“Testimonio cabal” del Reino de Dios
1. ¿Ima libropitataq wakin congregacionkuna yachakuyanqa 14 de marzo semänapita qallëkur Bibliapita Yachakunapaq reunionchö?
1 2011 watachö 14 de marzo semänapita qallëkurmi, wakin congregacionkunaqa Bibliapita Yachakunapaq reunionchö, “Testimonio cabal” del Reino de Dios nishqan libropita yachakuyanqa. Kë libroqa yanapakun Hechos librochö Biblia willakunqanta rikëkaq cuenta yachakunapaqmi. Manam llapan versïculokunapitatsu yachatsikun, sinöqa unë pasanqankunata Hechos libro willakunqampita imata yachakunqantsikta y cada ünota imanö yanapamänapaq kaqtam rikätsikun (Rom. 15:4).
2. “Testimonio cabal” nishqan libro imanö kanqanta willakaramï.
2 ¿Imanötaq tsë libro? 2 kaq päginanchöqa Jehoväpa Testïgonkunata Pushaqkunapa cartanmi këkan, y tsëchömi nimantsik kë libro imachö yanapamänata munayanqanta. Nïkurmi, 2 kaq capïtulopita qallëkur, llapan capïtulokunapa qallananchö takshalla yachatsikïkuna kan, tsëchömi willakun tsë capítulo imakunata yachatsikunqanta. Hinamampis mëtsika capïtulonkunachömi recuadrokuna kan, y tsëkunanam shumaq yachatsimantsik tukï markakunapita, nunakunapita y ima pasanqankunapita más musyanapaq. Shumaq dibüjokuna këkaqnam yanapamantsik, imanö kanqanta o ima pasanqankunata rikänapaq; ushanan kaq päginachömi willakun cada dibüjopita. Y hanan kaq y rurin kaq qaranta kicharkunachönam mäpakuna këkan, tsëchömi rikäshun Diospa yachatsikïninkunata ‘jinantin munduyaq chäratsiyananrecur’ punta cristiänokuna mëkunapa puriyanqanta (Hech. 1:8).
3. ¿Mëqan precisaq tapukïkunapa respuestantataq yachakushun Hechos librota estudiarnin?
3 Precisaq tapukïkunapa respuestan. Diospita yachatsikïnintsikchö precisaq tapukïkunapa respuestanta musyanapaqmi Hechos libropita yachakunqantsikqa yanapamäshun. Këman pensarishun, ¿imata rurayanqan y imata willakuyanqantaq rikätsikun pikuna Jesuspa rasumpa qateqninkuna kayanqanta? ¿Pitaq dirigikan hinantin Patsapa yachatsikïkäyanqanta y imanö? ¿Imapaqtaq yanapan Diospita yachatsikoqkunata nunakuna chikiyanqan y qatikachäyanqan? ¿Imanötaq santo espíritu yanapakun Diospita yachatsikïchö?
4. ¿Imataraq rurashwan “Testimonio cabal” nishqan libro alli yanapamänapaq?
4 Kë libro alli yanapashunëkita munarqa, puntallapitana alli yachakï y alistakï congregacionnikichö yachakuyaptiki parlakurinëkipaq. Llapan reunionkunam ëwë y pensë Diospita imanö yachatsikunëkipaq yanapashunqëkiman. Alläpam shuyäyä Diospa Gobiernompita paqwë yachatsikunapaq kë libro alli yanaparamänata (Hech. 28:23).