchöpis tukïnöpa Diospita yachatsikunampaq yachëkätsinkiku? ¿Bautizakunampaq y llapan tiemponwan Jehoväta servinampaq parlapashqankinaku? Jehová Diosta kushishqa sirveqkunawan maslla juntakärir pëkunapita yachakunampaq, ¿imatataq rurëkanki? (Pro. 13:20.)
4. ¿Imataraq wambrakuna chaskiyanqa teytankuna Jehoväta serviyänampaq wambra kayanqampita yanapayanqampita?
4 Huk kutim salmista kënö nirqan: “Oh Dios, qammi wambra kanqäpita patsë yachatsimarqunki, y kananyaqmi shumaq ruranqëkikunapita willakïkä” (Sal. 71:17). Wambrëkikunata yachatsi llullu kayanqampita patsë Jehoväta shonqupita patsë serviyänampaq. Tsënö yachatsinqëkim yanapanqa más poqurirpis Diosnintsikta mana haqinampaq (Pro. 22:6).