Jehosafat Jehoväman markäkun

¿MUSYANKIKU pikunaraq kayan kë nunakuna, y imataraq rurëkäyan? Peleaqshi ëwëkäyan, y cantëkäyanshi puntata ëwëkaq nunakunaqa. Itsa tapukunkiman: ‘¿Imanir-raq cantar ëwëkaqkunapaqa mana lanzankuna ni espädankuna peleayänampaq kayäpuntsu?’ Mä rikärishun.

Jehosafatqa Israelchö ishkë kastakunata gobernaq reyshi. Nortechö chunka kastakunata rey Acab y Jezabel gobernëkäyanqan witsanchöshi kawanaq. Pero alli reyshi Jehosafatqa, y papänin Asá nishqampis alli reyshi kanaq. Tsëshi surchö ishkë kastakuna atska wata alläpa shumaq kushishqa kawakuyänaq.

Kanannash, ‘Moab, Amón y monte Seír nishqan nacionkunapitam alläpa atska soldädokuna shamïkuyan qamkunawan peleaq,’ nishpa willakoqkuna Jehosafatta willariyänaq. Tsënash nunakunaqa alläpa mantsakëkuyänaq. Tsëshi Jehová yanapanampaq mañakoq ëllukäriyan atskaq israelïtakuna Jerusalenman. Ëwayan templomanshi, y tsëchönash, ‘Teyta Jehová Dioslläkuna, manam ni ima rurëtapis musyayätsu kë atska soldädokunawanqa, manam ni ima rurëtapis puëdeyätsu. Qam yanapëkalläyämë,’ nishpash mañakunaq rey Jehosafat.

Tsëpitanash mañakïninta Jehová wiyarinaq, tsënash huk sirveqnintawan markanta willaratsinaq: ‘Peleaqa Teyta Diospam manam qamkunapatsu, y manam peleayankitsu rikaräyëlla tsënöpam musyayanki imanö Jehová salvayäshonqëkitapis,’ nishpa.

Tsënöpash waräninllana: ‘¡Jehoväman markäkuyë!,’ nishpa ninaq rey Jehosafat llapan nunakunata. Tsëshi soldädonkunapa puntanta ëwayänampaq churarinaq cantaqkunata, këkunanash ëwayaq puntanta Jehoväpaq alabanzata cantarnin. ¿Imaraq pasan peleayänampaq chëkäyaptin, musyankiku? Llapan chikeqninkuna kikinkunapura wanutsinakïkuyänampaqshi Jehová permitïkunaq. ¡Y israelïtakuna chäriyänampaqnash, llapan chikeqnin soldädokuna wanushqa këkäyänaq!

Jehoväman markäkurshi allita ruranaq Jehosafatqa. Noqantsikpis Jehosafatnö Jehoväman markäkorqa alli ruraqmi kantsik.