Jehoväqa Josuëtam akrarqan

Moisesqa israelïtakunatam mëtsika watapana dirigishqa karqan, peru ichikllachönam wanukunan karqan. Tsëmi Jehoväqa kënö nirqan: “Israelïta mayikikunata entreganäpaq kaq markakunataqa karullapitam rikanki, peru manam qamtsu tsë markakunamanqa israelïtakunata yëkatsinki”. Tsënam Moisesqa Jehoväta nirqan israelïtakunata cuidanampaq y diriginampaq juk nunata akranampaq. Y Jehoväqa kënömi nirqan: “Josuëwan parlë y pëta akranqäta willë”.

Moisesqa wanukunanna kaptinmi israelïtakunata willarqan Josuëna Jehovä änikunqan markaman pëkunata pushanampaq kaqta. Y Josuëtanam kënö nirqan: “Ama mantsakëtsu, Jehovämi yanapashunki”. Tsëpita wallka tiempullatam Moisesqa Nëbu nir reqiyanqan jirkaman witsarqan. Y tsë jirkapitam Jehoväqa rikätsirqan Abrahanta, Isaacta y Jacobta äninqan markakunata. Moisesqa 120 watayoq këkarmi wanukurqan.

Jehoväqa kënömi Josuëta nirqan: “Jordan mayuta tsimpë y Canaan markaman yëkuy. Imanömi Moisesta yanaparqä, tsënöllam qamtapis yanapashqëki. Leynïkunatam paqasta junaqta leyinëki, valientim kanëki y manam mantsapakunëkitsu. Ëwë y llapan mandanqaqta rurë”.

Josuëqa ishkë rikapakoqkunatam Jericö markaman mandarqan. Qateqnin yachakunëkipaq kaqchömi Jericöchö ima pasakunqanta yachakunki. Jericöpita kutirirqa, Canaan markaman yëkuyänampaq allina kanqantam tsë rikapakoqkunaqa willakuyarqan. Waränin junaqnam Josuëqa israelïtakunata nirqan carpa wayinkunata alistapakur juntayänampaq. Peru puntataqa Sagrädu Cäjata apaq sacerdötikunatam nirqan Jordan mayuman yëkuyänampaq. Tsë mayuqa juntam ëwëkarqan, peru sacerdötikuna chëkur yakuman yëkuriyaptinllam janapita shamoq yakuqa tsapakärirqan. Tsënam sacerdötikunaqa tsaki patsapa tsimpar qallëkuyarqan. Y llapan israelïtakuna tsimpayanqanyaqmi, mayupa chowpinchö tsaki patsachö shëkar quedariyarqan. Tsë milagruta rikëkurqa, ¿yarpäriyarqantsuraq Puka lamarchö Jehovä salvanqanta?

Mëtsika wata tsunyaq sitiuchö karirmi israelïtakunaqa Jehovä änikunqan markaman yëkuriyarqan. Yëkurirqa puëdiyarqannam wayinkuna y markankuna rurëta, murukuyta, üvaskuna plantëta y huertankunata rurëtapis. Tsë sitiukunachöqa lichipis y mielpis mëtsikam kaq.