Lotpa warminta ima pasanqanta yarpë

Lotqa tiyun Abrahanwanmi Canaan markachö täräyarqan. Peru ishkampa animalninkuna alläpa miraptinmi llapampaqqa tsëchö sitiu karqannatsu. Tsëmi Abrahanqa Lot-ta kënö nirqan: “Juk sitiullachö këtaqa mananam puëdintsiknatsu. Akrakuri mëpa ëwanëkipaq kaqta, y noqaqa juknin kaq lädupam ëwakushaq”. Abrahanqa alläpa alli nunam karqan.

Lotqa atska yakuyoq y verdirëkaq juk alläpa shumaq sitiutam rikarqan, y tsë sitiutam akrarqan familianwan tsëchö täräyänampaq, tsë sitiuqa Sodöma markapa amänunchömi karqan.

Sodömachö y Gomörrachöqa alläpa mana allikunatam nunakuna rurayaq, tsëmi Jehoväqa ushakätsinampaq decidirqan. Peru Lot-tawan familiantaqa salvëtam munarqan, tsëmi ishkë angelkunata mandarqan kënö niyänampaq: “¡Kë markapita ras ëwakuyë! ¡Teyta Jehovämi kë markata ushakätsinqa!”.

Peru Lotqa manam jinan höratsu yarqurqan. Tsëmi angelkunaqa pëta, warminta y ishkan warmi wamrankunata makipita tsarirkur tsë markapita apakuyarqan. Y kënömi niyarqan: “¡Salvakuyänëkipaq cörripa ëwakuyë! ¡Ama qepamanqa rikäyëtsu, qepaman rikarqa wanuyankim!”.

Zoar markaman chäriyanqanllachömi Jehoväqa Sodömaman y Gomörraman ninata y azufrita tamyatsirqan. Tsë ishkan markakunaqa pasëpam ushakäyarqan. Y Lotpa warminqa Jehoväta mana cäsukur qepaman rikanqampitam kachi rumiman tikrarirqan. Peru Lotwan warmi wamrankunaqa cäsukoq karmi salvakuyarqan. Lotpa warmin mana cäsukunqampitaqa alläpa llakishqachi sientikuyarqan, peru tsënö kaptimpis, pëkunaqa Jehoväta cäsukushqa karmi alli sientikuyarqan.