¿Imanirtaq Diosta sirweqkunaqa alli churanakushqa kayänan?

1. ¿Imanirtaq israelïtakunata alli churanakushqa kayänampaq Dios yachatsirqan?

Diosqa juk nación kayänampaqmi Abrahanpa tsurinkunata churarqan y atska leykunatam qorqan. Kë naciontaqa Israel nirmi qayarqan, y pëkunam rasumpa kaq adoracionta y Diospa Palabranta imëpis katsir wiyakuyänan karqan (Salmo 147:19, 20). Tsënöpam entero Patsachö nunakuna o runakuna bendicionta chaskiyänan karqan.​—Lei Génesis 22:18.

Diosqa israelïtakunatam akrarqan testïgonkuna kayänampaq. Y leyninkunata wiyakur bendicionkunata chaskiyanqantam musyatsimantsik (Deuteronomio 4:6). Y pëkunawanmi wakin nunakunapis Diospita yachakïta puëdeyarqan.​—Lei Isaías 43:10, 12.

2. ¿Imanirtaq rasumpa kaq cristiänokunaqa alli churanakushqa kayänan?

Israel nación mana cäsokuptinmi, Jehoväqa cristiano congregaciontana akrarqan (Mateo 21:43; 23:37, 38). Tsëmi kanan witsan Jehoväta sirweq cristiänokunaqa testïgonkuna kayan, y manam israelïtakunatsu.​—Lei Hechos 15:14, 17.

Jesusqa discïpulonkunatam mandarqan entero Patsapa yachatsikuyänampaq y tsënöpa nunakuna qateqnin këman chäyänampaq (Mateo 10:7, 11; 24:14; 28:19, 20). Kanan witsanqa tsë precisaq rurë ushakëkannam. Y Jehoväqa atska millón nunakunatam llapan nacionpita juntëkan rasumpa kaq religionchö kayänampaq (Apocalipsis 7:9, 10). Alli churanakushqa karmi rasumpa kaq cristiänokunaqa yanapanakuyan. Jina entero Patsapam reunionninkunachö Bibliapita igual yachakuyan.​—Lei Hebreus 10:24, 25.

3. ¿Imanötaq Jehoväpa testïgonkuna kë tiempochö qallayarqan?

1870 watakunachömi qallayarqan. Bibliata juk grupo estudiaqkunam, Bibliapa qonqakashqa rasumpa yachatsikïninkunata yachakur qallëkuyarqan. Y yachatsikur sïguiyänampaq Jesus nishqantam cuentata qokuriyarqan, tsënöpam Diospa Gobiernompita entero Patsapa yachatsikur qallëkuyarqan. Y 1931 watachönam Jehoväpa testïgonkuna nir jutinkuna churariyarqan.​—Lei Hechos 1:8; 2:1, 4, y 5:42.

4. ¿Imanö churanakushqataq Testïgonkuna këkäyan?

Atska nacionpita punta cristiänokunataqa, alläpam yanaparqan juk grupo cristiänokuna pushaqninkuna kanqan, tsë pushakoqkunaqa Jesustam Mandaqnintanö rikäyarqan (Hechos 16:4, 5). Tsënöllam kanan witsan cristiänokunatapis, Jehoväpa Testïgonkunata Pushaqkuna yanapayan, pëkunaqa unëna Diosta sirweq karmi entero Patsachö sucursalkunata rikäyan. Tsë sucursalkunachömi traduciyan, imprimiyan y joqta pachak idiömakunapitapis maschö publicacionkunata jorqayan. Jina pëkunaqa Bibliawanmi yanapayan pachak waranqapitapis más congregacionkunata, y tsë congregacionkunachöqa anciänokunam Diospa üshan cuenta cristiänokunata shumaq cuidayan.​—Lei 1 Pedru 5:2, 3.

Jehoväpa testïgonkunaqa alli churanakushqa kayan Diospa alli willakïninkunata musyatsikuyänampaq y más nunakunata cristiano këman chätsiyänampaqmi. Apostolkunanöllam wayin wayin yachatsikuyan (Hechos 20:20). Jinamampis, Diospita yachakïta munaqkunataqa Bibliawanmi yachatsiyan. Y manam alli churanakushqallatsu këkäyan, sinöqa juk kastanöllam llapampis kuyanakuyan y Teytan cuidaptinmi kushishqa kawayan (2 Tesalonicenses 1:3). Jehoväpa markan karmi pëllata kushitsita procurayan, nuna mayinkunata yanapayan y tsënöpam Patsachö pipitapis más kushishqa kawayan.​—Lei Salmo 33:12 y Hechos 20:35.