Wamayëpaq Tamya kanqampita hasta Egiptopita liberacionyaq

Wamayëpaq Tamyapeqqa puwaq nunakunallash salvakuyänaq, tsëpitanash atska waranqayan mirëkuyänaq. Tsëpitanash Abrahán yurinaq 352 wata wamayëpaq tamya pasashqanchö. Yachakuntsikmi hina Isaac shutiyoq tsurin kanampaq Abrahanta Teyta Dios änenqanta y cumplenqantapis. Tsëpitanash, Isaacpa ishkan tsurinkunapita Teyta Dios akranaq Jacobta.

Atskash kayänaq Jacobpa tsurinkunaqa, 12 kanaq ollqu y warmi tsurinkunapis hina kanaqshi. Pero más joven kaq wawqin Josëtash tsë 10 mayor wawqinkuna chikïkuyänaq, tsëshi Egiptoman rantikïkuyänaq esclavo kanampaq. Tsëpitanash tiempo pasaptin Egiptochö alläpa importante gobernaq nuna tikrarinaq José. Y mallaqë tiempo chëkuptinnash, pruëbaman churanaq José wawqinkunata, imanö kanan kayanqantapis musyëta munar. Por finnash Egiptoman täraq ewkunaq Jacob llapan familianwan. Abrahán yurishqampita 290 wata pasashqanchöraqshi kë llapan pasanaq.

Israelïtakunaqa Egiptochö täräyänaq 215 watash. Pero tsëpitaqa esclävosh tikrariyänaq José wanuriptin. Tsëpitanash tiempowanna Moisés yuririnaq, pëtanash israelïtakunata Egiptopita salvanampaq Teyta Dios inshinaq. Kë ISHKË kaq Parte nishqan willakïkunachöqa total pasanaq 857 watash.