Rawraq monti

ÜSHANKUNAPAQ pasto asheqshi Moisesqa shamushqa kanaq Horeb nishqan hirkayaq. Tsëchönash rikärinaq rawrëkaq montita, ¡pero manash rupanaqtsu tsë montiqa!

‘¡Imanöraq këqa!’ ‘Mejorqa ëwä alleq rikäramushaq,’ nishpash pensarinaq Moisés. Y más witir qallëkuptinnash, ‘ama masqa witimïnatsu. Santo patsachömi këkanki, llanqikita qotuki,’ neqtash wiyarinaq tsë rawrëkaq montipita patsë. Huk angeltash inshikänaq Teyta Dios montipita patsë parlapänampaq, tsëshi qaqllanta Moisés tsapakurkunaq.

‘Egiptochö nunäkuna sufreqtam rikarqö. Tsëpita horqamunëkipaqmi kachakushqëki, librashaqmi,’ ninaqshi Teyta Dios. Jehoväqa Canaán shumaq nacionmanshi apanan kanaq markanta.

‘¿Pitaq noqaqa kä? ¿Imanöraq këtaqa ruräman? Y ëwaptëqa: “¿Pitaq kachamushorqonki?,” niyämanqachi, ¿imaraq tsëqa nishaq?,’ nishpash ninaq Moisés.

‘Këtam ninki,’ nishpash yaskirinaq Teyta Dios. ‘“JEHOVÁ Abrahanpa Diosnin, Isaacpa Diosnin y Jacobpa Diosninmi qamkunaman kachamashqa.”’ ‘Y këmi wiñeypaq shutï,’ nishpash yaparinaq Teyta Dios.

‘Pero ¿qam kachamanqëkita mana creiyämaptenqa?,’ nishpash Moisés yaskirinaq.

‘¿Imatataq tsararëkanki?,’ nishpash tapurinaq Teyta Dios.

‘Huk shukshutam,’ nishpash yaskirinaq Moisés.

‘Patsaman churarïki,’ ninaqshi Teyta Dios. Tsënash huk culebraman tikrarinaq Moisespa shukshun. Hina ninaqshi, ‘makikita ratashniki rurimpa yakarïki.’ Tsënö rurariptinshi, ¡rajunö yulaq këkänaq makinqa horqaramuptin!, leprawan qeshyaqnöshi tikrarishqa kanaq. Hina kima kaq milagrota ruranampaqshi Jehová podernin qonaq Moisesta. ‘Israelïtakuna noqa kachanqaqta creiyänampaqmi kë milagrokunaqa,’ nishpash ninaq Jehová.

Tsënash, Moisesqa wayinman kutirïkur suegron Jetrota ninaq: ‘Aksëqa këtsu, haqiramë Egiptoman kutir imanöpis kastäkuna këkäyanqanta rikäramunäpaq,’ nishpa. Tsëshi Jetroqa, allim kanqa ëwë ninaq, tsënash Moisesqa tsë hora ewkunaq Egiptota.