Lotpa warmin qepaman rikärin

CANAÁN markachöshi Lotpa familian tion Abrahanwan täräyänaq. Huk kutish Abrahán Lotta ninaq: ‘Këchöqa manam animalnintsikkunapaq qewallapis kannatsu. Aksëqa këtsu, rakikäkurishun. Qam huk lädopa ëwaptikeqa noqaqa huknin lädopanachi ewkushaq,’ nishpa.

Tsënash Lot rikachakurinaq. Y huk markapa kuchuntash rikärinaq atska yakuyoqta, atska qewayoqta llapan animalninkunapaq. Distrito de Jordanshi kanaq tsë markapa shutenqa. Y tsëmanshi familianta y animalninkunata apakurkur ewkunaq Lot. Tsëpitanash Sodoma markachö wayinkuna rurayänaq.

Alläpa mana allish kayänaq tsë Sodoma markachö täraq nunakunaqa. Y alli nuna kaptinshi Lotta tsë mana allikuna gustanaqtsu. Piñashqash Teyta Diospis këkänaq tsë nunakunawan. Tsëllanash ishkë angelkunawan willatsinaq Teyta Dios Lotta tsë Sodoma y Gomorra markakunata limpu ushakätsinanta.

Hina tsë angelkunash niyänaq Lotta: ‘¡Raslla! ¡Yarqï këpita ishkan tsurikita y warmikita apakurkur!’ nishpa. Pero pëkunaqa alläpash demorëkuyänaq, tsënash tsë markapeq kikin angelkuna makipeq hanchakurkur horqariyänaq. Tsënash huknin kaq ángel ninaq: ‘¡Safakuyë kawënikikunarëkur! Mana qepaman tumamushpa. Ewkuyë montikunaman mana wanuyänëkipaq.’

Lotqa tsurinkunawan wiyakurninmi Sodoma markapita safakuyarqan. Manam qepamampis tumayarqatsu, manam ni ichikllapis shäkuriyarqatsu. Pero warminqa manash wiyakunaqtsu. Shäkurirshi qepaman tumarinaq, Sodömapita ichik karupärishqana këkar. Tsënash kachi rumi tikrarinaq Lotpa warmin. Kë dibüjochö rikëkanqëkinö.

Kë leinqantsikpitam yachakuntsik: Alli wiyakoqkunataqa Teyta Dios salvanqanta y mana wiyakoqkunaqa wanuyanqanta.