Lección 8
Dios munanqanno kawaq familia
¿Imataq huk qowaqa familiacho? (1)
¿Imanöraq huk qowa warminta rikanman? (2)
¿Imakunataraq huk teyta ruranman familiampaq? (3)
¿Imatayanraq huk warmi ruranman familiampaq? (4)
¿Imataraq Dios munan teytakunapita, wamrakunapitapis? (5)
¿Imaraq Biblia nin, manana majankunawan täre munaqkunapita?, ¿juezkunaman ewekur rakikepitawan? (6, 7)
1. Huk qowaqa familiampa peqanmi, ninmi Bibliaqa (1 Corintios 11:3). Huk ollquqa, huk warmiyoqllam kanman, civil casashqam kanman (1 Timoteo 3:2; Tito 3:1).
2. Huk qowaqa warminta kuyanman kikinta kuyakonqannömi. Imanomi Jesús nunankunata rikan, tsenomi huk qowaqa warminta rikanman (Efesios 5:25, 28, 29). Manam ni imanopa maqanmantsu, ni mana allipa rikanmantsu. Tsepa rantinqa allapa valeq kaptinmi, shumaqllapam, yachëllapam, respetowan wätanman (Colosenses 3:19; 1 Pedro 3:7).
3. Huk teytaqa alleqmi uryanman familianta wätanampaq. Tsenopa, tsurinkunapis warmimpis mikuyänampaq, ratashninkunapaq, tarayänampaqwan. Hinamampis Diospeqmi alleq yachatsinman familianta (1 Timoteo 5:8). Kikinmi puntata yachakunman, tsepeq familianta yanapanampaq Diosta reqiyänampaq, kë Patsapaq Dios ruramunantawan (Deuteronomio 6:4-9; Efesios 6:4).
4. Warmiqa alli qowan yanapaqmi kanman (Génesis 2:18). Yanapanman qowanta, wamrankunata yachatsirninmi (Proverbios 1:8). Jehovaqa munan, kuyellapa huk warmi familianta rikänantam (Proverbios 31:10, 15, 26, 27; Tito 2:4, 5). Huk warmiqa qowanta respetanman shonqumpita patsemi (Efesios 5:22, 23, 33).
5. Wamrakuna, teytankunata wiyakuyänantam Diosqa munan (Efesios 6:1-3). Diosqa shuyaran teytankuna yachatsiyänanta, piñapar altsayänantam. Teytakunaqa tiempotam tariyanman wamrankunata Bibliapita yachatsiyänampaq, tsenopa espiritualmente alli kayänampaq, llapanchöpis kushishqa kayänampaq (Deuteronomio 11:18, 19; Proverbios 22:6, 15). Manam imepis llutampaqa maqayanmantsu ni piñapäyanmantsu (Colosenses 3:21).
6. Warmi ollqu kikinkunapura liryarlla kawakurnenqa, Bibliapa willapäkinintam rureta tïrayanman. Bibliaqa yachatsimantsik kuyanakitam, perdonanakitam (Colosenses 3:12-14). Diospa Palabranqa manam ichik sasa kawenikikunata altsayänekipaq, rakikaye majekikunawan nimantsiktsu. Quizasmi huk warmi qowanwan täreta munanmannatsu, kekunata huk ollqu ruraptin 1) familianta mana mantenita munaptin, 2) allapa mana alli kaptin, maqarnin saludninta peligroman churaptin 3) allapa chikikurnin, mana imanopapis Jehovata adorananta munaptin (1 Corintios 7:12, 13).
7. Casadokunaqa fielmi kayanman, manam hukta rikäyanmannatsu. Tsemi adulterioqa allapa hutsa Diospa nawimpaq, majampaqpis (Hebreos 13:4). Casado kekar hukwan punitam Bibliachoqa adulterio nin, tsellam razón Bibliachoqa kan, juezkunaman ewekur rakikayänampaq, tseran hukninkaq libre kanqa yape casakunampaq (Mateo 19:6-9; Romanos 7:2, 3). Mana Biblia nenqampita rakikarnin, yape hukwan casakuyaptenqa, Jehovaqa, tseta allapam chikïkun (Malaquías 2:14-16).
[17 kaq päginachö fötukuna]
Diosqa shuyaran teytankuna wamrankunata yachatsiyänantam, piñaparnin altsayänantam
[17 kaq päginachö fötu]
Kuyakoq teytaqa familianta qon llapan necesitanqankunatam, hina Diospa kaqtapis