“Jehoväpa testïgunkunaqa, ¿imanirtan Señorpa Cënanta juk religionkunachönötsu rurayan?”

Noqakunaqa Jesus Wanunqanta Yarpäna reuniontaqa o ‘Señorpa Cënantaqa’ Bibliachö ninqannöllam rurayä (1 Corintius 11:20). Peru wakin religionkunachöqa, manam Bibliachö ninqannötsu rurayan, pëkunaqa creenciankunamannö y costumbrinkunamannömi Jesus Wanunqanta Yarpäna reunionta jukläya rurayan.

¿Imanirtan Jesus wanunqanta yarpäyan?

Señorpa Cënantaqa yarpäyä noqantsikrëkur Jesus wanunqanta y ruranqampita agradecikurmi (Mateu 20:28; 1 Corintius 11:24). Y manam Diospita imatapis chaskita munartsu y jutsapita perdonashqa këta munartsu.a Bibliachöqa nin, Diosnintsikqa jutsantsikpita perdonamantsik Jesusman markäkoq o yärakoq kanqantsikpitam, y manam religiösukuna rurayanqampitatsu (Romänus 3:25; 1 Juan 2:1, 2).

¿Watachö atska kutiku yarpäyan?

Jesusqa wanunqanta yarpäyänampaqmi qateqninkunata mandarqan, peru manam watachö atska kuti rurayänampaq kaqtaqa nirqantsu (Lücas 22:19). Wakin nunakunaqa pensayan, Jesus wanunqan reuniontaqa cada killa, cada semäna, cada junaq, junaqchö atska kuti rurëta puëdiyanqantam o kikinkuna ëka kuti rurayänampaqpis decidiyänampaq kaqtam. Tsënö pensayaptimpis këkunatam cuentachö katsinantsik:

Jesusqa Pascua Fiesta junaqmi, Señorpa Cënanta patsätsirqan, tsëpita hörakuna pasariptinmi wanukurqan (Mateu 26:1, 2). Bibliachöqa nin, Pascua Fiestachö pishtayanqan orqu üshawan, Jesus wanunqan igualanqantam (1 Corintius 5:7, 8). Watachö juk kutillam Pascua Fiestataqa rurayaq (Exodu 12:1-6; Levïticu 23:5). Punta cristiänukunaqa Jesus Wanunqanta Yarpäna reuniontaqa watachö juk kutillam yarpäyaq, tsënöllam Jehoväpa testïgunkunapis, Bibliachö ninqannölla, watachö juk kutilla yarpäyan.b

¿Imëtan y imë höratan yarpäyan?

Jesusqa manam wanunqanta, watachö ëka kuti yarpänallapaqtsu patsätsirqan, sinöqa imë y imë höra yarpänapaq kaqtam. Pëqa hebreukunapa calendariunchö, 33 wata 14 de nisan Inti o Rupay jeqarkuptin yarpänapaqmi patsätsirqan (Mateu 26:18-20, 26). Punta cristiänukunanöllam kanan witsampis, Jehoväpa testïgunkunaqa Jesus Wanunqanta Yarpäna reunionta cada wata tsë fëchallachö rurayan.c

33 wata 14 de nisanqa tsë kutichöqa, viernis junaqmi karqan, peru manam cada wata tsë junaqllatsu ratan. 14 de nisan imë junaq kanampaq kaqtaqa, Jesus kawanqan tiempuchö fëchata yupayanqannöllam Jehoväpa testïgunkunaqa yupayan y manam kanan witsan judïukuna calendariunkunachö patsätsiyanqannötsu.d

Tantawan vïnu

Wanunqanta yarpäyänampaq patsätsirmi Jesusqa, Pascua Fiestachö sobranqan levadürannaq tantata y vïnuta utilizarqan (Mateu 26:26-28). Tsëmi Jehoväpa testïgunkunaqa harinawan y yakullawan rurashqa tantata utilizäyan. Tsënöllam vïnu tintuta utilizarnimpis ni azucarnin, licornin ni ima pukutaq o mushkoq plantakunatapis yapayantsu.

Wakin religionkunachöqa, levadürayoq tantatam utilizäyan. Peru Bibliachöqa levadürataqa atska kutim jutsawan y imëka mana alli rurëkunawan igualatsin (Lücas 12:1; 1 Corintius 5:6-8; Gälatas 5:7-9). Tsëmi harinawan y yakullawan rurashqa tantaqa, Cristupa jutsannaq cuerpunta rikätsikun (1 Pëdru 2:22). Wakin religionkunachöqa vïnupa rantinmi, üvasta qaptsirirlla utilizäyan. Tsëtaqa rurayan alcoholta upuyänanta prohibirmi, peru Bibliachöqa manam tsëta nintsu (1 Timoteu 5:23).

Tantaqa Jesuspa cuerpuntam y vïnunam yawarninta rikätsikun

Levadürannaq tantawan vïnu tintuqa Jesus Wanunqanta Yarpänapaq reunionchöqa, Jesuspa cuerpuntam y yawarnintam rikätsikun. Manam wakinkuna pensayanqannötsu tantawan vïnuqa Jesuspa cuerpun ni yawarnin tikran. Y manam cuerpunwan ni yawarninwampis takukantsu. Rikärishun Bibliachö ima ninqanta:

• Jesusqa yawarninta upuyänampaq kaqta qateqninkunata nirqa, yawar asuntupaq Jehovä mandakunqantachi cäsukunmantsu karqan (Genesis 9:4; Hëchus 15:28, 29). Musyanqantsiknöpis, Jesusqa Diospa leynintam imëpis cäsukoq, tsëqa manachi mandakunmantsu karqan yawarninta upuyänampaq (Juan 8:28, 29).

• Apostolkunaqa manam Jesuspa yawarnintatsu upuyarqan. Tsë paqasmi Jesusqa nirqan yawarninta manaraq jichayanqanta, tsëwanmi rikätsikuykarqan manaraq wanunqanta (Mateu 26:28).

• ‘Imëyaqpis kanampaq juk kutillam’ Jesusqa yawarninta jicharqan (Hebrëus 9:25, 26). Tantawan vïnuqa Jesuspa cuerpunman y yawarninman pensayanqannö tikraptinqa, Señorpa Cënanta cada wata yarparchi y Jesus yawarninta jichanqantachi kutin kutin rurëkäyanman.

• Jesusqa kënömi nirqan: “Noqata yarpämar këta rurar sïguiyë”, y manam “noqata yarpämar yawarnïta jichanqäta yapë rurayë” nirqantsu (1 Corintius 11:24).

Wakin nunakunaqa pensayan tantawan vïnu Jesuspa cuerpunman y yawarninman tikranqantam. Tsënöqa pensayan Bibliapa wakin traduccionninkunachö wakin textukuna tsënö niptinmi. Këllaman pensari: Jesusqa vïnupaq parlar “ramashqa yawarnïmi” nirqanmi, tsënömi wakin Bibliapa traduccionninkunachö yurin (Mateu 26:28, Teyta Diospa Willakïnin). Tsënö kaptimpis, Jesus ninqantaqa kënöpis traduciyanmanmi: ‘acuerduta välitseq yawarnï’.e Jesusqa atska kutim, igualatsikuykunawan yachatsikurqan (Mateu 13:34, 35).

¿Pikunatan tantata mikuyan y vïnuta upuyan?

¿Imanirtan Jehoväpa testïgunkunaqa Señorpa Cënanta yarparnin, wallkaqlla tantata mikuyan y vïnuta upuyan?

Jehoväqa Jesuspa yawarninwanmi ‘juk mushoq acuerduta’ rurarqan, tsë mushoq acuerduqa Israelwan unë rurayanqan acuerdupa rantinmi karqan (Hebrëus 8:10-13). Tsë mushoq acuerduchö kaqkunam Jesus Wanunqanta Yarpänapaq reunionchöqa tantata mikuyan y vïnuta upuyan. Tsë mushoq acuerduchö kaqkunaqa ciëlupaq ‘qayashqa kaqkunam’ kayan (Hebrëus 9:15; Lücas 22:20). Ciëlupaq akrashqakunaqa cientu cuarenta y cuatru milmi kayan y pëkunaqa Cristuwanmi gobernayämunqa (Lücas 22:28-30; Apocalipsis 5:9, 10; 14:1, 3).

Rikärinqantsiknöpis ciëlupaq ëwaqkunaqa wallkaqllam kayan, peru kë Patsachö kawaqpaq kaqkunaqa yupëta mana puëdipaqmi mëtsikaq kayan (Lücas 12:32; Apocalipsis 7:9, 10). Kë Patsachö kawaqpaq kaqkunaqa, Jesus Wanunqanta Yarpänapaq reunionchö tantata mana mikur ni vïnuta mana upurpis tsë reunionmanqa ëwayanmi. Tsënömi Jesus wanunqampita agradecikuyan (1 Juan 2:2).