Nazaretchö Jesus jövinyan

Judëapa uma kaq lädunchö këkaq uchukllan y alläpa mana precisaq Nazaret markachömi Jesusqa winarqan. Tsë sitiuqa Galilëa qochapa inti jeqanan kaq lädu jirkapam këkarqan.

Egiptupita yarqurir Nazaretman teytankunawan täraq ëwayanqan witsanqa Jesusqa ishkë watayoqnöchi karqan. Tsë witsampaqqa, Josëpawan Marïapaqa itsa Jesusllaraq wamrankuna karqan. Peru tsëpitaqa, Santiägu, Josë, Simon y Jüdas jutiyoq wamrankunapis kayäpurqanmi. Jina warmi wamrankunapis kayäpurqanchi. Tsëmi, Jesuspaqa menornin chusku wawqinkuna y itsa ishkë paninkuna kapurqan.

Jesusqa mas kastayoqmi karqan. Yachakunqantsiknöpis, Elisabetwan wamran Juanpis kastankunam kayarqan, pëkunaqa karu Judëachömi täräyaq. Peru, Nazaretpa amänun Galilëachömi Marïapa nanan Salomëqa tärarqan, pëqa Jesuspa tiyanmi karqan. Salomëpa qowanqa Zebedeum karqan y wamrankunanam Santiäguwan Juan, pëkunaqa Jesuspa prïmunkunam kayarqan. Manam musyantsiktsu wamra kayanqan witsan Jesus, Santiägu y Juan ëka tiempu juntu kayanqantaqa, peru tsëpita mas watakunataqa Jesuspa alli amïgunkuna y apostolninkunam kayarqan.

Josëqa carpintërum karqan y wamrankuna atska kaptinmi manteninampaqqa alliraq trabajanan karqan. Tsurintanö wätashqa kaptinmi, Jesustaqa pï mëpis “carpintërupa tsurin” nir reqiyarqan (Mateu 13:55). Winanqanmannömi, Josëqa carpintëru këta Jesusta yachatsirqan y pëqa allim yachakurqan. Tsëmi tiempuwanqa “carpintëru” nir Jesusta reqiyarqan (Marcus 6:3).

Josëwan familianqa Jehoväta adorëtam mas precisaqpaq churayarqan. Diospa Leynin ninqannömi, Josëwan Marïaqa wayinkunachö, nänipa purirnin, patsäkurnin y shärikurnin wamrankunata Jehoväpita yachatsiyarqan (Deuteronomiu 6:6-9). Jina Nazaretchömi Diosta adorayänan juk wayi karqan. Josëqa tsëmanchi familianta imëpis apaq Diosta adorayänampaq. Tsëpita tiempuwanqa, Diosta adorayänan wayiman cada säbadu Jesus ëwanqantam musyantsik (Lücas 4:16). Jina Jesuspa familianqa alläpa kushishqam Jerusalenchö templuman Diosta adoraq ëwayaq, tsëtaqa qateqnin kaq willakïchömi yachakurishun.