Qochachö laqcheqsaq yakuta Jesus päratsin

Jesusqa alläpa utishqam këkarqan. Ampïriptinnam, “qochapa wak tsimpanman ëwashun” nirqan qateqninkunata, tsënöqa nikarqan Capernaumpa wak tsimpampaqmi (Marcus 4:35).

Tsëchöqa, Galilëa qochapa inti yarqamunan lädunchö Decäpolispa Geräsa markanmi këkarqan. Decäpolis nir reqishqa markakunachöqa, Grecia nunakunam täräyaq, jina judïukunapis atskaqmi kayaq.

Capernaumpita Jesus yarquriptinqa, wakin nunakunapis tsëta rikarmi barcunkunawan qochata tsimpar qallëkuyarqan (Marcus 4:36). Qochapa wak tsimpanqa manam alläpa karuchötsu këkarqan. Galilëa qochaqa alläpa jondu qocham, largunqa 21 kilömetrunömi y anchunnam 12 kilömetrunö.

Cuerpunchö alli karpis, tsë junaqqa imëkata rurashqa karmi Jesusqa alläpa utishqa këkarqan. Tsëmi barcuwan qochaman yëkuriyaptinqa, barcupa mas qepan kaqman ëwëkur punukärirqan.

Wakin apostolkuna barcukunachö trabajashqa kayaptimpis, qochata tsëpin tsimpayanqanqa manam fäciltsu karqan. Galilëa qochapa jiruroqninchöqa atska jirkakunam kan, tsëmi qochachö yakuqa qoñürin. Höraqa jirkakunachö alalaq vientum qochapa qoñïkaq yakunman raslla chärin, tsëmi illaqpita alläpa vientur y yaku laqcheqsar qallëkun. Tsë kutiqa tsëmi pasakurqan. Yaku laqcheqsar qallëkuptinmi, barcunkunaman “yaku winakar qallëkurqan”, tsëmi barcuqa hundikänampaqna këkarqan (Lücas 8:23). Tsënö kaptimpis, Jesusqa manaran riyarqanraqtsu.

Jesuspa apostolninkunaqa, juk kutikunachö rurayanqannöpis, llapan puëdiyanqanmampam barcuta controlëta tïrayarqan. Peru tsë kutiqa mananam puëdiyarqannatsu. Alläpa mantsakarninmi, “¡Teytë, salvëkalläyämë, ushakärinapaqnam këkantsik!” nirnin Jesusta rogakuyarqan (Mateu 8:25). Qateqninkunaqa yakuwan shenqakar wanïtaqa alläpam mantsayarqan.

Riyarkamurqa, Jesusqa kënömi nirqan: “¿Imanirtaq alläpa mantsakäyanki markäkïnin pisheq nunakuna?” (Mateu 8:26). Tsënam, “¡upälla! ¡Ama büllëtsu!” nir vientutawan qochata piñaparqan (Marcus 4:39). Tsë höram vientïta jaqirirqan y qochapis kanqanman kutikärirqan. (Marcuswan Lücasqa tsënö pasakunqantam qellqayarqan. Puntataqa Jesus ruranqan milagrupaqmi willakuyan, tsëpitanam Jesuspa qateqninkunapa markäkïnin pishinqampaq).

¡Jesuspa qateqninkunaqa alläpachi espantakuyarqan! Alläpa feyupa vientïkaqta y laqcheqsëkaq yakuta päraratseqtam rikäyarqan. Tsë höram, “¿pitaq kë nunaqa? Hasta vientuwan qochapis pë ninqantataq cäsuyan” nir parlar qallëkuyarqan. Rätunllatanam qochapa wak tsimpanmanqa sänu chäriyarqan (Marcus 4:41-5:1). Qepanta ëwaq wakin barcukunaqa itsachi kutikuyarqan.

Patsachö imëka kaqkunata Diospa Tsurin controlëta puëdinqanta musyëqa, alläpam kushitsimantsik. Patsata gobernamuptinqa, llapan nunakunam següru kawakuyanqa, porqui manam ima desgraciapis kanqanatsu.