Jesus jövin kanqan witsan

Josëwan Marïaqa Nazaretchömi Jesusta y wakin kaq wamrankunata wätayarqan. Josëqa carpintërunö trabajarmi familianta manteneq, y Jehoväpita y Leyninkunapitam yachatseq. Llapankunam Diosta adorayänan wayiman ëwayaq y cada watam Pascua Fiestamampis Jerusalenta ëwayaq.

Jesus döci watayoqna këkaptinmi, imëpis rurayanqannölla Pascua Fiestapaq Jerusalenta ëwayarqan. Pascua Fiesta kaptinmi, Jerusalenman më tsëpita nunakuna ëwayaq. Y Pascua Fiesta ushariptinmi, Josëwan Marïaqa wayinkunata kutikäyarqan, peru cuentata mana qokuyanqanyaqmi Jesusqa Jerusalenchö quedakushqa kanaq. Juntu ëwëkäyanqan grüpuchö këkanqanta pensarmi, juk junaq ëwananta ëwëkar-raq kastankunachö y reqinakushqankunachö ashir qallëkuyarqan.

Mana tarïkurnam Jerusalenman kutir wakchö këchö ashiyarqan. Y kima o kimsa junaqtam, yachatsikoqkunapa chowpinchö pëkunata wiyar y tapupar templuchö këkaqta tariyarqan. Llapan wiyaqninkunam imëkatapis alli entiendinqanta y imanö contestanqanta wiyar alläpa espantakuyarqan. Jehoväpa Leyninkunata alli entiendinqantam cuentata qokuyarqan.

Josëwan Marïaqa mantsakashqam ashikäyarqan. Tsëmi maman Marïaqa kënö nirqan: “Hïju, ¿imanirtan këta rurayämarqunki? Papänikiwan noqaqa alläpa yarpachakurmi wakchö këchö ashiyarqoq”. Y Jesusqa kënömi nirqan: “¿Imanirtan ashikäyämarqunki? ¿Manaku musyayarqëki Teytäpa wayinchö kanäpaq kaqta?”.

Tsëpitanam papäninkunawan Nazaret-ta kutikurqan. Tsëchömi papänin Josëqa carpinteriachö trabajëta yachatsirqan. Tsëqa, ¿imanöraq jövin kar Jesusqa karqan? Jesusqa jatunyarmi sïguirqan y mas yachëyoqmi tikrarqan, Teyta Diospa y nunakunapa rikëninchöpis allim këkarqan.