Joven Jesús këkan templochö

MAYOR nunakunawan parlëkaq jöventa rikë. Jerusalén Teyta Diospa templonchö yachatsikoq nunakunash kayan pëkunaqa. Y Jesusshi tsë jövenqa. Hatunyärishqanash, 12 watayoqnash këkan.

Hina Teyta Diospita y Bibliapita Jesús alli yachëkuptinshi mantsakashqa rikarëkäyan tsë templochö yachatsikoq nunakuna. Pero ¿imanir-raq Marïawan Josëqa tsëchötsu këkäyan? ¿Mëchöraq këkäyan? Mä rikärishun.

Cada watash Josëqa Jerusalenman familianta pushaq Pascua fiestachö kayänampaq. Alläpa karush Nazaretpita Jerusalenyaq ëwananqa. Tsë witsanchöqa manash ni pipa cärron kanaqtsu, y manash kanaqtsu trenkunapis. Chakillapash puriyaq, tsëshi José familianwanqa Jerusalenman kima hunaqnöraq chäyänaq.

Tsë witsanchöqa atskanash Josëpa wambrankuna kayänaq. Tsëshi Josëqa, Jesuspa qepanman kaq wawqi-paninkunata rikänan kanaq. Kë watachöshi Josëwan María y wambrankunaqa kutikïkäyänaq Jerusalempita Nazaretman. Tsëshi, ‘markamayïkunawanchi shamïkan Jesusqa,’ niyan pëkunaqa. Tardepa watukarirnash tariyänaqtsu. ¡Manash tariyantsu kastankunachö y amïgonkunachö ashirpis! Tsëshi Jerusalenta kutikuyänaq asheq.

Y tsëchönash, yachatsikoq nunakunata wiyëkuryan tapupëkaqta taririyan. Tsëshi alläpa yachëkuptin nunakuna mantsakäyänaq. Tsënash: ‘Wawa, ¿imanirtaq kënöqa rurëkayämarqonki? Alläpa llakishqam papänikiwan ashikäyarqoq,’ nishpash ninaq María.

Tsënash, ‘¿imanirtaq ashikëkäyämarqonkiqa?’ ‘¿Manaku Papänïpa wayinchö këkänata musyayanki?,’ nishpa yaskirinaq Jesusqa.

Ashi, mëchöshi Teyta Diospita yachakuyan, tsëchöshi këta munanaq Jesusqa. Tsënöshi noqantsikpis kanantsik. Nazaretchö cada semana Teyta Diosta adorayänampaq ëllukäyanqanmanshi Jesusqa ëwaq. Pëqa imëpis allish wiyakunaq, tsëshi Bibliapita atskata yachakunaq. Noqantsikpis Jesusnömi kashwan.