Jehovänömi jutsata rurashqakunata tratanantsik

1. ¿Nunakuna imata rurayänantataq Jehovä munan?

JEHOVÄ DIOSQA nunakunata kamashqa imatapis kikinkuna decidiyänampaqmi. Tsëmi llapantsikpis cada junaq imëkata decidintsik. Peru juk nuna Jehoväta sirwinampaq y sirweqninkunawan juntu kanampaq decidinqanmi, imata decidinqampitapis mas alliqa. Y tsëta decidiyänantam Jehoväqa munan. ¿Imanirtan tsëta munan? Nunakunata kuyarnin y alli kayänanta munarmi. Pëqa munan amïgun karnin imëyaqpis kushishqa kawakuyänantam (Deut. 30:19, 20; Gäl. 6:7, 8).

2. Juk cristiänu congregacionpita rakishqa kaptimpis, ¿imata ruranantataq Jehovä munan? (1 Juan 2:1).

² Jehoväqa manam pitapis obligantsu sirweqnin kayänampaq; tsëtaqa cada nunam decidinan. Peru ¿imatan pasakunman juk cristiänu alläpa jutsata rurariptinqa? Mana arrepentikurqa, manam congregacionchö këta puëdinqanatsu (1 Cor. 5:13). Peru congregacionpita rakishqa kaptimpis, Diosnintsikqa alläpam munan tsë jutsa ruraq kutimunanta. Tsëta munarmi Jehoväqa Tsurin Jesusta kë Patsaman mandamurqan arrepentikoqkunata perdonanampaq (leyi 1 Juan 2:1). Jehovä Diosnintsikqa alläpa kuyakoqmi, tsëmi jutsata ruraqkunata yanapan y arrepentikuyänampaq animan (Zac. 1:3; Rom. 2:4; Sant. 4:8).

3. ¿Imatataq këchö yachakushun?

³ Noqantsikpis Jehovänömi jutsa ruraqkunata llakipänantsik, peru jutsa rurëtaqa chikinantsikmi. Yachakurishun Corintuchö pasakunqanta. Corintu congregacionchö juk cristiänu alläpa jutsata ruraptin, ¿imatataq rurayarqan congregacionchö kaqkuna? Tsë cristiänu arrepentikuriptinqa, ¿imanö yanapayänampaqtan apostol Pablu nirqan? Y ¿jutsa ruraqkunataqa Jehovä llakipanku?

CORINTUCHÖ JUK CRISTIÄNU JUTSATA RURAPTIN, ¿IMATATAQ RURAYARQAN?

4. ¿Imatan Corintu congregacionchö pasakuykarqan? (1 Corintius 5:1, 2).

⁴ (Leyi 1 Corintius 5:1, 2). Kima kaq viäjinchömi apostol Pablu musyarirqan, tsëllaraq formakashqa congregacionchö juk cristiänu madrastanwan oqllanakur kakuykaqta. Tsëqa alläpa jutsam karqan. Apostol Pablu ninqannöpis tsënö jutsataqa “mana creikoqkunapis” manam rurayaqtsu. Corintu congregacionchö kaqkunaqa allilla kanqanta pensarmi tsë wawqi ruranqanta corregiyarqantsu. Capazchi pensayarqan jutsasapa kanqantsikta musyarnin tsë wawqi ruranqanta Jehovä entiendinqanta y llakipanqanta. Peru Jehovä Diosnintsikqa manam permitintsu sirweqninkuna tsënö jutsata rurayänantaqa. Tsë wawqi ruranqanta musyarqa, wakin nunakunaqa capazchi congregacionpaq mana allita parlayarqan. O capazchi wakin cristiänukuna tsë wawqi ruranqanta rurar qallëkuyanman karqan. Peru ¿imata rurayänampaqtan apostol Pablu nirqan Corintu cristiänukunata?

5. ¿Imata rurayänampaqtan Corintu cristiänukunata Pablu nirqan, y imanirtan tsënö nirqan? (1 Corintius 5:13; rikäri dibüjuta).

⁵ (Leyi 1 Corintius 5:13).a Santu espïritu yanapaptinmi, apostol Pabluqa Corintu cristiänukunata nirqan tsë mana arrepentikoq cristiänuta congregacionpita rakiyänampaq. Peru rakirirqa, ¿imanöraq tsë cristiänuta tratayanman karqan? Pabluqa nirqan ni mikuyanqan hörallapis tsë nunawan mana juntakäyänampaqmi (1 Cor. 5:11). Musyanqantsiknöpis, piwampis juntu mikurqa, parlakurmi qallëkuntsik. Tsëmi apostol Pabluqa cristiänukunata nirqan tsë cristiänuwan imanöpapis mana juntakäyänampaq. Tsëta rurarmi cuidakuyänan karqan tsë cristiänu ruranqan jutsaman mana ishkiyänampaq (1 Cor. 5:5-7). Tsënöllam mana juntakäyanqanqa jutsa ruraqta yanapanman karqan Jehoväta llakitsishqa kanqanta cuentata qokunampaq, ruranqankunapita penqakunampaq y arrepentikunampaq.

6. Pablu cartakunqanqa, ¿imanötan yanaparqan Corintu congregacionchö cristiänukunata y jutsa ruraq cristiänuta?

⁶ Corintu cristiänukunaman cartakurirqa, cäsukuyänampaq o mana cäsukuyänampaq kaqman pensarmi Pabluqa yarpachakur qallëkurqan. Peru ichik tiempullachömi Tïtu willarqan ninqankunata cäsukushqa kayanqanta y ninqannölla rurëkäyanqanta (2 Cor. 7:6, 7). Tsënöllam Pabluqa musyarirqan, cartata apatsinqampita juk tiempu pasariptin tsë jutsa ruraq cristiänu arrepentikushqa kanqanta. Correginqanta cäsukurmi jutsa rurëta dejashqana kanaq y Jehovä munanqannönam kawakuykänaq (2 Cor. 7:8-11). Peru arrepentikushqana këkaptinqa, ¿imataraq cristiänukunaqa rurayanman karqan? ¿Imata rurayänampaqtan apostol Pablu nirqan?

¿IMANÖTAN ARREPENTIKOQ CRISTIÄNUTA TRATAYÄNAN KARQAN?

7. ¿Imanötan jutsata ruraq cristiänuta yanaparqan congregacionpita rakiyanqan? (2 Corintius 2:5-8).

⁷ (Leyi 2 Corintius 2:5-8). Apostol Pablum kënö nirqan: “Tsë nunataqa allinam cäsi llapëki corregiyarqunki”. Tsënö nirqa nikarqan, corregiyanqanta chaskikurnin tsë jutsa ruraq cristiänu arrepentikushqana kanqantam (Heb. 12:11).

8. ¿Ima nirqantan apostol Pablu Corintu congregacionchö wawqi panikunata?

⁸ Tsëpitanam apostol Pabluqa tsë arrepentikoq cristiänuta imanö tratayänampaq wawqi panikunata kënö nirqan: “Llakipar[mi] perdonëkuyänëki y shoqayänëki”. Tsëpitanam kënö nirqan: “Tsëmi consejayaq kuyayanqëkita cläru musyatsiyänëkipaq”. Pabluqa manam congregacionman chaskiyänanllatatsu munarqan, sinöqa parlakuyninkunawan y rurayanqankunawan rasumpa perdonashqa kayanqanta y kuyayanqanta rikätsiyänantam. Tsënöpam arrepentikoq cristiänuqa cuentata qokunman karqan congregacionman kutinqampita wawqi panikuna kushikuyanqanta.

9. ¿Wakin cristiänukunapaqqa fäciltsuraq karqan tsë arrepentikoq wawqita perdonayänan?

⁹ Wakin cristiänukunapaqqa, ¿fäciltsuraq karqan tsë arrepentikoq wawqita kushishqa chaskiyänan? Bibliaqa manam tsëta nintsu, peru capazchi wakimpaqqa fäciltsu karqan. Tsë jutsata ruraq wawqiqa congregaciontam mana allichö quedatsishqa karqan y capazchi wawqi panikunatapis ruranqanwan ofendishqa karqan. Tsëqa capazchi wakin cristiänukunaqa kënö pensayarqan: “Noqaqa mana fäcil kaptimpis, Jehoväta cäsukunärëkurmi imëkata rurarqö. Peru kë wawqiqa, jutsata ruranqampita arrepentikurir fäcil-lla kutiramun y congregacionchöqa kushishqa chaskiriyan. Tsëtaqa manam merecintsu” (igualaratsi Lücas 15:28-30 textutawan). Peru ¿imanirtan wawqi panikunaqa tsë arrepentikoq wawqita kushishqa chaskiyänan karqan?

10, 11. ¿Imaraq pasakunman karqan tsë arrepentikoq cristiänuta anciänukuna mana perdonayaptin?

¹⁰ ¿Imaraq pasakunman karqan tsë arrepentikoq cristiänuta congregacionman kutimunanta anciänukuna mana permitiyaptin o cristiänukuna kushishqa mana chaskiyaptinqa? Tsë arrepentikoq cristiänuqa alläpa llakikurmi yarpachakunman karqan. Capaz pensanman karqan imapaqpis mana välinqanta y Diospa amïgun këtapis manana merecinqanta.

¹¹ Y manam tsëllatsu. Tsë arrepentikoq cristiänuta kushishqa mana chaskirqa, Corintu cristiänukunaqa Jehoväpa amïgun këtam perdiriyanman karqan. ¿Imanirtan tsënö nintsik? Tsë cristiänuta Jehovänö mana perdonar y kushishqa mana chaskirqa, Satanasnömi mana perdonakoq y mana llakipäkoq kayanman karqan. Y tsëtam Satanasqa utilizanman karqan tsë wawqita Diosnintsikpita chipyëpa rakirinampaq (2 Cor. 2:10, 11; Efes. 4:27).

12. ¿Imata rurartan Corintu congregacionchö cristiänukunaqa Jehovänö kayanqanta rikätsikuyanman karqan?

¹² Tsëqa, ¿imanötan Corintu congregacionchö cristiänukunaqa Satanasnö kayänampa rantin, Jehovänö kayanqanta rikätsikuyanman karqan? Tsë arrepentikoq cristiänuta Jehovänö perdonarninmi. Rikärishun Bibliata wakin qellqaqkuna Jehoväpaq imata niyanqanta. Davidmi kënö nirqan: “Teytallä Jehovä, alli kaptiki y perdonakoq kaptikim mañakamü” (Sal. 86:5). Miquëasnam kënö nirqan: “Teyta Dios, qamqa quedaq israelïtakunatam jutsata rurayanqampita perdonarqunki y pantayanqankunatam qonqëkurqunki, ¿piraq qamnö kanman?” (Miq. 7:18). Y Isaïasnam kënö nirqan: “Mana allita ruraq nuna imanö kawanqanta dejatsun, y mana alli kaq nuna ama mana allikunaman pensatsunnatsu. Tsëpa rantinqa Teyta Jehoväman kutiyätsun, y pëqa pëkunata llakipanqam. Awmi, Teyta Diosninkunaman kutiyätsun y pëqa imëkata rurayanqampitam perdonanqa” (Is. 55:7).

13. ¿Imanirtan arrepentikoq cristiänuta congregacionman chaskiyanqanqa alli karqan? (Leyiri “¿Imëtan jutsata ruraq cristiänu congregacionman kutirqan?” neq recuadruta).

¹³ Corintu congregacionchö cristiänukunaqa Jehovänö kayanqanta rikätsikuyanman karqan, arrepentikoq wawqita kushishqa chaskirninmi y kuyayanqanta rikätsirninmi. Tsënö rurarqa, apostol Pablu ninqannömi “llapanchö cäsukoq” kayanman karqan (2 Cor. 2:9). Tsë cristiänuta congregacionpita rakiyanqampita pöcu tiempullaraq pasashqa kaptimpis, tsë cristiänuqa Pablu correginqanta chaskikurmi arrepentikushqana karqan. Arrepentikushqana këkaptin congregacionman kutimunanta mana permitiyaptinqa manam allinatsu kanman karqan.

DIOSNINTSIKQA JUSTICIATA RURAQ Y LLAKIPÄKOQMI

14, 15. ¿Imatataq yachakuntsik Corintu congregacionchö alläpa jutsata ruraq cristiänuta imanö tratayanqampita? (2 Pëdru 3:9; rikäri fötuta).

¹⁴ Jehovä Diosnintsikqa Corintu congregacionchö pasakunqanta Palabranman qellqatsirqan “noqantsik yachakunapaqmi” (Rom. 15:4). ¿Imatataq entiendintsik tsë pasakunqanwan? Alläpa jutsata ruraqkunataqa sirweqnin kayänanta Jehovä mana permitinqantam. Wakinkunaqa capazchi pensayanman jutsata ruraq mana arrepentikuptimpis, Diosnintsikqa llakipäkoq karnin sirwir sïguinanta permitinqanta. Peru manam tsënötsu. Jehovä Diosnintsikqa llakipäkoq karnimpis, manam jutsa ruraqkunataqa rikaräkuntsu ni manam leyninkunatapis mana kaqpaqqa churantsu (Jüd. 4). Mana arrepentikoqkunata sirweqnin kayänanta permitirqa, Jehoväqa manachi rasumpa llakipäkoqtsu kanman y wakin sirweqninkunatapis peligrumanchi churanman (Prov. 13:20; 1 Cor. 15:33).

¹⁵ Tsënöllam Corintu congregacionchö pasakunqanwan entiendintsik, jutsa ruraq cristiänu ushakänanta Jehovä mana munanqanta. Pëqa munan, jutsata ruraqkuna salvakuyänantam. Arrepentikuyaptin y jutsa rurëta dejayaptinqa llakipanmi y amïgun kayänantam permitin (Ezeq. 33:11; leyi 2 Pëdru 3:9). Tsëmi Corintu congregacionchö tsë wawqi arrepentikuriptin y jutsa rurëta dejariptinqa, Jehovä mandaptin apostol Pabluqa nirqan tsë wawqita perdonayänampaq y kushishqa chaskiyänampaq.

16. Corintu congregacionchö jutsata ruraq cristiänuta Jehovä imanö tratanqanta musyar, ¿imanötan sientikunki?

¹⁶ Corintu congregacionchö pasakunqanta yachakurirmi cläru entiendirintsik, Jehovä Diosnintsikqa kuyakoq, justiciata ruraq y alli kaqta ruraq kanqanta (Sal. 33:5). Diosnintsik tsënö kanqanta musyarqa masmi sirwita munantsik. Rasumpa kaqchöqa, llapantsikmi jutsasapa kantsik y imëka mana allikunata rurantsik y perdonamänatam wanantsik. Tsëmi alläpa agradecikuntsik perdonamänapaq Tsurin wanunanta permitinqampita, kuyamanqantsikpita y imëyaqpis kushishqa kawakunata munanqampita.

17. ¿Imatataq qateqninchö yachakushun?

¹⁷ Y kanan witsan juk cristiänu alläpa jutsata rurariptinqa, ¿imanötan anciänukuna Jehovänö kuyakoq kayanqanta rikätsikuyanman y imanötan arrepentikunampaq yanapayanman? Y ¿imatataq rurashwan jutsa ruraqta congregacionpita anciänukuna rakiriyaptin o congregacionman kutimunanta permitiyaptin? Tsëtam qateqninchö yachakurishun.