Edäyashqakunata wätayänan wayikunachö täraqkunata ama qonqashuntsu

1. ¿Imanirtaq apashwan alli willakïkunata edäyashqakunata wätayänan wayikunachö täraqkunaman?

¹ Mëtsikaqmi edäyëman charnin imëkapita sufriyan (Ecl. 12:1-7). Edäyashqakunata wätayänan wayikunachömi wakinqa täräyan, tsëmi wayin wayin yachatsikoq ëwarnin pëkunawan parlëta puëdintsiktsu. Wakin nacionkunachöqa costumbrim wamrankunawan o juk familiankunawampis edäyashqakuna täräyänan, peru tsë wayikunamanmi apayan. Tsë wayikunachö edäyashqa täraqkunapita wakinkunaqa itsa wanayanqa shumaq cuidayänanta, porqui kikinkunallaqa itsa purita puëdiyannatsu o alleqllaqa yarpäyannatsu, peru tsënö karpis Jehoväpita yachakïta y kuyëtapis puëdiyanmanmi. ¿Imatataq rurashwan ‘kushishqa shuyäkunqantsik’alli willakïkunata apanapaq? (Tïtu 2:13, NM.)

2. ¿Imanötaq tarishwan edäyashqakunata wätayänan wayikuna ëka kanqanta watukaq ëwanapaq?

² Imanötaq rurashwan. Edäyashqakunata wätayänan wayikuna ëka kanqanta musyanapaqqa, “residencias de ancianos”, “clínicas geriátricas” o “asilos”neqtam, telëfonuyoqkunapa jutinkuna qellqaränan librukunachö o Internetchömi ashita puëdintsik. Yachatsikunqantsikta rikaq anciänum, tsë wayikunata watukaq ëwayänampaq alli yachaq publicadorkunata mandanqa. Shumaq patsätsir y Jehoväman markäkurqa manam sasatsu (ajatsu) kanqa grupïpa Bibliapita yachatsinapaq patsätsi (Prov. 21:5; 1 Juan 5:14, 15).

3, 4. a) ¿Piwantaq parlashwan grupïpa Bibliapita yachatsikunapaq? b) ¿Imanötaq musyatsikushwan Bibliapita yachakï imanö kanqanta?

³ Estudiuta imanö ruranapaqqa wayi imanö kanqampitam kanqa. Tsë wayichö atskaq edäyashqakuna täräyaptin y cuidaqkuna atskaq kayaptinqa, tsëchö imëka rurëkunata patsätseqwan parlarinapaqmi secretariata tapurishwan. Peru tsë wayi takshalla kaptin, edäyashqakuna wallkaqlla y juk ishkëlla cuidaqkuna kayaptinqa, allichi kanman duëñuwan parlanapaq cïtata jorqanqantsik.

⁴ Imanö kaptimpis, Bibliapa willakïninkunapita parlëta y leyita gustaqkunata debaldilla yanapakoq kanqëkita willakï. Tapuri, tsëchö edäyashqa täraqkunapita semänachö media höralla grupïpa Bibliapita yachatsikïta munaqkuna kanqanta. Tukïläya publicacionkunata utilisë. Mëtsikaqtam yanapashqa Bibliapita willakïkuna willakoq librömi y El hombre más grande de todos los tiempos nishqan librukuna. Itsa mas alli kanqa directortaraq publicacionkunata puntata rikäratsinqëki. Pëwanmi patsätsinkiman imë höra, imë junaq y mëqan sälachö juntakäyänampaq kaqta. Tsë wayichö imakunata rurayänampaq kaqta patsätsiyanqan progrämachömi tsëkunata churayänan. Jehoväpa testïgun kanqëkita musyatsikï. Directorta entienditsi religion asuntupaq parlaq mana ëwanqëkita, sinöqa Bibliapita musyayänampaq yanapakoq ëwanqëkita.

5. ¿Imakunatataq rurayanman estudiu shumaq entiendipaqnölla y yanapakoq kanampaq?

⁵ Imanötaq estudiuta dirigishwan. Tsëqa kanqa wayi imanö kanqampita y edäyashqakuna imanö sientikuyanqampitam, tsëmi puëdiyanqanmannölla pacienciawan yachatsinantsik. Estudiuta dirigeqqa estudiayänan publicaciontam atskata apanan y ushariptinnam apakunan. Itsa wanaq kaqkunapaqqa jatun letrayoqta apanman. Pärrafukunata o Bibliapa willakïninkunata leyita munayaptinqa, allichi kanman puëdeq kaqkunata nirinqëki, y tsëpitanam tapukïkunata rurarinkiman. Kuyëllapa tratakoq y yachanëllapaq kë estudiuta diriginqëki höra. Directorwan parlarirnin, itsa Jehoväpa markan ruranqan vidëuta mëqanllatapis edäyashqakunata rikätsinkiman, tsënöpa Bibliaman markäkïninkuna sinchi kanampaq o Bibliapa willakïninkunapita mas yachakuyänampaq. Estudiutaqa qallankiman y ushankiman mañakïwanmi. Wakin publicadorkunaqa utilisäyashqam canticukunatapis.

6. ¿Imatataq rurankiman mëqan edäyashqallapis tapushuptiki?

⁶ ¿Imataraq rurankiman leyinqëkiwan o estudiuchö yachatsikunqëkiwan juk edäyashqa mana acuerdu kaptin? Alleqraq pensë shumaq contestanëkipaq (Col. 4:6, NM). Itsa Bibliachö rikäratsinkiman tapukïnimpa respuestanta. Tsëta rurëta mana puëdirqa, allim kanman tapukunqanta agradecirinqëki y estudiuta usharir ishkëkilla tsë asuntupita parlariyänëkipaq änirinqëki.

7. ¿Imatataq rurankiman juk edäyashqapa tapukïnin kaptin y maslla musyëta munaptin?

⁷ Itsa höraqa pillapis tapukunman y ima asuntupitapis maslla musyëta munanman. Tsënö pasakuptinmi juk cristiäna kënö contestan: “Tsënö tapukunqëkiqa alläpa allim, peru ¿alliku kanman leyikanqantsikta usharir tsë tapukïnikipita parlarishqa?”. Tiemputam rakinantsik munaq kaqkunataqa japallankunata Bibliapita yachatsinapaq.

8. ¿Imanötaq yupayanman grupïpa y cada ünuta estudiuta dirigirnin?

⁸ Tsë wayichö estudiuta grupïpa dirigeq publicadorkunalla imëpis rurayänanmi mas alliqa kanqa. Llapankunam yachatsikuyanqan hörata yupayänan. Grupïpa estudiu patsakäriptinqa, dirigeq publicadormi juk estudiuta yupanqa y cada watukarmi juk revisïtata yupanqa. Peru puëdeq kaqkunata cada ünuta estudiuta dirigirninqa imëpis rurayanqannöllam yupayanqa.

9, 10. willakaramï estudiuta dirigeqkuna imanö kayänampaq kaqta.

⁹ Imëpis watukëkëlla. Grupïpa estudiu imë junaq y imë höra kanampaq kaqta patsätsi. Edäna yachakïkaqkuna y cuidar trabajaqkunapis shuyaräyan llapan semänakuna estudiuta höranchö qallanëkita y ushanëkita (Mat. 5:37, NM). Tsëmi shumaq patsätsita y cumplita procurë. Juk sitiukunachö rurayanqankunam rikätsikushqa, grupïpa estudiuta dirigiyänampaq ishkaq publicadorkuna ëwayanqan mas alli kanqanta (Ecl. 4:9, 10). Edäyashqakunata wätayänan wayikuna jatun kaptinqa, itsa mas publicadorkunata wanayanqa.

¹⁰ Jina alläpam precisan yachanëpaq kanëki y nunakunaman interesäkunëki (Filip. 2:4). Estudiuta qallanëki junaq llapanta reqita procurë. Jutinkunata qellqë y manaraq estudiatseq kutirnin jutinkunata yarpëta procurë. Pacienciayoq y ankupäkoq kaptikiqa, llapanmi kushishqa y kuyashqa sientikuyanqa.

11. Estudiu dirigeqkuna, ¿imanötaq trabajaqkunata y edäyashqakunapa familiankunata respetayanqanta rikätsikuyanman?

¹¹ Tsë wayikunachö trabajaqkunata y edäyashqakunapa familiankunata kuyakïwan y respëtuwan tratëta ama qonqëtsu. Estudiu patsakashqana kaptinqa, manam directorwan manaraq parlarninqa estudiu imë rurakänampaq kaqta cambiarishwantsu. Jina tapupäri estudiu rurakëkanqan imanö yanapakïkanqanta. Edäyashqakunawan estudiëkaptiki familiankuna chäyämuptinqa, pï kanqëkita willari. Imarëkur yachatsikunqëkita entiendiratsi. Familianman rasumpëpa interesäkunqëkita niri y quedakuyänampaqpis invitari.

12, 13. Willakaramï, edäyashqakunata wätayänan wayikunachö yachatsikuyaptin alli yarqupukuyanqampita.

¹² Imanö yarqunqan. Tsënö estudiukunata dirigishqa congregacionkuna y congregacionkunata watukaqkunam alläpa alli yarqunqanta willakuyashqa. Juk edäyashqakunata wätayänan wayichömi, edäyashqakuna ishkë chunkanö ëllukäyarqan (qorikäyarqan) punta estudiuman, tsëkunapitam joqtaqa cada ünu Bibliapita yachakïta munayarqan. Hasta juk warmipis bautisakurirqanmi. Jukchönam, 85 watayoq warmita Bibliata estudianqan animarqan congregacionchö reunionkunaman ëwanampaq y bautisakïta munanampaqpis. Jina jukchönam, Jehoväpa testïgunkuna grupïpa Bibliapita yachatsikuyänanta michäyaptinmi edäyashqakunaqa directorman quejakuyarqan. Tsëmi, estudiu yapë patsakäriptinqa juntakäyarqan 25 a 30 edäyashqakuna.

¹³ Manam edäyashqakunallatsu kuyakoq kanqantsikta rikar espantakuyan. Höraqa tsëchö wakin trabajaqkunapis estudiu höra quedakuyanmi y participäyanmi. Edäyashqakunata wätayänan wayikunachö täraqkunaman interesäkunqantsikta rikarmi, tsë markachö nunakunapis Jehoväpa markampaq allita parlayan (1 Pëd. 2:12). Imarëkur Bibliapita yachatsikuyanqanta juk directorta entiendiratsiyaptinmi, pëqa kënö nirqan: “¿Imanirtaq demorayämurqunki? ¿Imëtaq këchö estudiuta rurar qallayanki?”. Juk directöranam kënö nir qellqarqan: “Kë markachö edäyashqakunata wätayänan wayikunachö grupïpa estudiuta dirigiyanqanqa allichi kanman. Llapan markakunachömi Jehoväpa testïgunkunaqa debaldilla Bibliapita yachatsikuyan”. Hawäi markachö juk edäyashqakunata wätayänan wayichömi, testïgukunata juk premyuta qoyashqa debaldilla yachatsikuyanqampita, tsë premyumanmi qellqayarqan, edäyashqakunapaq y tsëchö trabajaqkunapaq cristiänukuna juk “alläpa väleq tesörunö” kayanqanta.

14. ¿Imanirtaq edäyashqakunata wätayänan wayikunachö täraqkunata Bibliapita yachatsita munantsik?

¹⁴ Jehoväqa edäyashqakunatam alabayänampaq invitan (Sal. 148:12, 13). Tsë invitacionqa edäyashqakunata wätayänan wayikunachö täraqkunapaqwanmi. ¿Markantsikchö tsënö wayikuna kanku, y tsëchö täraqkunata Bibliapita yachatsita puëdishwantsuraq? Congregacionchö anciänukunapa y tsë wayikunapa directornimpa yanapakïninkunawanqa, itsa Bibliapita alleq yacharatsishwan. Edäyashqakunata mana qonqarqa, Jehovänömi rurëkäshun (Sal. 71:9, 18).