Hinantin Patsachömi Jesuspa Wanïnin Yarpëpaq invitakushun
1. ¿Imataraq hinantin patsachö rurashun Jesuspa Wanïnin Yarpë manaraq chämuptin?
1 “Queno imepis rurayanqui, noqata yarpäyämarni.” (Luc. 22:19.) Tsënö Jesus ninqanta wiyakurninmi noqantsik y Diosta servita munaq nunakuna, 30 de marzo 2010 ëllukäshun o gorikäshun Jesuspa Wanïninta Yarpänapaq. Pero puntataqa 13 al 30 de marzo killachömi, hinantin Patsachö invitakur purishun.
2. ¿Imanötaq Jesuspa Wanïnin Yarpëman invitakushun?
2 Imanötaq invitakushun. Hanan kaq dibüjonta rikätsirnin nunata invitacionnin qoy, y nïkurna kënö nï: “Hinantin Patsachömi atska waranqa nunakuna 30 de marzo paqas ëllukäshun Jesuspa Wanïninta Yarpänapaq. Këmi qampaq y familiëkipaq invitacionniki. Amïguïkikunawan shayämuptikipis kushishqam chaskiyashqëki. Këchömi imë hora y mëchö kanampaq kaqtapis willakïkan [rikäratsi mëchö kanampaq kaqtapis]”. Más wiyakïta munaqnö kaptin o tiempon kaqnö kaptinqa, allichi leirapunkiman Lucas 22:19 textochö Biblia ninqanta. Pero yarpë, ichik tiempollam kapamantsik Jesuspa Wanïnin Yarpëman invitakunapaq, tsëmi alläpa unëqa parlapänëkitsu.
3. ¿Pikunatataq invitashwan?
3 Congregacionpa territorion alläpa atska kaptinqa, itsa anciänokuna nimäshun nunakunata mana tarirpis llapan wayikunachö invitacionta haqinapaq. Y más wiyakïta munaqnö kayaptinqa revistampis haqirapunkimanmi. Ama qonqëtsu, invitanëkim yachakï munaqkunata, Biblia estudiëkaqkunata, trabajaq o estudiaq mayikikunata, kastëkikunata, vecïnïkikunata, y wakin reqinakushqëkikunatapis.
4. ¿Imatataq rurashun Jehová kuyamanqantsikta agradecikurqa?
4 Alistakï invitakunëkipaq. Jesuspa Wanïninta Yarpë witsanqa allim yachatsikïchö masta ruranapaq. ¿Manatsuraq tiempïkita shumaq patsätsinkiman precursor auxiliar kanëkipaq? ¿Bibliata yachakïkaqkuna o wambrëkikunapis Diospa kaqchö allinaku kallpachakïkäyan? Tsënö kaptinqa, anciänokunawan parlë manaraq bautizakur yachatsikoq yarquyänampaq allina kayanqanta rikäyänampaq, tsënöpa noqantsikwan invitakoq yarquyänampaq. Jehová kuyamarnintsik tsurinta qomanqantsikta agradecikonqantsiktaqa manam Jesuspa Wanïnin Yarpëman ëwarllatsu rikätsikushun, hina imëkanöpapis atska nunakunata invitarninmi (Juan 3:16).