Kananqa masmi nunakuna alläpa llakikur qeshyayan
“Imëpis llakishqa y yarpachakurllam këkä y höranäqa mana kaqpitam llakikü”.
“Alli këkarmi yarpachakur qallëkü. Kushishqa këkarmi ‘¿imaraq pasakunqa?’ nir alläpa llakikü”.
“Cada junaqmi kallpachakü alläpa mana yarpachakunäpaq, peru illaqpitam imëkapaq yarpachakur qallëkü”.
Tsënöqa niyan alläpa llakikurnin qeshyëkaq nunakunam. ¿Kë nunakunanöku qampis sientikunki, o pillapis tsë qeshyawan kanqanta reqinkiku?
Tsënö karqa, manam qamllatatsu tsëqa pasashunki. Entëru Patsachömi mëtsikaq nunakuna tsënö qeshyayan, o familiankuna tsë qeshyawan kayaptin alläpa sufriyan.
‘Alläpa mana alli y mana aguantëpaqnö tiempukunachömi’ kawëkantsik, tsëmi imëkapis alläpa llakitsimantsik y sufritsimantsik (2 Timoteu 3:1). Cada puwaq nunapita, jukqa llakikuy qeshyawan qeshyanqantam Organización Mundial de la Salud nin. Y 2020 wata COVID-19 qeshya witsanqa, setenta y öchu millonpitapis mas nunakunanam depresion y ansiedad qeshyawan mas qeshyayashqa.
Peru manam kë llakikuy qeshyawan ëkaq qeshyayanqanta musyëtsu masqa välin. Sinöqa musyanantsikmi noqantsik o familiantsikkuna qeshyayaptin imata ruranapaq kaqta.
Llakikuy qeshyayoq mana karqa, ¿imanötan kawakuyan?
Pipis alläpa llakikuy qeshyawan mana qeshyarqa allim sientikun, imatapis allim ruran, problëmakunapa pasarpis allim tsarakun, trabäjunchömi alli trabajan y kushishqam kawakun.
¿Imatan llakikuy qeshyaqa?
Manam këtsu: manam qela karnin gänasninnaq këtsu.
Këmi: tsë qeshyawanqa alläpam llakikuyan, manam imatapis shumaq pensëta puëdiyantsu, y manam imanö sientikuyanqanta, imata niyanqanta o rurayanqanta controlëta puëdiyantsu.
Tsë qeshyawan kaqkunaqa manam piwampis juntakuyta munayantsu, y manam imata rurayänampaqpis gänasninkuna kantsu.
Kë qeshyaqa ima edäyoq kayaptimpis, mëpita kayaptimpis, ima religionyoq kayaptimpis, estudiashqa kayaptimpis o rïcu kayaptimpis tsarinmanmi.
Yanapayäshunëkipaq mañakuy
Capaz pipis jukläyana portakun, alläpa mikun o mikuyta munantsu o punukunlla o punuyta puëdintsu. O capaz atska tiempupana alläpa yarpachakun o llakikun. Tsëkuna qamta o familiëkita pasaptinqa doctormanmi ëwayänëki, tsënöpa ima qeshyawan kayanqëkita musyayänëkipaq y jampikuyänëkipaq.
Jesucristum kënö nirqan: “Sänu këkaqkunaqa manam doctorta wanayantsu, peru qeshyëkaqkunam sïqa” (Mateu 9:12). Llakikurnin qeshyëkaqkunata doctorkuna yanapayaptinqa manam peorayanqatsu, sinöqa alliyäriyanqam y kushishqam sientikuyanqa. Peru tsë qeshyawan unëpana qeshyëkarqa ras o sasmi yanapayäshunëkita ashinëki.a
Jampi asuntukunapaq mana parlarpis, Bibliachö consëjukunaqa yanapamäshunmi alläpa llakikur qeshyawan kashqa. Qateqnin kaq yachatsikuykunachömi yachakushun, Bibliachö consëjukuna alläpa llakikurnin qeshyashqa imanö yanapamänapaq kaqta. Leyinëkipaqmi animayaq.
a Kë Täpakoq revistaqa manam ima jampiwan jampikunëkipaq kaqta nintsu. Cada nunam imanö jampikunampaq kaqta alli decidinan.