Lección 14
Imanotaq Jehovapa testigonkunapa uryakïninkuna
¿Imepita patsetaq qallekuyarqan kë tiempocho Jehovapa testigonkuna? (1)
¿Imanöraq, Jehovapa testigonkunapa reunionninkuna? (2)
¿Imanöraq gastonkunata pagakuyan? (3)
¿Pikunaraq puntacho kayan yachatsikurnin congregacioncho? (4)
¿Wata wata ima hatusaq reunionninkunaraq kayäpun? (5)
¿Ima uryakunataraq rurayan principal oficinakunacho y sucursalkunacho? (6)
1. Kë tiempocho Jehovapa testigonkunaqa qallekuyarqan 1870 watapita patsemi. Puntataqa shutinkuna kanaq Biblia Estudiaqkunam, 1931 watapitanam Biblia nenqanno, kananqa shutinkuna Jehovapa testigonkuna (Isaías 43:10). Üneqa Jehovapa testigonkuna kayarqan wallkaqllam, tsepitanam ichikllapayan mirayashqa, kananqa atska millonllepanam kayan Testigokuna, 230 markakunapitapis maschomi willapäkikayan.
2. Llapan congregacionkunachönomi, Jehovapa testigonkunaqa ellukayan semanacho kima kuti. Meqan reunionllamampis ewanekipaqmi pekunaqa invitayashunki (Hebreos 10:24, 25). Tsecho yachatsikuyanqanqa Bibliallapitam. Reunionkunaqa qallan ushan oracionwanmi, llapan reunionkunachomi cantayan “espiritual cantokunata” llapan shonqunkunawan (Efesios 5:18, 19). Manam chaninpaqtsu reunionkunaman yekunanqa, manam qelleta mañayantsu ni pita (Mateo 10:8).
3. Llapan congregacionkunachönomi reunionkunata rurayan, Ellukäyanan Wayikunacho. Ellukäyanan Wayikunaqa sencillo wayikunallam kayan, kikin Testigokuna rurayashqanllam. Manam tse wayikunachoqa kantsu ni santokuna ni crucificokuna. Gastokunapaqqa llapan shonqunkunapita churayanqantam inshiyan. Tsemi ekallawampis yanapakita munarqa, contribución cajakunamanmi churakunantsik (2 Corintios 9:7).
4. Llapan congregacionchomi kayan ancianokuna o superintendentekuna, pekunam puntacho kayan yachatsikicho (1 Timoteo 3:1-7; 5:17). Pekunataqa yanapayan siervo ministerialkunam (1 Timoteo 3:8-10, 12, 13). Pekunaqa manam wakinkuna hanampaqa allitukuyantsu (2 Corintios 1:24). Pekunaqa manam ni ima especial titulota chaskiyantsu (Mateo 23:8-10). Manam wakinkunapita huklayatsu yakakuyan. Manam pagota chaskiyantsu congregacioncho uryayanqampita. Ancianokunaqa kushishqam yanapayan congregacioncho espiritualmente pishipaqkunata. Hina ankuparninmi shoqayan, willapayan sasa kawëninkunacho (Santiago 5:14-16; 1 Pedro 5:2, 3).
5. Wata watam Jehovapa testigonkunapaqqa kayäpun hatusaq asambleankuna. Tse asambleakunachomi ellukayan atska congregacionkuna, Bibliapita shumaq willapäkita wiyayänampaq. Tse asambleakunachoqa hina mushoq discipulokunam bautizakuyan (Mateo 3:13-17; 28:19, 20).
6. Jehovapa testigonkunapa principal oficinankunaqa kekan, Nueva Yorkchomi. Tsechomi kekan Cuerpo Gobernante, pekuna kayan experienciayoq hinantin Patsacho congregacionkuna rikaq ancianokunam. Hinantin Patsachomi sucursalkuna cienpitapis más kayan. Tsecho uryaqkunaqa, yanapakuyan Bibliapita parlaq librokunata, revistakunata rurarmi, tsepitanam congregacionkunaman apatsiyamun. Tsepita patsemi hina rikëkayamun predicacionkunata hinantin Patsacho. ¿Imanirtaq arreglota rurankitsu pekunapa sucursalninta markëkicho watukanekipaq?