Yachatsikoq yarqunapaq reunionkuna yanapakunqan
1. ¿Imapaqtaq yanapakun yachatsikoq yarqunapaq reunionkuna?
1 Juk kutichömi, 70 discïpulunkunawan Jesusqa manaraq yachatsikoq yarqur ëllukarqan (Lüc. 10:1-11). Japallankunalla mana kayanqanta y Jehovä yanapanqanta yarpätsirmi animarqan. Jinamampis, shumaq yanapakïkunatam qorqan yachatsikïninkunachö alli yarqupukuyänampaq y ‘ishquepayanmi’ kacharqan. Kanan witsampis yachatsikoq yarqunapaq reunionkunaqa tsënöllam yanapakun: animamänapaq, yachatsimänapaq y shumaq patsätsishqa kanapaq.
2. ¿Ëka tiemputaq kanqa yachatsikoq yarqunapaq reunionkuna abril killapita patsë?
2 Kananyaqqa yachatsikoq yarqunapaq reunionkunaqa kashqa 10 a 15 minütukunam. Tsë tiempuchömi piwan yachatsikuyänampaq, mëqan territoriuman ëwayänampaq niyaq, y Diosman mañakuyaq. Peru abrilpita patsëmi 5 a 7 minütullana kanqa. Y congregacionchö reunion ushariptin yachatsikoq yarquyaptinnäqa mas wallka minütullanam rurayanman, porqui yachatsikoq yarqoqkunaqa Diospa kaqchö alli yachatsishqanam këkäyanqa. Yachatsikoq yarqunapaq reunionkuna tsënö kanqanqa yanapakunqa publicadorkuna mas yachatsikuyänampaqmi. Jina precursorkuna y publicadorkuna puntallapitana yachatsikur qallashqa kayaptimpis, mananam tiempunkunata qochinqanatsu.
3. ¿Imanötaq patsätsiyanman yachatsikoq yarqunapaq reunionkunata?
3 Yachatsikoq yarqunapaq reunionkunataqa patsätsiyänan publicadorkunata yanapanampaqnöllam. Mëtsikaq congregacionkunam rikäyashqa, cada yachatsikoq grüpu jukläya sitiukunachö juntakäyanqan alläpa yanapakunqanta, tsënöpa tsë reunionkuna y territoriukuna publicadorkunapa mas amänunllachö kanampaq. Tsënö patsätsishqa kanqanmi, grüpu rikaq anciänuta yanapanqa mas fäcil-lla cargunchö kaq publicadorkunata rikänampaq. Congregacionchö kaqkuna yachatsikuyänampaq wanayanqanmannömi, anciänukuna decidiyanqa imanö rurayänampaq kaqta. Yachatsikoq yarqunapaq reunionta juk mañakïwan manaraq usharninmi, musyayänanna mëta yachatsikoq ëwayänampaq y piwan yarquyänampaq kaqta.
4. ¿Imanirtaq wakin reunionnintsikkunanölla alläpa precisan yachatsikoq yarqunapaq reunionpis?
4 Congregacionchö wakin reunionkunanömi alläpa precisan. Kë reunionchöqa yachatsikoq yarqoq publicadorkunallam kayänan, y manam congregacionchö llapan kaqkunaraqtsu. Tsënö kaptimpis, manam mana precisaq reuniontanötsu rikänantsik. Tsë reunionpis Jehoväpa juk qarëninmi, porqui tsëwanmi yanapamantsik juknintsik juknintsik kuyanakunqantsikta rikätsinakunapaq y alli kaqta ruranapaq (Heb. 10:24, 25). Tsëmi tsë reunionkunata dirigeqkunaqa alli preparakuyänan, tsënöpa Diosta alabayänampaq y tsëchö publicadorkunata mas yanapayänampaq. Yachatsikoq yarqoq publicadorkunaqa, kallpachakuyänanmi tsë reunionkunachö kayänampaq.
Wakin reunionkunatanöllam yachatsikoq yarqunapaq reuniontapis precisaqpaq churanantsik
5. (1) ¿Imatataq ruran yachatsikunqantsikta rikaq anciänu? (2) ¿Imanötaq panikuna dirigiyanman?
5 Diriginëkipaq preparakï. Pipis asignacionninchö preparakunampaqqa puntallapitanam chaskinan. Yachatsikoq yarqunapaq reunionkunapaqpis tsënöllam kanan. Yachatsikunapaq grüpu jukläya jukläya sitiuchö ëllukäyaptinqa, grüputa rikaq anciänu y yanapaqninkunam reunionkunata dirigiyänan. Peru llapan congregacion juk sitiullapita yachatsikoq yarquyaptinqa, yachatsikunqantsikta rikaq anciänum ninqa pï diriginampaq kaqta. Yachatsikunqantsikta rikaq wakin anciänukunaqa, yachatsikïta dirigeq wawqikunatam puntallapitana juk progräman qoyan y tablëru de anuncios nishqanmanmi churayan. Tsë reunion shumaq rurakänampaqqa, dirigeq imanö yachanqampita y imanö patsätsinqampitam kanqa, y tsëpaqqa yachatsikunqantsikta rikaq anciänum, pï diriginampaq kaqta alli rikëkur akranan. Y wakin junaqkuna diriginampaq juk anciänu, juk siervu ministerial o tsëta ruranampaqnö juk bautisädu wawqi mana kaptinqa, yachatsikunqantsikta rikaq anciänum juk yachaq bautisäda panita akranan. (Rikäri 6 kaq päginachö “Juk pani yachatsikoq yarqunapaq reunionta diriginan kaptin” neq yachatsikïta.)
6. ¿Imanirtaq yachatsikoq yarqunapaq reunionta dirigeq alli preparakunman?
6 Yachatsikunapaq Diospa Escuëlan o Diospa Gobiernumpita Yachatsikunapaq reunionkunapaq juk asignacionta chaskirqa, precisaqpaqmi churantsik y alleqmi preparakuntsik. Wallkaqllam itsa reunionkunaman ëwëkäyanqan höraraq pensayan imapita parlayänampaq kaqta. Yachatsikoq yarqunapaq reunionta diriginapaq nimashqapis, tsënö precisaqllapaqmi churashwan. Tsë reunion mas wallka tiempulla kaptimpis, alli yanapakoq kanampaqmi alleq preparakushwan tiempuchö ushanapaq. Jina mëqan territoriukunata yachatsikunapaq kaqta puntallapita alistëpis alli preparakïmi.
7. ¿Imakunatataq rurayanman yachatsikoq yarqunapaq reunionkunachö?
7 ¿Imapitataq parlashwan? Manam llapan sitiukunachötsu igual-lla yachatsikuntsik, tsëmi, llapanchö wiyakoq y yachëwan sirweqqa tsë reunionkunata imanö ruranapaq yachatsikïkunata jorqamushqatsu. Peru 6 kaq päginachö, “¿Imakunapitataq yachatsikarayämunman?” neq yachatsikïmi yanaparamäshun. Jina tsë reunionkunachöqa publicadorkunapis parlakuriyanqam. Höraqa juk demostracion rurëta o jw.org päginachö yachatsikïpaq parlaq juk vidëutapis rikëta puëdiyanqam. Yachatsikoq yarqunapaq reunionta ruraqqa, yachatsikoq yarqoq kaqkunata imakuna yanapanampaq kaqman alleq pensëkurmi preparakunan.
Dirigiyänampaq preparakurninqa cuentamanmi churayänan tsëchö këkaqkunata animanampaq y maslla yachatsinampaq
8. ¿Ima maskunapitataq parlarishwan semäna ushë yachatsikoq yarqunapaq reunionchö?
8 Cäsi llapan publicadorkunam säbadukunapa Täpakoq revistawan yachatsikuyan. Mëtsikaqmi semänachöqa yachatsikoq yarqïta puëdiyantsu, peru säbadukunaqa yarquyanmi, y itsa Familiachö Diosta Adorayänan Hörachö imanö yachatsikuyänampaq preparakuyanqanta yarpäyannatsu. Tsëmi alläpa yanapakunqa reunionta dirigeq wawqi, Diospita Yachatsikunapaq höjapa ushanan kaq päginanchö, “imanö yachatsikunapaq” neqpita yarpätsikurinan. Jina revistakunawan yachatsikuyanqan höra, itsa tsë markachö ima pasakunqan o ima celebracion kanqampitapis parlariyänampaq nirinman. Jina revistata jaqiyanqan kaqkunaman yachatseq kutiyänampaq tapukïkunata imanö rurayänampaq kaqtapis parlakurinmanmi. Tsëchö këkaq mëqan publicadorllapis tsë killa kaq revistawan yachatsikïkashqana karninqa, itsa willakurinman imanö rurëkanqanta y imanö alli yarqupukunqanta. Domingukunapis itsa tsënölla rurariyanman tsë killa yachatsikuyänan publicacionkunawan. Jina tsë reunionchöqa, juk publicacionkunawan imanö yachatsikunapaq kaqtapis parlariyanmanmi, tantiyarinapaq, Diospa alli willakïninkuna y Diosta wiyakï follëtuwan, o Yachatsikun libruwan, tsë publicacionkunataqa utilisantsik llapan junaqkunam y Bibliapita yachatsikunapaqmi.
9. Juk precisaq rurëchö këkashqaqa, ¿imakunapitataq semäna ushëchö yachatsikoq yarqunapaq reunionchö dirigeq parlarinman?
9 Congregacionchö kaqkuna juk precisaq rurëchö këkäyaptinqa, semäna ushëkuna invitacionta o tratäduta revistawan juntu imanö qarakunapaq kaqta, o pillapis maslla yachakïta munaptin imata rurayänampaq kaqpitam dirigeqqa parlakurinman. Jina precisaq rurëchö yanapakunqantsikchö alli pasakunqankunatapis willakurinmanmi.
10, 11. ¿Imanirtaq precisan publicadorkuna alleq preparakuyänan?
10 Imanötaq publicadorkuna preparakuyanman. Yachatsikoq yarqunapaq reunionkuna alli yarqunampaqqa, publicadorkuna yanapakuyanqampitam kanqa. Wakinkunaqa, Familiachö Diosta Adorana Hörachömi preparakuyan yachatsikuyänampaq, tsëmi yanapan tsë reunionchö shumaq parlakuriyänampaq. Alli preparädu kanapaqqa, puntallapitam publicacionkunata listuta katsinantsik. Tsënöpam territoriuntsikman raslla chärishun.
11 Congregacionchö wakin reunionkunamannöllam, yachatsikoq yarqunapaq reunionmampis tempränu chänantsik. Tardi charninqa, patsätsiyanqankunatam pantatsishwan. ¿Imanö? Dirigeq wawqiqa, imëkatam cuentaman churashqa juk grüputa shumaq patsätsinampaq. Tantiyarinapaq, wallkaqlla kayaptinqa itsa manaraq yachatsikur ushayanqan territoriuman llapanta mandarinqa. Y territoriukuna caruchö kaptinqa, itsa mana cärruyoq publicadorkunata cärruyoq kaqkunatawan mandarinqa. Y juk peligrösu sitiupa yachatsikoq juk grüpu panikuna ëwayaptinqa itsa amänunllapa o pëkunawan juntu wawqikuna yachatsikuyänampaq mandarinqa. Juk publicador qeshyaptinqa, itsa sasa sitiukunapaqa mandanqatsu. O yachaq publicadorkunata mushoq kaq publicadorkunatawan yachatsikuyänampaq mandanqa. Peru tardi chashqaqa, itsa yapëraq llapanta patsätsinqa. Awmi, höraqa imallapis pasakuptinmi tardi chärishwan. Peru imëpis tardi charqa, alleqmi yarpachakunëki tsë reunionta precisaqpaq o mana precisaqpaq churëkanqëkita o imëka rurënikikunata alleq patsätsita wananqëkita.
12. Imëpis tsë cristiänullawan yachatsikoq yarqurqa, ¿imata ruranapaqtaq churapakashwan?
12 Publicadorkunaqa puëdiyanmi puntallapitana piwampis yachatsikoq yarquyänampaq parlëta o dirigeq wawqi yanaqin akrapunanta. Peru imëpis tsë cristiänullawan yachatsikoq yarqurqa, ¿manatsuraq wakin kaq publicadorkunawampis yachatsikoq yarqushwan? (2 Cor. 6:11-13.) ¿Manatsuraq imëllapis mushoq publicadorwan yachatsikoq yarqushwan yanaparinapaq y tsënöpa mas alli yachatsikoq kanampaq? (1 Cor. 10:24; 1 Tim. 4:13, 15.) Yachatsikoq yarqunapaq reunionchöqa yachatsikayämunqanta y mëpa yachatsikur qallanapaq niyämunqantam alleq wiyanantsik. Reunion ushariptinqa, patsatsiyämunqantaqa manam jukmampa rurëta procurashwantsu y territoriumanmi raslla ëwashwan.
13. Llapantsik yanapakushqaqa, ¿imanötaq yachatsikoq yarqunapaq reunionkuna kanqa?
13 Jesus 70 discïpulunkunata yachatsikuyänampaq mandanqampitaqa, ‘llapanmi cushishqa cutiyarqan’ (Lüc. 10:17). Awmi, yachatsikoq manaraq mandarnin Jesus discïpulunkunawan juntakäyanqanmi, yanapakurqan alli yarqupukuyänampaq. Kanampis yachatsikoq yarqunapaq reunionkunaqa tsënöllam yanapakun. Llapantsik yanapakushqaqa kë reunionkunaqa animakoq y yachatsikoqmi kanqa, jina “llapan markachö nunakuna musyayänampaq” shumaq patsätsishqa yachatsikïta cumplinapaqmi yanapamäshun (Mat. 24:14).