¿Imanötaq wiyamaqnintsikpa shonqunman chashwan?
1. ¿Imanötaq Jesus yachatsiptin qateqninkuna sientikuyarqan?
1 Jesusqa wiyaqninkunapa shonqunmanmi charqan, tsëmi Bibliaqa nin qateqninkunapa shonqunkuna ‘allapa cushiconqanta’ (Lüc. 24:32). Shonqupita patsëmi Diostaqa wiyakunantsik. Tsëqa, ¿imanötaq estudiantikunata yanapashwan kawëninkunata cambiayänampaq? (Rom. 6:17.)
2. ¿Imanötaq yanapamantsik entiendita procuraq y yachëllapa parlapäkoq kanqantsik?
2 Entiendi y yachëllapa parlapë. Ima alli y ima mana alli kanqanta nishqallatsu manam nunakunaqa kawëninkunata cambiayanqa. Y mana alli creenciankunata atska textukunawan rikätsishqapis itsa wiyamënintsiktaqa munayanqatsu. Yanapanapaqqa, puntataqa entiendinantsikmi imanir tsëman creiyanqanta y imanir tsënö portakuyanqanta. Alli yarpachakïkur y yachëllapa tapunqantsikmi yanapanqa imata pensayanqanta willaramänapaq (Prov. 20:5). Tsëta musyarmi, Bibliapa mëqan textukunatapis akrëta puëdishun y shonqunkunaman chäshun. Tsëmi precisan pacienciayoq kanantsik y pëkunapaq yarpachakunantsik (Prov. 25:15). Yarpë, estudiantikunaqa manam igualtsu Diospa kaqchö poquyan. Jehoväpa santu espïritunqa ichikllapa ichikllapam yanapanqa kawëninta y pensëninta cambianampaq (Mar. 4:26-29).
3. ¿Imanötaq estudiantintsikkunata yanapashwan Dios munanqannö kawakuyänampaq?
3 Yanapashqam Dios munanqannö kawakuyanqa. Jehovä kuyakoq y llakipäkoq kanqanta juk ishkë textukunawan rikäratsinqantsikmi yanaparinqa Dios munanqannö kawakuyänampaq. Noqantsikpaq Dios yarpachakunqanta rikäratsinapaqqa, Salmus 139:1-4 y Lücas 12:6, 7 textukunatam leyirapushwan. Jehovä llakipäkoq kanqanta agradecikurmi, pëta mas kuyayanqa y alabayanqa (Rom. 5:6-8; 1 Juan 4:19). Jina portakïnin Jehoväta kushitsinqanta o llakitsinqanta musyanqanmi, yanapanqa portakïninwan Jehoväta kushitsinampaq y alabanampaq (Sal. 78:40, 41; Prov. 23:15).
4. ¿Imanötaq Jehovä ruranqanta qatishwan wakinkunata rasumpa kaqpita yachatsirnin?
4 Jehoväqa manam pitapis obligantsu leyninkunata wiyakuyänampaq, sinöqa consëjunkunata cäsukur alli kawakunapaq kaqtam musyatsimantsik (Is. 48:17, 18). Jehoväpa rurënintaqa qatintsik estudiantikunata kikinkuna cuentata qokuyänampaq yanaparmi. Tsënö rurashqaqa, Jehovä munanqannömi imëpis kawayanqa (Rom. 12:2). Tsënöpam ichikllapa ichikllapa “shonqukuna rikaq” Jehoväman mas witiyanqa (Prov. 17:3).