Huk punukakïkoq wambra

¡RIKË! ¿Imaraq këchö pasëkan? ¿Patsachö hitarëkaq wambra alläpatsuraq heqakarkamushqa? ¡Rikë, wayipita puntallata yarqëkamoqqa Pablosh! ¿Tsëchö hina rikankiku Timotëota? ¿Tsë wambraqa ventänapitatsuraq heqakarkamushqa?

Awmi, tsëshi pasëkushqa. Kë Troas marka wawqinkunata atska tiempo manana rikänan kaptinshi discursëkänaq Jesuspa qateqninkunapaq Pabloqa. Waräninllanash barcopa ewkunan kanaq, tsëshi pullan paqasyaq parlëkänaq.

Tsënönash punukärinaq ventänachö tëkar kë Eutico shutiyoq jövenqa. ¡Kima pïsotash heqakarkamunaq! Tsëshi selläma mantsakëkuyänaq nunakuna wanurishqachi nishpa këchö rikëkanqëkinö. Y pallarkayämuptinnash rasumpëpa mantsëkäyanqan pasarishqa kanaq. ¡Wanurishqash!

Wanurishqa wambrata Pablo rikärirnash, waqurkur hananman iskakärinaq. Tsënash, ‘¡pëqa allim këkan! Ama yarparäyëtsu,’ nishpa ninaq. ¡Y rasumpëpash! ¡Allish këkan! ¡Huk milagrosh! ¡Pablosh kawariratsimushqa! Tsëshi nunakuna selläma kushïkuyänaq.

Tsënönash mikur qallëkuyänaq yapë lloqarir. Tsëpitanash patsa warëyaq wawqinkunata parlapëkänaq. ¡Pero yapëqa mananash punukänaqnatsu Eutïcoqa! Tsëpitanash barcoman lloqariyänaq Pablowan Timotëoqa wakin yanaqaqninkunawan. ¿Pëkunaqa mëtaraq ewkuyan, musyankiku?

Tsënöshi kima kuti willapäkïninta ushëkänaq Pablo. Kë ëwanqanchöqa kima watash kanaq Éfeso markachö. Tsëshi ishkë kuti ëwanqampitapis kananqa más karu kashqa kanaq.

Troas markapita yarqurir Mileto markachöshi ichik barco pärarinaq. Manash alläpa karuchötsu këkan Éfeso markaqa Milëtopita. Tsëshi más edäyoq Éfeso congregaciompita nunakunata qayatsinaq manaraq paqwë ewkur parlapëkunampaq. Tsënash barco tsëpita yarquriptin, ¡Pablo ewkoqta rikar selläma llakïkuyänaq!

Tsënönash Cesarea markaman barco kutirinaq. Felipe nishqan cristiänopa wayinchö Pablo këkaptinnash, ‘Jerusalenman chäriptinmi carcelman Pablota llawitsiyanqa,’ ninaq huk profeta Ágabo nishqan. Y pë nenqannöshi rasumpëpa llawiratsiyänaq. Tsënöshi Cesarëachö ishkë wata llawiräratsir, Römapa gobernaqnin César nishqan nunaman Römata apëkatsiyänaq juzganampaq. Mä rikärishun imash pasanaq Römata apëkäyaptin.