Llapan nunakunata kuyashun

Adanmi llapantsikpa punta awiluntsik, tsëmi familialla kantsik. Tsëqa, ¿manatsuraq llapantsik shumaq kuyanakur y respetanakur kawakushwan? Tsënö kawakunapa rantinmi mas chikinakuntsik y tsënö kawakunataqa manam Teyta Diosnintsik munarqantsu.

PALABRANCHÖMI NIMANTSIK:

Nuna mayintsikta kikintsiktanö kuyanapaq (LEVÏTICU 19:18).

Chikimaqnintsikkunata kuyarnin sïguinapaq (MATEU 5:44).

¿IMATATAN RURANANTSIK NUNA MAYINTSIKKUNATA KUYANAPAQ?

Diosnintsikmi 1 Corintius 13:4-7 nimantsik nuna mayintsikta rasumpa kuyë imanö kanqanta. Kënömi nin:

“Kuyakoqqa pacienciakoqmi y ankupäkoqmi”.

Pillapis pacienciakoq, kuyakoq y imallachöpis pantarishqa ras mana cölerakuptinqa, alläpam kushikuntsik.

“Kuyakoqqa manam celösutsu”.

Pillapis chikipämashqa y noqantsikman mana confiakuptinqa alläpam llakikuntsik.

Kuyakoqqa “manam kikimpa munëninllatatsu ashin”.

Pï nunapis ninqanllata välitsiptin y ninqantsikta mana kaqpaq churaptinqa llakikuntsikmi.

Kuyakoqqa “manam yarparäkuntsu mana allita rurayanqanman”.

Diosnintsikqa mana allikunata ruranqantsikta manam yarparantsu, arrepentikushqaqa perdonamantsikmi (Salmus 103:9). Teyta Diosnintsik perdonamanqantsikpitaqa alläpam kushikuntsik. Tsëmi pillapis mana munëkar llakitsimashqaqa perdonëkunantsik (Salmus 86:5).

Kuyakoqqa “manam mana alli rurëkunawantsu kushikun”.

Mana allipa pasashqaqa manam kushipämanantsikta munantsiktsu. Tsëmi chikimaqnintsikkuna mana allipa pasayaptinqa kushipänantsiktsu.

Teyta Dios yanapamänantsikta munarqa, ima religionyoq y më nacionpita kayaptimpis llapan nunakunatam kuyanantsik.