Yaku jananchömi Jesusqa purirqan

Jesusqa nunakuna qeshyayaptin alliyätsita, wanushqakunata kawatsita y vientutawan tamyatapis controlëtam puëdeq. Jirkachö këkar Jehoväman mañakuyta usharirmi Galilëa qochaman rikärirqan y feyupa vientur tamyëkaqtam rikarqan. Tsënö mana alli tiempuchömi apostolninkunaqa barcunkunata imëkanöpa avanzatsita tïrëkäyarqan. Tsënam Jesusqa jirkapita urärir yaku janampa pëkuna kaqman ëwarqan. Y apostolninkunaqa, pë kanqanta mana musyarmi alläpa mantsakäyarqan. Tsënam Jesusqa kënö nirqan: “¡Ama mantsakäyëtsu! Noqam kä”.

Tsëmi Pëdruqa kënö nirqan: “Teytë, qam karqa yaku janampa qamman shamunäpaq mandëkamë”. Jesusnam nirqan, “¡shamuy ari!”. Tsënam Pëdruqa barcupita yarquskir yaku janampa purir Jesus kaqman ëwarqan. Peru Jesusman chëkarnam, feyupa vientoqta rikëkur alläpa mantsakarqan. Y hundikar qallëkurmi, “¡Teytë, salvëkallämë!” nir qayëkacharqan. Tsënam Jesusqa rikrampita tsarirkur kënö nirqan: “¿Imanirtan mantsakarqunki? ¿Manaku noqaman confiakunki?”.

Tsëpitanam Jesuswan Pëdruqa barcuman yëkuriyarqan, y tsëllanam vientupis y tamyapis pärarirqan. ¿Imanöraq apostolninkuna sientikuyarqan? Pëkunaqa kënömi niyarqan: “Qamqa rasumpataq Diospa Tsurin kanki”.

Jesusqa manam tsë kutillachötsu vientutawan tamyata controlëta puëdirqan. Juk kutim pëwan apostolninkuna Galilëa qochata barcuchö tsimpëkäyarqan, y Jesusqa barcupa qepan kaqchömi punukashqa këkarqan. Y tsënö këkaptinmi illaqpita feyupa vientur qallëkurqan, y yakuqa barcumampis juntëkarqannam. Tsëmi apostolninkunaqa,“¡Maestru, salvëkalläyämë, hundikärinapaqnam këkantsik!” nir riyatsiyarqan o rikchatsiyarqan. Tsënam Jesusqa sharkur vientuta y qochata kënö nirqan: “¡Upälla kë! ¡Ama büllëtsu!”. Y jinan höram llapan pärarirqan. Tsënam Jesusqa kënö tapurqan: “¿Manaraqku ichikllapis markäkuyanki o yärakuyanki?”. Y pëkunaqa kënömi ninakuyarqan: “Vientupis y qochapis pëtaqa cäsuyantaq”. Tsëchömi apostolninkunaqa yachakuyarqan, Jesusman llapan shonqunkunawan confiakurqa ni imatapis mana mantsayänampaq kaqta.