Pëkunapita yachakushun
1. ¿Ima librupitataq yachakushun Bibliapita Yachakunapaq reunionchö 19 de octubri semänapita patsë?
1 2015 wata 19 de octubri semänapita qallëkurmi, congregacionkunaqa Bibliapita Yachakunapaq reunionchö, Pëkunapita yachakushun librupita yachakushun. Kë publicacionqa Diosta mana jaqipa sirweq 14 ollqukunapaq y warmikunapaqmi willakun. Kë libruta leyirninqa mas clärum rikäshun Diosta sirweq nunakuna problëmakunapa pasarnin imanö tsarakuyanqanta. Jinamampis, shumaq kawakunapaqmi yachatsimantsik (Heb. 6:12).
2. Pëkunapita yachakushun libru imanö kanqanta willakaramï.
2 ¿Imanötaq kë libru? Ishkë precisaq yanapakïtam apamun, tsëqa imë tiempuchö pasakunqan y mäpakunam kayan, tsëkunam rikätsikun Diosta sirweqkuna mëchö y imë kawayanqanta. Cada capïtulupa ushananchömi tarintsik “Yarpachakunapaq tapukïkuna” neqta, tsëmi yanapamantsik kawëninkunaman yarpachakunapaq y yachakunqantsikmannö ruranapaq. Jina shumaq dibüjukunayoqmi, rasumpa rikëkaqnö sientikunapaq.
3. ¿Imanötaq kë libruta yachakur alli provëchashwan?
3 ¿Imanötaq alli provechashwan? Juk cartawanmi Jehoväpa Testïgunkunata Pushaqkunaqa animamantsik kë librupa qallananchö kënö nir: “Pensari pëkunatanö qamta pasashuptikiqa, ¿imanöraq sientikunkiman karqan? ¿Imataraq rurankiman karqan?”. Pëkuna pasayanqanman y noqantsik tsëkunapa pasar imata ruranapaq kaqmanmi yarpachakunantsik. Y tsëpaqqa tiemputam rakinantsik (Neh. 8:8). Semänachö yachakunapaq kaq pullan capïtulupita qallaptinqa, dirigeq wawqim pasaq semänachö yachakunqantsikpita juk minütupita mas wallkallachö yarpätsikaramunan. Y semänachö yachakunapaq kaqchö “Yarpachakunapaq tapukïkuna” mana kaptinqa, dirigeq wawqim alistanman juk o ishkë tapukïta ruraramunampaq.
4. ¿Imanirtaq Pëkunapita yachakushun librupita yachakunantsik precisan?
4 Satanasqa llapan junaqkunam markäkïnintsikta imëkanöpa ushakätsita tïran. Peru kë libru y Täpakoq revistachö yarqamoq “Pëkunapita yachakushun” neq yachatsikïkunaqa, markäkïnintsikta sinchiyätsinampaq Jehoväpa shumaq qarëninkunam (Sant. 1:17). Bibliapita Yachakunapaq reunionman ëwar, y tsëchö parlakurqa alleqmi yachakushun.