Jordán mayuta tsimpayan

¡RIKË! ¡Jordán mayuta tsimparëkäyan israelïtakuna! Pero ¿mëchötaq yakuqa këkan? Manaraq pasayaptenqa atskash yaku këkänaq, tsë tiempoqa alläpash tamyëkunaq. ¡Pero kananqa llapan yakush tsakirishqa! ¡Puka lamarta pasayanqannömi, tsimparëkäyan tsaki patsapa israelïtakunaqa! ¿Mëtaraq ewkushqa tsëtsika yaku? Mä rikärishun.

Jordán mayuta israelïtakuna tsimpayänan tiempo chäriptinshi, ‘nöpantsiktam arca del pacto nishqanta katakurkur sacerdötekuna ëwayanqa. Jordán mayuman chakinkunata yëkaratsiyaptinnam yaku tsakirenqa,’ nishpash nitsinaq Jehová israelïtakunata Josuëwan.

Tsëshi nunakuna nöpanta arca del pacto nishqanta katarkur sacerdötekuna apayan. Y Jordán mayuman chärirshi yakuman yëkuriyan sacerdötekuna. ¡Alli ruri këkarpis, sacerdötekuna yëkur qallëkuyaptinshi mayu tsakirinaq! ¡Tsëqa huk milagrosh! Más umaninchöshi Jehová tsapärinaq yakuta mana pasanampaq. ¡Tsakish quedarinaq mayu!

Tsaki mayu chöpimpash pasariyänaq arca del pacto nishqanta kataraq sacerdötekuna. ¿Kë dibüjochö rikëta puëdenkiku? ¡Tsëyaqnash, tsaki patsapa Jordán mayuta tsimpar qallëkuyänaq llapan israelïtakuna!

Llapan tsimpariyaptinnash, Jehová nitsinaq Josuëta 12 kallpayoq nunakunata: ‘Arca del pacto apaq sacerdötekuna mayuchö këkäyanqanyaq kutiyë. Y tsëpita apayämunki 12 rumikunata, ampipa llapëki quedakuyänëki sitioman churayänëkipaq. Tsënöpam, tsë rumikuna ima significanqanta wambrëkikuna tapuyäshuptikeqa, willayanki imanö arca del pacto nishqanta tsimpëkätsiyaptin Jordán mayu tsakirenqanta.’ ¡Y kë milagrotash tsë rumikuna yarpätsiyänan kanaq! Hina Josuëqa tsaki mayuchö sacerdötekuna shäräyanqanmanshi 12 rumita churanaq.

Por finnash, arca del pacto nishqan kataq sacerdötekunata, ‘lloqayämi Jordán mayupita,’ ninaq Josué. Y këta rurariyaptinnash yapë yaku ëwar qallëkunaq.