¿Bibliachö alli willakïkunaqa Diospitaku shamun?

1. ¿Pitaq Bibliata qellqatsirqan?

Patsachö mana wanushpa kawanapaq alli willakïqa Bibliachömi këkan (Salmo 37:29). Bibliachöqa 66 librokunam kan y Dios akranqan 40 nunakuna o runakunanömi qellqayarqan. Qallanan kaq pitsqa librokunataqa Moisesmi qellqarqan, y 3.500 watanönam pasarishqa, y ushanan kaq librotanam apóstol Juan qellqarqan, y 1.900 watanönam pasarishqa. ¿Pipa pensënintaq Bibliachöqa këkan? Biblia qellqaqkunataqa santo espïritunwanmi Dios musyatsirqan (2 Samuel 23:2). Pëkunaqa Diospa pensëninllatam qellqayarqan y manam kikinkunapatatsu. Tsëmi Bibliaqa Jehoväpa pensëninlla.​—Lei 2 Timoteu 3:16 y 2 Pedru 1:20, 21.

Rikäri ¿Pitaq Bibliata qellqatsirqan? neq videuta

2. ¿Imanirtaq confiakushwan Biblia ninqanman?

Diospa pensënin kaptinmi. Tsëtaqa alleq musyantsik shamoq tiempopaq claro willakuptinmi, y tsëtaqa nuna manam puëdentsu (Josué 23:14). Llapanta Puëdeq Diosllam cumplita puëden.​—Lei Isaías 42:9 y 46:10.

Tsë libro Diospa këkaptinqa, alläpa precisaqmi noqantsikpaq kanan. Y atska millón Bibliakunatam tukï idiömakunachö më tsëchö katsiyan. Unë libro karpis, cientïficokuna niyanqanwan igualanmi. Jina 40 qellqaqkunapis manam qellqayanqanchö contranakuyantsu.a Jinamampis Diosnintsik kuyakoq kanqantam rikätsikun y kanan witsampis pï mëpa kawënintam altsëkan. Tsëmi atska millón nunakuna cuentata qokuyashqa Bibliaqa Diospa Palabran kanqanta.​—Lei 1 Tesalonicenses 2:13.

Rikäri ¿Imanirtaq Biblia rasumpa kaqta ninqanman markäkushwan? neq videuta

3. ¿Imapitataq Biblia yachatsikun?

Alläpa shumaq bendicionkunata noqantsikpaq Diosnintsik katsinqantam. Jina willakunmi punta nuna shumaq huertachö kawananta imanö oqranqanta y tsëta Dios imanö altsanampaq kaqtapis.​—Lei Apocalipsis 21:4, 5.

Diospa Palabranchöqa leyninkuna, musyatsikïninkuna y consëjonkunam këkan. Jina Diosnintsik imanöpis rikämanqantsiktam willakun, tsënöpam musyarintsik alläpa kuyakoq kanqanta. Tsëmi Bibliaqa pëta más reqinantsikpaq yanapamantsik. Y amïgon këman chänapaq imata ruranapaq kaqtapis yachatsimantsikmi.​—Lei Salmo 19:7, 11; Santiagu 2:23, y 4:8.

4. ¿Imataq yanapamashwan Bibliata entiendenapaq?

‘Diospa Palabranta entenditsicunanrëcurmi’ Jesusqa versïculokunapita leeq y alli entienditsikoq. Kë follëtopis tsënöllam yanapakun Biblia yachatsikunqanta alli entiendenëkipaq.​—Lei Lucas 24:27, 45, NTCN.

Musyayämi Diospa alli willakïninkunapita yachakïta gustanqëkita. Tsënö kaptimpis wakinkunaqa manam yachakïta munayantsu y wakinkunanäqa parlapashqa piñakuyan o ajäkuyanmi. Pero tsënö pensëninkuna ama qelanätsishïtsu. Porque Biblia ninqannöpis Diospita yachakoqkunaqa imëyaqpis kawakuyanqam.​—Lei Juan 17:3.