LLAPAN LEYINA KAQ Watchtower
Watchtower
LLAPAN LEYINA KAQ
Quechua (Ancash)
  • BIBLIA
  • RURAYÄMUNQÄKUNA
  • REUNIONKUNA
  • w23 Octubri päg. 30-päg. 31 pärr. 2
  • Leyeqkuna tapukuyanqan

Këchöqa manam videu kantsu

Imanöparaq manam kë videu kichakämushqatsu.

  • Leyeqkuna tapukuyanqan
  • Täpakoq Jehovä Diospa Gobiernumpita Willakoq (Yachakunapaq)—2023
  • Jukchö tsëpaq parlaq
  • Mushoq mikuna
    Bibliapita willakïkuna willakoq librömi
Täpakoq Jehovä Diospa Gobiernumpita Willakoq (Yachakunapaq)—2023
w23 Octubri päg. 30-päg. 31 pärr. 2
Tsunyaq sitiuchömi juk familia y wakin israelïtakuna manäta juntëkäyan.

Leyeqkuna tapukuyanqan

¿Israelïtakunaqa tsunyaq sitiuchö këkar manätawan codornizllataku mikuyarqan?

Israelïtakuna cuarenta watapa tsunyaq sitiuchö kayanqan witsanqa, manätam masqa mikuyarqan (Ex. 16:35). Y ishkë kutim Jehoväqa codornizta mikuyänampaq qararqan (Ex. 16:12, 13; Nüm. 11:31). Peru manam tsëllatatsu mikuyarqan, juk mikuykunapis wallkallaqa karqanmi.

Këllaman pensarishun: Jehoväqa quedakuyänampaq sitiumanmi pushaq, tsëchömi yakuta y wakin mikuykunata tariyaq (Nüm. 10:33). Jukqa Elim sitium karqan, tsëchöqa, “döci sitiuchömi yaku pashtamoq y setenta palmërakunam” kaq, capazchi tsëchöqa datilera palmëra niyanqan plantakuna karqan (Ex. 15:27). Plants of the Bible librun datilera palmërapaq kënö willakun: “Kë palmërakunaqa mëtsë sitiuchömi winan, […] y tsunyaq sitiuchöqa kë plantatam nunakuna mikuyta puëdiyan, aceititam jipiyan, y arwäkuyanmi o llantukuyanmi”.

Capazchi israelïtakunaqa yaku y plantakuna kanqan Farana niyanqan pampachö quedakuyarqan. Discovering the World of the Bible librum kënö willakun: “Faran pampapa largunqa, 130 kilömetrus medin. Sinaï sitiuchöqa kë pampam mas largu, mas shumaq y mas reqishqa. Pampa qallanqampita 45 kilömetruschömi yaku pashtanqan sitiu këkan, y mëtsika palmërakunam kan. Yaku y palmërakuna kanqan pampapa largunqa 4,8 kilömetrusmi medin. Y lamarpitaqa 610 metrus altuchönömi këkan. Sinaï sitiuchö tsë pampa alläpa shumaq kaptinmi, Eden nir reqiyan. Unëpitam mëtsika datilera palmërakuna kaptin tsëmanqa mëtsika nunakuna ëwayashqa”.

Pampachö datilera palmërakuna. Y taksha kaq fötuchönam datilera palmërapa murunkuna rikakun.

Faran niyanqan pampachö datilera palmërakuna

Egiptupita israelïtakuna ëwakurqa harinata, masata rurayänampaq jatusaq tazonkunata, y capazchi gränu mikuykunata y aceititapis apayarqan. Peru tsëkunataqa rasllachi o sasllachi ushariyarqan. Tsënöllam “mëtsika üshankunata y wäkankunata qatirkur ëwakuyarqan” (Ex. 12:34-39). Peru tsë apayanqan animalninkunaqa, wakinqa wanurchi tsunyaq sitiuchö ushakarqan. Y capazchi wakin animalninkunataqa mikuyänampaq pishtayarqan o Diosnintsikpaq o santukunapaq rupatsiyänampaq pishtayarqan (Hëch. 7:39-43).b Tsënö kaptimpis israelïtakunaqa, üshakunata y wäkakunatapis wätayarqanmi. Tsëtaqa musyantsik mana cäsukuyaptin Jehovä kënö ninqanwanmi: “Cuarenta watapam tsurikikunaqa kë tsunyaq sitiuchö animalkunata mitsir kayanqa” (Nüm. 14:33). Tsënö wätakushqa kayaptinqa, karqanchi ichik ichikllapis upuyänampaq lichi y mikuyänampaq ëtsapis, peru manachi tinkurqantsu cuarenta watapa, kima millonnö nunakuna mikuyänampaqqa.c

Peru ¿imanöraq israelïtakunaqa animalninkunapaq yakuta y pastuta tariyarqan?d Capazchi tsë witsankunaqa, tsë sitiukunachö mas seguïdu tamyaq y tsëchi mas pastupis kaq. Perspicacia para comprender las Escrituras, libruchömi kënö nin: “Unëqa manam kanannötsu Arabiachöqa yaku pisheq, tsë tiempupitaqa tres mil quinientus watanönam pasarishqa”. Y tsëpitam kënö nin: “Kanan tiempuqa, mëtsika tsaki pözukunata y yaku ëwanqan sitiukunatam rikantsik. Tsëwanmi musyantsik unë witsanqa seguïdu tamyaptin atska yakuyoq kanqanta y tsë sitiukunapa atska yaku ëwanqanta”. Tsënö kaptimpis tsë tsunyaq sitiukunaqa, yaku alläpa mana kaptinmi mantsëpaq kaq (Deut. 8:14-16). Milagruta rurarnin Jehovä yakuta mana yuritsiptinqa, israelïtakunapis y animalninkunapis wanurmi ushakäyanman karqan (Ex. 15:22-25; 17:1-6; Nüm. 20:2, 11).

Jehoväqa israelïtakunata manä mikuyta qararqan, “nunaqa pachata mikur y Teyta Jehovä ninqanta wiyakur-raq kawëta puëdinqanta” musyayänampaqmi (Deut. 8:3).

a Rikäri 1992 wata 1 de mäyu La Atalaya revistapa 24 y 25 kaq päginankunata.

b Bibliachöqa willakun tsunyaq sitiuchö këkar israelïtakuna ishkë kutichö Jehoväpaq animalkunata rupatsiyanqantam. Jukqa karqan, sacerdötikuna kanampaq Jehovä patsätsinqan junaqmi, y juk kaqnam karqan Pascua Fiestata celebrayanqan junaq. Ishkan kutipis Jesus manaraq shamuptin 1512 watallam karqan. Tsëqa karqan Egiptupita yarquyanqampita juk wata pasarinqanllachömi (Lev. 8:14–9:24; Nüm. 9:1-5).

c Tsunyaq sitiuchö cuarenta watapa kayanqan ushëkaptinnam israelïtakunaqa, chikeqnin nunakunata guërrachö ganarir mëtsika animalninkunata apakuyarqan (Nüm. 31:32-34). Tsënö karpis, Dios Änikunqan Patsaman yëkuyanqanyaqmi manäta mikuyarqan (Jos. 5:10-12).

d Animalkunaqa manachi manäta mikuyarqantsu, Jehoväqa israelïtakunallatam nirqan cada nunapaq tinkullata manäta ëlluyänampaq (Ex. 16:15, 16).

    Llapan publicacionkuna Quechua Ancash (1993-2025)
    Cuentëkita wichqë
    Cuentëkiman yëkuy
    • Quechua (Ancash)
    • Pimampis apatsi
    • Patsätsi
    • Copyright © 2025 Watch Tower Bible and Tract Society of Pennsylvania
    • Utilizänëkipaq conträtu
    • Willakunqëkikunata imanö utilizäyanqä
    • Configuración de privacidad
    • JW.ORG
    • Cuentëkiman yëkuy
    Pimampis apatsi