Jesuspa Wanïnin Yarpëpaqqa 2 de abrilpitam invitakur qallashun
1. Kë wataqa, ¿imëtaq invitakur qallashun Jesuspa Wanïnin Yarpëpaq, y precisantsuraq invitakur purinantsik?
1 Jesuspa Wanïnin Yarpë alläpa precisaq reunionmanqa, 2-17 de abrilyaqmi invitakushun. Pasaq watachöqa mëtsikaq Diospita yachakï munaq nunakunam kë invitacionta chaskikuyarqan. Huk kutim, Jesuspa Wanïnin Yarpë hunaq, huk warmi sucursalman telëfonopa qayakurir kënö nirqan: “Wayïmanmi chärirqö, y punkö hawanchömi huk invitacionta tarirqö. Ëwëtam munä, pero manam musyätsu imë hora kanampaq kaqta.” Tsënam, tsë contestaq cristiänoqa entiendetsirqan tsë invitacionpa mëninchö tsëpaq willakïkanqanta. Y tsë warminam kënö nirqan: “¡Kananmi tsë reunionnikikunaman ëwashaq!”.
2. ¿Ima nishwanraq Jesuspa Wanïnin Yarpëpaq invitakurnin?
2 ¿Imanötaq rurashun? Llapan territoriokunata invitakur ushanapaqqa ichik tiempollam kan, tsëmi raslla yachatsikunantsik. Itsa kënö nirishwan: “¿Yamëllaku këkanki? Familiëkiwan huk alläpa precisaq reunionman shayämunëkipaqmi kë invitacionta haqirita munayä. Y këqa hinantin Patsachömi rurakanqa domingo 17 de abril. [Invitacionnin qori.] Tsë ampiqa Jesuspa Wanïnintam Yarpäshun. Tsëchöqa huk discursotam rurayämunqa Jesucristupa wanïnin imanö yanapamanqantsikta rikätsimänapaq. Manam qellëta mañakuyanqatsu. Kë invitacionchömi këkan imë hora y mëchö kanampaq kaq”.
3. ¿Imataraq rurashwan pï më nunakunata invitanapaq?
3 Congregacionpa territorionkuna hatun kaptinqa, anciänokunam llapan publicadorkunata niriyanman, mana tariyanqan wayikunachöqa invitacionta haqiriyänampaq, pero waqtaman mana rikakoqlla. Ama qonqayëtsu Bibliapita yachakïkaqkunata, kastëkikunata, estudiaq y trabajaq mayikikunata y reqinakushqëkikunata invitëta. Ushanan semanakunachö invitakur purikarnimpis, más yachakï munaqkunataqa revistan haqirita puëdenkim. ¿Abril killachö precursor auxiliar këta puëdenkimantsuraq? ¿Maslla yachatsikurinkimantsuraq kë kushikïpaq campäñachö?
4. ¿Imanirtaq invitacionta chaskikoqkuna shayämunanta munantsik?
4 ¡Kushikïpaq yachatsikïkunatam shamoqkunaqa musyariyanqa! Alläpa kuyakïninrëkur hukllëlla Tsurinta Jehová Dios kachamunqantam wiyariyanqa (Juan 3:16). Tsëchöqa yachakuyanqa Diospa Gobiernon llapan nunakunapaq imëka allikunata ruramunampaq kaqtam (Isa. 65:21-23). Invitädokunaqa puëdeyanqam acomodadorkunaman witirirnin huk estudio biblicota mañakurita. ¡Jehová Diostam mañakuyä alli shonquyoq nunakuna kë invitacionta chaskirirnin Jesuspa Wanïnin Yarpëman shayämunampaq!