Jehoväpa Testïgunkunata Pushaqkuna qellqayämunqan carta

Kuyashqa wawqikuna y panikuna:

Jehoväta adoraqkunaqa alläpam valorantsik Palabran Bibliata. Musyantsikmi Bibliachöqa rasumpa pasakunqanta, yanapakoq consëjukunata, y llapantsikta Jehovä alläpa kuyamanqantsikta willakunqanta (Salmus 119:105; Lücas 1:3; 1 Juan 4:19). Noqakunaqa shonqupita patsëmi munayä Diospa Palabranchö willakunqankunata pïmëpis yachakuyänanta. Tsëmi alläpa kushishqa willariyaq, Bibliachö willakunqankunata shumaq yachakunëkipaq neq libruta rurayämunqäta. Kananqa kë librupita masllata willariyashqëki.

Kë librutaqa rurayämurqö wamrakunata yanapanampaqmi. Peru Bibliapita maslla yachakuyta munaq mayor kaqkunatapis yanapëta puëdinmi. Y musyanqantsiknöpis, Bibliaqa llapan nunakunapaqmi, tsëmi willakunqankunata shumaq yachakushqaqa llapantsiktapis kushishqa kawakunapaq yanapamäshun.

Kë libruqa Bibliachö willakunqannömi Patsata Dios kamanqampita nunakuna imanö kawayanqanta willakun. Kë libruchö willakunqankunaqa cläru, fäcil entiendinanlla y qatinallaman pasakunqannö kanantam procurayämurqö.

Kë libruchöqa unë pasakunqankunata imëka rikëkaq cuenta leyinapaq y unë nunakuna imanö sientikuyanqanta entiendinapaqmi atska dibüjukuna kan.

Y kë libruchöqa willakun, Jehoväta cäsukoqkunapaq y mana cäsukoq nunakunapaq Bibliachö willakunqantam. Y pëkunapita imata yachakunqantsikta cuentata qokunapaqmi yanapakun (Romänus 15:4; 1 Corintius 10:6). Kë libruchöqa 14 grüpuman rakishqa willakuykunam kan. Y cada grüpupa qallananchömi musyatsikun tsë grüpuchö imakunapaq willakunqanta.

Wamrëkikuna kaptinqa, cada willakuyta pëkunawan juntu leyiyë y dibüjukunapita llapëki parlakuriyë. Tsëpitaqa capaz leyiriyankiman tsë willakuypaq textukunata. Nïkurnin wamrëkikunata yanapë, tsë textukunapita imakunata yachakuyta puëdiyanqanta cuentata qokuyänampaq. Y mayorna kaqkunawan estudiarpis tsënöllam rurëta puëdintsik, tsënöpam yanapashun Bibliapita alli yachakuyänampaq.

Alläpam munayä, alli shonquyoq jövinkuna y mayorna kaqkunapis kë libruta leyirnin Bibliapita shumaq yachakuyänanta, y yachakuyanqankuna vïdankunachö yanapananta. Tsënöpa pëkunapis Jehoväta adorayänampaq y Jehoväpa familian kayänampaq.