Familiëkiwan kushishqa kawë
¿Rasumpëpatsuraq familiakuna kushishqa kawayanman?
¿Imanö?
¿Imëllapis familiakunata rikarqunkiku kë tratädochönö kushishqata y huknölla kawakoqta? Hinantin Patsachömi familiakunaqa rakikar ushakäkïkäyan. ¿Imataq tsënö ushakëkatsin? Majampita rakikäyanqan, trabajo mana kanqan y wambrankunata teytakuna o mamakuna hapallankunalla wätayanqanmi. Familiakunapaq estudiaq warmim kënö pësakurqan: “Hinantin Patsachö nunakunam musyayan familiakuna rakikar ushakäyänampaq kaqta”.
¿Imanirtaq familiakuna alläpa hipayan?¿Imanötaq familiantsikwan kushishqa kawakushwan?
¿Pitaq familiakunata kamashqa?
Kë tapukïkunapa respuestanta musyanapaqqa, familiata pï kamanqantapis musyanantsikmi. Familiataqa patsätsishqa Diosnintsikmi, y pëqa musyanmi imakunata rurar alli kawakïta tarinapaq kaqta, tsëmi familiakuna Diospa yachatsikïninta ashiyänan.
Wakin nunakunaqa familiakunata pipis mana kamanqantam creiyan. Tsëmi The Encyclopedia Americana libropis kënö nin: “Wakin estudiösokunaqa familiakuna patsakanqampaq parlarmi, animalkuna juntakäyanqannölla warmiwan ollqupis juntakäyanqanta niyan”. Pero Jesucristuqa willakurqan warmitawan ollquta Diosnintsik kamanqantam. Tsëmi Génesis librochö qellqarëkanqampita kënö nirqan: “Dios juntashqantaqa mana[m] pipis raquinmantsu” (Mateo 19:4-6).
Rasun kaqtam Jesusqa nirqan. Huk yachaq Diosmi punta warmita y ollquta kamarqan, y familianö kushishqa kawakuyänampaqmi llapannin churarqan. Diosnintsik pëkunata casaratsirmi, ollqu kaqta kënö nirqan: “Ollquqa haqirinqa mamanta y teytantam warminwan juntakänampaq. Y ishkankunapis huk ëtsallanam kayanqa” (Génesis 2:22-24). Kanan familiakunaqa tukïta hipayan Diosnintsik Bibliachö qellqatsinqanta mana wiyakurmi, pero ¿manatsuraq más alli kawayanman Diosnintsik ninqanta wiyakurqa?
¿Imataraq rurashwan kushishqa kawakunapaq?
Musyanqantsiknöpis, kë mundoqa yachatsikun kikinkunallapaq imatapis tarïta munayänampaq y wakimpita más alli këta munayänampaqmi. Atska qellëta manejaq nunam Estados Unïdoschö universidadpita yarqoq jövenkunata kënö nirqan: “Kapamanqantsikpita masta munëqa alläpa allim. Mallaqäkoq karpis kushishqam kawakushwan”. Tsëqa manam rasuntsu, qellëta y cösaskunallata alläpa ashïqa manam kushikïta apamuntsu. Këkunallata ashiyanqanqa, familiankunawan kushishqa kawakuyänampaq manam yanapantsu, ni tiemponkuna kantsu y qellëninkunatapis ushayanmi. Pero kanan rikärishun familiantsikwan kushishqa kawakunapaq Proverbios librochö Diosnintsik ima nimanqantsiktapis:
“Más alliqa imëka qorallatapis kuyakïwan mikurinqantsikmi, wäka ëtsata chikinakur mikunqantsikpitaqa”.
“Más alliqa chukru tantallatapis mikur kushishqa kanqantsikmi, fiestakunata rurar pelear kawanqantsikpitaqa.”
Këchö ninqanqa rasun kaqllam. Llapan familiakuna Biblia ninqanta wiyakurqa, imanö shumaqraq kawakuyanman. Bibliam yachatsikun familiachö imanö rikänakuyänampaqpis. Rikärishun wakin wakinllata:
Casado ollqukuna: “Quiquiquicunapa cuerpiquicunata cu[ya]yanqequino warmiquicunatapis cuyayë” (Efesios 5:28-30).
Kë ninqanta rurëqa alläpam precisan. Hina Bibliaqa kënömi casado ollqukunata nin: “Shumaq tratayë warmiquicunata” (1 Pedru 3:7). Tsëpaqqa, warminta shumaqmi rikänan, kuyanan, yachanëpaqmi kanan y kushishqa kawakunampaqmi imëkatapis ruranan. Hina warmin parlapanqantapis wiyananmi y agradecikunanmi (igualaratsi Génesis 21:12). ¿Manatsuraq familiakuna más alli kawakuyanman huk ollqu warminta kikintanö kuyaptinqa? (Mateo 7:12.)
Warmikuna: “Qowequicunata respetacuyë” (Efesios 5:33).
Huk familiachö kushi kushi kawakuyänampaqqa, warmi kaqmi qowanta llapan ruranampaq kaqchö yanapanan. Kënö yanaparqa Diospa munënintam rurëkan, Diosqa, ollquta ‘yanapanampaqmi yanaqin’ rurapurqan (Génesis 2:18). Huk warmiqa qowanta respetanqanta rikätsikun, ninqankunachö y rurayänampaq kaqkunachö yanaparninmi. Tsënö huk warmi kaptinqa, ¿manatsuraq familiachö kushishqa kawakuyanman?
Ollqu kaq y warmi kaq: “Majequicunata respetar llutanta mana rurashpa pellapaq cacuyanqui” (Hebreus 13:4).
Rasunmi, ollqupis warmipis majanllapaq kaptinqa alläpa kushishqam kawakuyanqa. Casado këkar hukwan punukïqa familiakunatam rakikätsin (Proverbios 6:27-29, 32). Tsëmi Bibliachöqa kënö consejamantsik: “Casakushqëki warmiwan kushikï” (Proverbios 5:18-20).
Teytakuna y mamakuna: “Wambrëkikunata yachatsiyë alli nänipa ëwayänampaq” (Proverbios 22:6).
Teytakuna y mamakuna wambrankunata shumaq rikäyaptin y pëkunawan kayänampaq tiempota rakiyaptinqa, familiachö más allim kawakuyan. Tsëmi Bibliachö teytakunata y mamakunata kënö nin: “Wambrëkikunata yachatsiyë wayikichö täkurnin, nänipa purirnin, y pununqëki hora y sharkunqëki hörapis” (Deuteronomio 11:19). Hina Biblia ninqannömi, teytakuna y mamakunaqa wambrankunata kuyarninqa willapäyänan (Efesios 6:4).
Wambrakuna: “Jesucristurecur papäniquitapis y mamäniquitapis cäsucuyë” (Efesios 6:1).
Joven, mana wiyakoqkunapa chowpinchö täraptikim teytëkita y mamëkita wiyakunëkiqa alläpa sasa o aja. Pero ¿manaku familia Kamaqta wiyakunëki alli kanman? Pëqa musyanmi familiachö kushi kushi kawakunapaq imata ruranatapis. Tsëmi, teytëkita y mamëkita wiyakunëkipaq alleq sinchikunëki. Y kë mundopa mana alli rurëninman mana ishkinëkipaqpis kallpachakunëkim (Proverbios 1:10-19).
Familiakuna Biblia ninqanta wiyakuyaptinqa, llapanmi kushishqa kawakuyanqa. Familiëkiqa manam kanan tiempollatsu kushishqa kawakunqa, sinöqa Dios awnikunqan mushoq Patsachöpis más kushishqa kawakïtaran tarinqa (2 Pedru 3:13; Apocalipsis 21:3, 4). Tsëmi, familiëkiwan Bibliapita yachakuyänëkipaq sinchikuyänëki. Hinantin Patsachö atska millón familiakunam, El secreto de la felicidad familiar nishqan libropita yachakur kushishqa kawakuyan.
Kë tratädochö Escrituras Hebreaspita textokunaqa, Traducción del Nuevo Mundo de las Santas Escrituras (con referencias) nishqampitam. Y Escrituras Griegaspita textokunaqa, Teyta Diospa Mushoq Testamentun Bibliapitam.