Rawrëkaq o lunyëkaq kasha

Moisesqa 40 watapam Madianchö tärarqan, tsëchömi casakurqan y wamrayoq tikrarqan. Juk kutim Sinaï jirkachö mitsikuykar alläpa rawrëkaq o lunyëkaq kashata rikarqan, peru tsë kashaqa manam ruparqantsu. Tsëmi maslla rikänampaq witikarnin nina rurimpita kënö neqta wiyarqan: ¡Moises! “Këkanqëki sitiuqa alläpa sagrädum, llanqikita jipikuy y ama masqa witimuynatsu”. Jehovämi juk angelninwan parlaparqan.

Tsënam Moisesqa mantsakarnin cäranta tsapakurkurqan. Y kënö neqtam wiyarqan: “Israelïtakuna alläpa sufriyanqantam rikarqö y egipciu nunakunapa makimpitam librashaq y juk alli sitiumanmi pushashaq. Qammi sirwimaqnï israelïtakunata Egiptupita pushamunki”. Tsëta wiyarnin, ¿imanöraq Moises sientikurqan?

Moisesqa kënömi tapurqan: “¿Ima nishaqtan pitan mandamushurqunki niyämaptinqa?”. Diosnam kënö nirqan: “‘Abrahanpa, Isaacpa y Jacobpa Diosnin Jehovämi mandamashqa’ ninëkim”. Moisesnam nirqan, “y mana cäsuyämaptinqa, ¿imataraq rurashaq?”. Tsënam Jehoväqa yanapanampaq kaqman confiakunanta munar juk milagruta rurarqan. Tukrunta patsaman jitarinampaqmi nirqan, y jitarkuptinnam ¡culebraman tikrarirqan! Tsëpitanam, chupampita Moises tsarirkuptin tukruman yapë tikrarirqan. Tsënam Jehoväqa kënö nirqan: “Tsëta ruraptikim pëkunaqa cuentata qokuyanqa noqa yuripunqaqta”.

Peru Moisesqa kënömi nirqan: “Teyta Jehovä, noqalläqa manam shumaq parlëta yachätsu”. Tsënam Jehoväqa kënö nirqan: “Noqam nishqëki imata parlanëkipaq kaqta. Y wawqiki Aarontam yanapashunëkipaq nishaq”. Tsënam Moisesqa, Jehovä yanapanampaq kaqta cläru rikärirnin warminta y wamrankunata pusharkur Egiptupa ëwakurqan.