¿Biblia yanapamëta puëdinku?

¿QAMQA IMATATAQ RURANKIMAN?

Këman pensari: Davidmi mana reqinqan sitiupa cärrunwan ëwëkan. Peru cällipa jutinta rikärir y jatusaq wayikunata rikärirqa cuentatam qokurin oqrakashqa këkanqanta. Cuentata mana qokushpachi llutampa ëwarirqan.

David karqa, ¿imataraq rurankiman?

ALLEQRAQ PENSË

Këkunatam rurëta puëdinki:

1. Pillatapis tapukurita.

2. Mäpata o GPS nishqanta rikärita.

3. Ëwarnin sïguita, ashikanqëki nänita taririnëkipaq kaqta pensarnin.

Kima kaqta rurarqa peormi oqrakärinkiman.

Punta kaqpitaqa ishkë kaqmi mas alli, porqui makikichömi katsinki mäpata o GPS nishqanta y tsëmi imë hörapis mëpa ëwanëkipaq dirigishunki.

Tsënömi Bibliapis yanapashïnikita puëdin.

Kë alläpa precisaq libruqa yanapashïnikita puëdin:

• Problëmakunapa pasaptiki.

• Kikikita alleq reqikunëkipaq y alli nuna kanëkipaq.

• Mas alli kaq kawakï imanö kanqanta yachakunëkipaq.

KAWËNINTSIKCHÖ PRECISAQ TAPUKÏKUNAPA RESPUESTANKUNA

Parlëta yachakurirllam, kënö tapukurnin qallëkuntsik:

• ¿Imanirtaq ciëluqa azul?

• ¿Imapitataq qoyllurkunaqa rurakashqa?

Tsëpitanam pasakunqankunapita kënö tapukur qallëkuntsik:

• ¿Imanirtaq mana allikuna pasakun?

• ¿Imanirtaq wanuntsik?

¿Musyarqëkiku kë tapukïkunata Biblia contestanqanta?

Mëtsikaq nunakunam niyan, Bibliaqa cuentu librulla kanqanta, parlanqankunaqa unë nunakunallapaq kanqanta o mana entiendipaq kanqanta. Peru ¿Bibliapaq tsënö niyanqanqa rasumpatsuraq? ¿O pantashqatsuraq këkäyan?

Këllaman pensarishun, mëtsikaqmi pensayan llapan nunakunata Dios makinchö këkätsinqanta Biblia yachatsikunqanta. ¿Rasumpatsuraq tsënö niyanqan? Nunakunaqa alläpa mana allim kawakuyan. Tsëmi rikantsik imëka nanatsikïkunawan, qeshyakunawan, wanïwan, waktsa këwan y imëka desgraciakunawan sufriyaqta. Diosnintsik kuyëkämarnintsikqa, ¿tsëkunawan sufritsimashwantsuraq?

¿Musyëta munankimantsuraq nunakunata pï gobernëkanqanta? Bibliachö respuestata taririrqa espantakunkim.

Cuentata qokurqunkichi kë follëtuchö consëjukunaqa Bibliapita kanqanta. Jehoväpa testïgunkunaqa segürum këkäyä Biblia yanapamënintsikta puëdinqanta, porqui “Teyta Diospa palabranqa quiquinpitam shamun, y allim yachatsicunantsicpaq, mana allita rurayaptin willapänantsicpaq, [y] piñapänantsicpaq” (2 Timoteu 3:16, 17). Kë unëna qellqakashqa y kanan witsampis alläpa yanapakoq libruta leyinëkipaqmi animariyaq.