Jehovämi Jehosafat-ta yanaparqan

Jehosafatqa Judäpa gobernantinmi karqan, y santukunata y Baal niyanqan santupa altarninkunatam Judächö ushakätsirqan. Jehoväpa leyninkunata llapankuna musyayänantam pëqa munarqan. Tsëmi dirigentikunata y levïtakunata mandarqan entëru Judächö Jehoväpa leyninkunata yachatsikuyänampaq.

Amänun nacionkunaqa mantsayaqmi judïukunawan guërrata rurëta, tsë nacionkunaqa musyayaqmi Jehoväqa markanta yanapanqanta. Y gobernanti Jehosafatpaqpis qarëninmi apayaq. Peru juk kutiqa Moabchö, Ammonchö y Seir markakunachö täraq nunakunam judïukunawan pelyaq ëwayarqan. Tsëmi Jehosafatqa mantsakarnin Jehovä Diosman yanapanampaq rogakurqan. Y Judächö llapan nunakunatapis ayunayänampaqmi mandarqan. Y puntankunachömi kënö mañakurqan: “Jehovä, qam mana yanapayämaptikiqa manam vencita puëdiyäshaqtsu. Imata rurayänäpaq kaqta niyämänëkipaqmi rogakuyaq”.

Tsënam Jehoväqa kënö contestarqan: “Ama mantsakäyëtsu ni llakikuyëtsu. Kë pelyachöqa noqa Diosnikikunam pelyamushaq, manam qamkunatsu”. Y, ¿imanötan salvarqan?

Waränin junaqqa tempränulla shärikurirmi Jehosafatqa cantaqkunata akrarqan y soldädunkunapa puntanta ëwayänampaq nirqan. Tsënömi pelyayänan sitiuman ëwayarqan. Tsë sitiupa jutinqa Tecöam karqan.

Kushishqa cantar qallëkuyanqan höram Jehovä Diosqa Judäta atacayänampaq ëwashqa nunakunata pantatsir usharqan. Tsëmi Ammon nunakuna y Moab nunakunaqa kikinkunapura pelyar qallëkuyarqan, y llapanmi wanuyarqan. Tsënömi Jehoväqa Judä nunakunata, soldädukunata y sacerdötikunata salvarqan. Mëtsë nacionchömi tsëta musyariyarqan, y markanta Jehovä salvar sïguinqantam cuentata qokuyarqan. Këchö yachakunqantsiknöpis Jehoväqa tukuynöpam markanta salvan. Pëqa manam wanantsu pipis yanapananta.