¿Imakunachötaq yanapakun yachatsikoq yarqunapaq grüpokuna?
1. ¿Imakunachötaq Libropita Yachakunapaq reunionnölla yanapamäshun yachatsikoq yarqunapaq grüpokuna?
1 ¿Llakinkiku Libropita Yachakunapaq reunionta? Takshalla grüpokunachö rurakarmi shumaq kaq y alli amïgokunata tarinantsikpaq yanapakoq (Prov. 18:24). Jina Libropita Yachakunapaq reunionpa superintendentempis altantom këkaq imakunapa pasanqantsikta, y necesitanqantsikmannömi yanapamaq kantsik (Prov. 27:23; 1 Ped. 5:2, 3). Pero tsë yanapakïkunataqa tarita puëdintsikran yachatsikoq yarqunapaq grüpokunachö.
2. ¿Imataraq rurankiman yachatsikoq yarquyänëkipaq grüpïkipita kaqkunawan más amigo tikranëkipaq?
2 Yanapakïta procurë. Yachatsikoq yarqunapaq grüpokunachöqa, Libropita Yachakunapaq reunionchönömi wallkaqlla kayan. Tsëmi “juc shonqunolla” wawqintsikkunawan y panintsikkunawan yachatsikurnin más amigo tikrantsik (Filip. 1:27). ¿Grüpïkipita ëkaq wawqikunawan o panikunawantaq yachatsikoq yarqurqunki? ¿Imanirtaq llapankunawan yarqïta procurankitsu? (2 Cor. 6:13, NM.) Jina allim kanman paqta mikuriyänëkipaq o Familiachö Diosta Adorayänëki Hörapaq mëqanllatapis invitariptikiqa. Wakin congregacionkunachöqa llapan grüpokunam congregacionman discursaq ëwaqta mikoq apayänampaq turnanakuyan. Turnon chäriptinqa, tsë grupo juntakärirmi shumaq pasariyan, discursaq mana yanaqaptimpis.
3. ¿Imanötaq Diospa kaqchö yanapakïta tarishwan yachatsikoq yarqunapaq grüpokunachö?
3 Congregacionkuna semänachö ishkë kutillana juntakäyanqanqa manam publicadorkunata anciänokuna Diospa kaqchö más wallkallana yanapayänampaqtsu. Grüpota rikaq anciänokunaqa llapan wawqikunata y panikunatam animayänan, cada ünotam yanapayänan y Diospita shumaq yachatsikuyänampaqpis yanapayänanmi. Grupïkita rikaq anciänowan yachatsikoq manaraq yarqushqa karqa, ¿imanirtaq nirinkitsu pëwan yarqunëkipaq? Jinamampis, cada killa ushëmi yachatsikunqantsikta rikaq anciano juk grüpota watukan. Takshalla congregacionkunachöqa capaz juk grüpota watachö ishkë kuti watukanqa. ¿Tiempota rakinkiku yachatsikunqantsikta rikaq anciano grüpïkita watukamunqan junaq yachatsikoq yarqunëkipaq?
4. a) ¿Imanötaq patsätsiyanman o kamakätsiyanman yachatsikoq yarqunapaq reunionta? b) ¿Imanirtaq tsë reunionkunapaq wayintsikta mañashwan?
4 Semana ushëkuna yachatsikuyänampaq grüpokuna separado juntakäyanqanqa alläpam yanapakun. ¿Imanir? Porque yachatsikoq yarqunapaq reunión más o menos tsë hörallachö y tukï wayichö rurakanqanmi wawqikunata y panikunata yanapan reunionman chäyänampaq y territorioman ëwayänampaq. Jina grüpota rikaq anciänopis publicadorkunata más facil-llam rakinqa ras yarquyänampaq. Nïkurnam más altantolla këkanqa cargonchö kaqkunapita. Tsënö kaptimpis, höraqa capaz más alli kanqa ishkë o más grüpokunata jukllëllaman rurë. Killa qallanan säbadokuna o Täpakoqpita yachakurnin usharir llapan congregación yachatsikoq yarqunampaq juntakarqa, cada publicador grüponwan jamakunqanmi más alliqa kanqa, tsënöpa yarquyänampaq manaraq mañakuyaptin anciänokuna grüpompita kaq publicadorkunata rakiyänampaq. (Rikäri “¿Wayikita mañankimantsuraq?” neq recuadrota.)
5. Libropita Yachakunapaq reunión manana kaptimpis, ¿imatataq alli musyantsik?
5 Libropita Yachakunapaq reunión manana kaptimpis, Jehoväqa llapan necesitanqantsiktam qoykämantsik munëninta ruranantsikpaq (Heb. 13:20, 21). Pëqa manam dejanqatsu imapis pishipamänantsikta (Sal. 23:1). Yachatsikoq yarqunapaq grüpokunaqa tukï bendicionkunata chaskinantsikpaqmi yanapamantsik. Tsëmi tsë asuntopaq yanapakïchöqa punta puntachö kanantsik, porque “atscata muroqqa atscatam ellun” (2 Cor. 9:6).
[6 kaq päginachö recuadru]
¿Wayikita mañankimantsuraq?
Wakin congregacionkunaqa grüpokunatam jukllëllaman tikratsiyan yachatsikoq yarquyänampaq reunionta rurayänampaq wayikuna mana kaptin. Yachatsikoq yarqunapaq reunionpis congregación Diospa kaq yachatsikïta chaskinampaqmi yanapakun, tsëmi tsë reunionkuna wayintsikchö rurakanqanqa alläpa kushikïpaq. ¿Puëdinkimantsuraq wayikita tsëpaq mañëta? Waktsalla y takshalla kaptimpis, ama penqakïtsu mañëta. Anciänokunaqa manam tsëtatsu rikäyanqa, sinöqa territoriokunapaq amänu o mana amänu kanqanta y maskunatam. Wayikita mañëta munarqa grüpïkita rikaq anciänota willari.