Jehoväpa Testïgonkunata Pushaqkunapa cartan
Kuyashqa wawqikuna y panikuna:
¡Imanö kushikïpaq tiempokunachömi kawëkantsik! Alläpa kushikïpaqmi qamkunawan “huknölla yanapanakur[nin]”, mana imëpis rurayanqannö Jehová Diospita më tsëchö yachatsikïqa (Sof. 3:9; Juan 14:12).
Pero musyanqantsiknöpis, Jehová Diosta kushishqa servirnimpis, imëka mana allikunapam pasantsik. Qanyan wataqa imëka mana allikunapam wakinnikikuna pasayashqanki, patsa alläpa kuyuptin, alläpa tamyaptin, shukukï vientokuna y imëka desgraciakuna kaptin (Mat. 24:7). Cada hunaqkunam pï më hipayan o ñakayan edäyëwan y tukïläya qeshyakunawan. Y llapantsikmi tukïläya “sufrimientucunapa” pasantsik (Mat. 24:8). Hinamampis, Armenia, Corea del Sur, Eritrea y más nacionkunachömi mëtsikaq cristiano mayintsikkuna carcelarëkäyan Jehová Diosnintsikta serviyanqanrëkur (Mat. 24:9).
¿Imataq yanapamarquntsik imëka mana allikunapa pasarnimpis kushishqa këkänapaq? 2010 texto ninqannöpis ‘Kuyakiyqa llapantam awantan. Kuyakiyqa manam imeypis ushakantsu’, tsëmi yanapamarquntsik (1 Cor. 13:7, 8, QKW). Awmi, huknintsik huknintsik kuyanakunqantsik y Jehová Diosta kuyanqantsikmi yanapamantsik imëkatapis aguantanapaq.
Huk religión nunakunapis mantsakäkuyanmi më tsëchö Diospita yachatsikur purinqantsikta y nunakunata seguido watukanqantsikta rikar. Wakinkunaqa creenciantsikta y yachatsikunqantsikta mana chaskikurnimpis, “noqäkuna rurayänäpaq kaqtam qamkunaqa rurëkäyanki” niyanmi. ¿Imataq Jehoväpa testïgonkunata yanapëkämantsik cada hunaq yachatsikïkänapaq? Qallananchö ninqantsiknöpis, kuyakoq kënintsikmi. Jehová Diosnömi noqantsikpis nunakuna ushakäyänanta munantsiktsu (2 Ped. 3:9). Qanyan wata 7.508.050 publicadorkuna kanqantsikmi rikätsikun, pï më nunakuna salvakuyänanta munanqantsikta. ¿Mëqan religionchötaq kikinkunapita munar y kuyakurnin nuna mayinkunata Diospita yachatsiyan?
Más kallpatam tsarintsik profeta Isaías kënö nir qellqanqan cumplikëkaqta rikar: “Ushanan hunaqkunachöqa, hirkakuna hanampam Jehoväpa wayin këkaq hirka patsakanqa, y llapan hirkakunapa hanampam pallarikanqa, y tsëmanmi tukï nacionkunapita ëwayanqa” (Isa. 2:2-4). Tsë Jehoväpa wayinman ëwaqkunachömi këkäyan, qanyan wata kushishqa chaskinqantsik 294.368 bautizakushqakuna. Cristiänopura kuyanakunqantsik kallpata qoykallämäshun bautizakushqakunata chikimaqnintsik Satanás ushakätsita tïraptin, alli tsarakuyänanrëkur yanapëkunapaq (1 Ped. 5:8, 9).
Qanyan wata martes 30 de marzom 18.706.895 nunakuna karquntsik Jesuspa Wanïnin Yarpëchö. Tsënö mëtsikaq nunakuna ëllukanqantsik o gorikanqantsïmi rikätsikun millonyëpayan nunakunaraq Jehová Diosta servita munayanqanta. Tsëmi alläpa kushikuntsik Jehová Dios ushakëninta manaraq apamunqampita. Tsë hunaq manaraq chämunqanyaqqa kuyakïnintsikmi yanapamantsik imëkatapis aguantëkänapaq (2 Tes. 3:5).
Qanyan watam “Jehoväwan imëpis këkäshun” nishqan Hatun kaq asambleantsik hinantin Patsachö rurakarqan y tsëmi yanapamarqantsik Jehová Diosta más kuyanapaq. Salmista kënö ninqanqa rasun kaqllam: “¡Jehová Diosta sirveq markaqa kushishqam kakun!” (Sal. 144:15). Jehová Dios noqantsikwan këkaptinqa manam ni imata mantsashwantsu, pëmanmi paqwë markäkushwan imëka mana allikuna pasaptimpis (Sal. 23:4). Ichik tiempollachönam Jehová Diosqa Tsurinwan, ‘diablupa rureninta ushacäratsinqa’ (1 Juan 3:8). ¡Imanömi munëkuntsik tsë hunaq chäramunantana! Pero chämunqanyaqqa mëtsikam ruranapaq kan (1 Cor. 15:58).
Musyayanqëkinöpis, ‘imaypis mana gongayta’ qamkunapaq mañakëkäyämö (Rom. 1:9, NTCN). Këllatam rogariyaq, “Dyospa kuyakiyninchow [këkäyë], Señor Jesukristupa wiñey kaweypaq ankupäkiyninta shuyarar” (Jud. 21, QKW).
¡Alläpam kuyayaq!
Jehoväpa Testïgonkunata Pushaq
Wawqikikuna turikikuna