17 de marzopitam Jesuspa Wanïnin Yarpëman invitakushun
1. ¿Imataq 17 de marzo killa qallanqa?
1 Cada watam yarpantsik Jesus “noqantsicrecur wanonqanta” (1 Cor. 11:26). Tsëmi, Jesuspa Wanïnin Yarpëman atskaq nunakuna shayämunanta y wanunqan alläpa alli qarë kanqanta musyayänanta munantsik (Juan 3:16). Kë wataqa invitakur qallëkushun sábado 17 de marzom. ¿Alistakïkantsiknaku tsë witsan llapan puëdenqantsikmannö yanapakunapaq?
2. ¿Imanötaq invitakushwan?
2 ¿Imanötaq invitakushwan? Más alliqa kanman wallkallata parlarinqantsikmi. Itsa kënö nirinkiman: “Yamëllaku. 5 de abrilmi juk alläpa precisaq reunión kanqa, tsëmi kë invitacionta qampaq y familiëkipaq apëkämö. Tsëchömi Bibliawan yachatsikayämunqa Jesuspa wanïnin imachö yanapamanqantsikta y kanan witsan imakunata rurëkanqantapis. Manam cobrakuyätsu, këchömi qellqarëkan mëchö y imë hora kanampaq kaqpis”. Jina semana ushëkunachöqa wiyaqkunata revistankuna jaqipushwanmi.
3. ¿Imanötaq pï mëman invitacionkuna chänampaq yanapakushwan?
3 Pï mëtapis invitashunlla. Tsë reunionman pï më shayämunantam munantsik. Tsëmi, llapan watukanqantsik nunakunata invitanantsik, Bibliapita yachakïkaqkunata, kastantsikkunata, vecïnontsikkunata y trabajaq o estudiaq mayintsikkunatapis. Jina anciänokunam rikäyanqa congregacionpa llapan territorionkunachö imanö invitakuyänampaq kaqta. Pasaq watakuna kënö rurayanqanqa allim karqan. Tsëmi Jesuspa Wanïnin Yarpëman juk warmi chäriptin juk yanapakoq wawqi nirirqan mëqan publicador invitanqanta tarir yanaparinampaq. Pero tsë warmiqa manam pitapis reqirqantsu. Tsë junaqllash wayin wayin yachatsikur pureqkuna invitacionta jaqiyäpunaq.
4. ¿Imanirtaq kushishqa invitakur purishwan?
4 Itsa Jesuspa Wanïnin Yarpëpaq shamoqkunachöqa qam invitanqëkikuna mëqanllapis këkanman. Pero mana shayämuptimpis, empëñowan yanapakunqëkitaqa llapanmi rikäyanqa. Nunakunata invitacionkunata jaqipunqëkiqa rikätsikunqa Jesus alläpa puëdeq reynö këkämunqantam. Jina kushishqa invitakur purinqëkiqa, territoriochö këkaq nunakunata, cristiano mayikita y Jehová Diostam rikätsinqa Jesus noqantsikrëkur wanunqanta alläpa agradecikunqëkita (Col. 3:15).