Abrahanwan Säraqa cäsukoqmi kayarqan

Babel markapa amänunchömi, Ur nir reqiyanqan marka karqan. Tsëchö nunakunaqa manam Jehovätatsu adorayaq, sinöqa mëtsika santukunatam. Peru Abrahan jutiyoq nunaqa Jehovätam adoraq.

Jehoväqa Abrahantam kënö nirqan: “Kastëkikunata y papänikipa familianta dejëkur markëkipita ëwakuy. Noqam ëwanëkipaq kaq markaman pushashqëki”. Tsëpitanam kënö nirqan: “Jatun nacionmanmi tikratsishqëki, y llapankunapaqmi juk bendicion kanki”.

Abrahanqa manam musyarqantsu Jehovä mëman mandanampaq kaqta, peru pëmanmi confiakurqan. Abrahan, warmin Sära, papänin Tarë y sobrinun Lotqa Diostam cäsukuyarqan. Tsëmi cösasninkunata alistarkur ëwakuyarqan.

Jehovä rikätsita munanqan sitiuman familianwan chäyanqan witsanqa, Abrahanqa 75 watayoqnam karqan. Tsë sitiutaqa Canaan nirmi reqiyaq. Tsëchömi Jehoväqa kënö nir änirqan: “Kë sitiukunaqa kastëkikunapaqmi kanqa”. Peru Abrahanwan Säraqa edänam kayarqan, y manam wamrankuna karqantsu. ¿Y imanötan Jehoväqa äninqanta cumplirqan?