Yachatsikoq ëwanapaq reunionkuna
1. ¿Imanirtaq precisan mëchö y imanö yachatsikunapaqpis musyanantsik?
1 Mëchö y imanö yachatsikuyänampaqpis Jesusqa pëwan yarqoqkunata yachatserqanmi. Tsënö ruranqannöllam kanan witsan hinantin Patsapa yachatsikïta rikaq wawqikunapis rurëkäyan. Tsëmi llapan congregacionkunachö wayin wayin yachatsikoq yarquyänampaq ëllukäyanraq, tsëchömi musyayan mëpa ëwayänampaqpis (Mat. 24:45-47; 25:21; Luc. 10:1-7).
2. ¿Imanirtaq mëchöpis ëllukëkur-raq yachatsikïman yarquntsik?
2 Yachatsikunapaq ëllukänantsikqa alläpa allim: Wayin wayin yachatsikoq ëwanapaq reunionqa kushi kushi purinapaq y alli yachatsikunapaqmi yanapakun. Cada hunaqpaq textochö yachatsikunapaqnö parlaptenqa, itsa tsëpita yachatsikarayämonqa. Hina, höraqa yachatsikayämonqa Diospita Yachatsikunapaqpita, o Razonamiento o Benefíciese librokunapitam. Hinamampis itsa publicacionwan imanö yachatsikunapaq demostracionta rurayämonqa. Manaraq mañakurmi reunionta dirigeq piwan yarquyänanta y mëchö yachatsikuyänampaq kaqtapis llapankunata musyatsinan. Kë reunionqa manam 15 minütopita masqa kanantsu, ushariptinllam llapankunam yachatsikuyänan territorioman ëwayänan.
3. ¿Pikunataq rurayänan yachatsikoq ëwanapaq reunionta?
3 Pikunataq rikäyan: Superintendente de serviciom rikan wayin wayin yachatsikunapaq reunión mëchö kanampaq kaqtapis. Semana ushëkunaqa dirigenqa yachatsikïta rikaq anciano o pëpa rantin yarqoq wawqim. Llapan cargonchö kaqkunawanmi pëkunaqa yachatsikïman yarquyanqa, y superintendente de serviciotam atska territoriota mañayanqa. Wakin hunaqkunapaqnam superintendente de servicio churanan anciänokunata o siervo ministerialkunata grüpokunata rikäyänampaq, hina rikänanmi mëqan territoriochö yachatsikuyänampaq kaqtapis.
4-6. a) Yachatsikoq ëwanapaq, ¿imanirtaq amänullachö ëllukänantsik? b) ¿Imatataq yarpäyänan imë y mëchö reunión kanampaq kaqta rikar?
4 ¿Imë y mëchöraq kanqa? Markantsikchö llapan wayikunaman chänapaqqa, anciänokunam shumaq parlayanqa mëchö reunión kanampaq kaqtapis, tsënöpa llapan grüpokuna hukllachö mana ëllukäyänampaq. Hina Yachatsikuyänan Wayichöpis kë reuniontaqa rurayanmanmi. Wakin congregacionkunachöqa yachatsikoq yarquyänampaq reuniontaqa rurayan Discursopita Yachakunapaq y Täpakoqpita Yachakunapaq reunión ushariptinllam. Yachatsikuyänan sitiopa amänunllachömi kanan yachatsikoq ëwanapaq reunionqa. Llapan wayikunaman chäyänampaqmi superintendente de servicio imëpis rikänan reunionta rurayänan wayi amänunllachö o mana amänunllachö kanqantapis.
5 Mëqan territoriopa ëwayänampaqpis rikëkurmi imë hunaq y imë höra reunión kanampaq kaqtapis patsätsiyänan. Qateqnin pärrafochö tapukïkunam yanapakun yachatsikoq yarqur imë y mëchö ëllukäyänampaqpis.
6 ¿Mëqan markachötaq más yachatsikuyänanta wanayan? ¿Imë horataq más alli wayin wayin yachatsikuyänampaq? ¿Tardepëpa reunionta rurayanmantsuraq wayin wayin yachatsikuyänampaq o yachakïta munaqkunaman kutiyänampaq? Yachatsikoq ëwanapaq progrämata listona katserqa tablëromanmi churayänan. Pablu, “limpunam que marcacunacho willapäcur usharerqö” nenqannömi, noqantsikpis llapan wayikunaman chëta munantsik (Rom. 15:23).
7. ¿Imatataq ruranan yachatsikïta rikaq wawqi?
7 ¿Imanötaq reunionta rurayänan? Yachatsikoq yarquyänampaq reunionta dirigeq wawqi puntallapitana alli yachakorqa, Jehová Diosta respetanqantam rikätsikun. Yachatsikïta rikaq wawqiqa puntallapitanam musyanan mëqan territorioman ëwayänampaq kaqtapis. Kë reunionchöqa allim yachatsikunan, höranchömi qallanan y manam 15 minütopita masqa kanantsu. Ushariptinllam llapan yarquyänan yachatsikoq. Höranchö mana chämoqkunataqa mana shuyaräyänannatsu, imam sïqa, musyayänanmi mëpa yachatsikoq yarquyanqantapis. Mëchö y imanö yachatsikunapaqpis reunionchö wiyakurerqa, llapampis allim yachatsikuyanqa (Pro. 11:14).
8. ¿Imanötaq yanapashwan yachatsikunapaq reunionta dirigeq wawqita?
8 Tsë reunionchö kanantsikqa precisanmi: Llapanchö yanapanakunantsikqa precisanmi (Heb. 13:17). Reunionta dirigeq wawqiqa alliraq rikëkurmi pipaqpis yanaqin churan. Kë reunionkunaman unëna Jehoväta sirveq wawqikuna ëwarqa, mushoq kaqkunawan y tsëraq yachakïkaqkunawan yarqurmi yanapayanqa. Hina yachatsikïman hukwan hukwan yarqïpis yanapamäshunmi (Pro. 27:17; Rom. 15:1, 2). Ama qonqashuntsu, tsë reunión manaraq qallaptin llapantsik chänantsikqa precisanmi. Jehová mandakonqanta, y noqantsikwan yarqoqkunata respetanqantsikmi yanapamäshun temprano chänapaq (2 Cor. 6:3, 4; Fili. 2:4).
9. ¿Imanötaq precursorkuna yanapakuyan yachatsikoq ëwanapaq reunionchö?
9 Precursorkunaqa yanapakuyanmi: Tsë reunionchö precursorkuna kayaptenqa, llapampis pëkunapita yachakuyanmi y kushi kushim yarquyampis. Pero yarpäshun, precursorkunapaqa atska ruranankunam kan, manam estudiollatatsu qokuyan, ni wiyaqkunallamantsu kutiyan, hina trabajayänanmi y wakinkunaqa familiankunatapis rikäyänanraqmi. Tsëmi llapan hunaqkuna reunionman shayämunantaqa shuyarashwantsu. Tsënö karpis, allichi kanman semänachö mëqan hunaqkunallapis tsë reunionman shayämuptenqa. Yachatsikoq ëwanapaq reunionqa escuëlanömi, tsëchöqa Diospa kaqpita y precursorkuna rurayanqampita wakinkunapis yachakuyanmanmi. Imëpis wayin wayin yachatsikurmi precursorkunaqa alli yachatsikuyan. Tsëmi wakinkunatapis yanapariyanman. Hinamampis kushi kushi yachatsikïman yarquyanqampita y yachatsikoq ëwanapaq reunionchö kayanqampitaqa wakinkunapis yachakuriyanmanmi. ¡Tsë reunionchö kayämonqantaqa alläpam agradecikuntsik!
10. ¿Imanirtaq yachatsikunapaq reunionchö kanantsik alläpa precisan?
10 Jesuswan qateqninkuna rurayanqannöllam kanankunapis wayin wayin ëwarnin nunakunata más yachatsintsik. Yachatsikoq ëwanapaq reunionqa yanapamantsik huknintsik huknintsik shumaq yanapanakunapaq y más alli yachatsikoq tikranapaqmi. Tsëmi llapantsik Diospa gobiernompita yachatsikoqkunaqa tsë reunionchö këta tïranantsik (Hech. 5:42; 20:20). Tsë reunionchö kanantsikrëkur tiempontsikta shumaq patsätsishun. Tsëqa, ¿imataraq tarishun? Alli willakïta puritsenqantsiktam Jehová bendecimonqa y Pushamaqnintsik Jesucristupis kushikonqam (Mat. 25:34-40; 28:19, 20).