¿Pitaq Abrahanqa karqan?
ABRAHANNÖa alläpa reqishqa y respetashqa nunaqa huk ishkëllam judïokunachö, musulmankunachö y cristiänokunachö kan. Wakinkunaqa “Diospa Palabranchö alläpa precisaq” nuna niyanmi pëpaq. Wakinnam, “markäkïta [yärakuyta] yachatsikoq” niyan. Y Biblianam, “marcäcoq caqpaqqa imeca tëtancuna cuenta” kanqanta nin (Romanos 4:11).
Pero ¿imanirtaq Abrahantaqa alläpa respetayan? Diospa amïgon kanqanta pëllapaq Biblia niptinmi, y manam huk kutillatsu tsëtaqa nin, kima kutim (2 Crónicas 20:7, nota; Isaías 41:8; Santiagu 2:23). ¡Tsënö reqishqa këqa manam imawampis igualantsu!
Tsënö kaptimpis, Abrahanqa noqantsiknö nunallam karqan. Pëpis noqantsiknömi tukï mana allikunapa pasarqan. Pero yacharqanmi tsarakïta. ¿Musyëta munankiku alli tsarakunampaq ima yanapanqanta? Puntataqa kë alli nunapita ima maskunata Biblia willakunqanta rikärishun.
Pëta más reqirinapaq willakïkuna
Abrahanqa Jesus manaraq shamuptinmi 2018 watachö yurirqan, y Ur shutiyoq hatun y shumaq markachömi winarqan (Génesis 11:27-31). Tsë markachöqa pï mëmi ïdolokunata adorayaq. Itsachi teytan Tarëpis tsëkunata adoraq (Josué 24:2). Pero mana kawaq ïdolokunata adoranampa rantinmi Abrahanqa Jehová Diosllata adorarqan.b
¿Imanirtaq Diosta sirwinampaq churapakarqan? Musyanqantsiknöpis, Abrahan yurikunqampitaqa 150 watakunanöran Noëpa tsurin Sem kawarqan, tsëqa mëraq reqinakuyarqan. Tsënö karqa, itsachi awkinyashqa Semqa willarqan Apäkï Tamya witsan imanö salvakuyanqanta, y mëraq entiendetsirqan wiyakoq kayanqampita pëtawan familianta Jehová salvanqanta.
Abrahan rasumpa kaq Diosta reqinampaq Sem yanapashqa kaptin o huk yanapashqa kaptimpis, masqa precisan Jehoväta reqirir mana imëpis haqinqanmi. Y Abrahan alli nuna kanqanta “shonqukuna rikaq” Jehová cuentata qoqurirmi, más alli kanampaqraq yanaparqan (Proverbios 17:3; 2 Crónicas 16:9).
Kawënin
Abrahanpa kawëninqa shumaqmi karqan, y hora hora tukï mana allipa pasashqa kaptimpis, kawëninqa manam envänotsu karqan. Rikärishun imanö kawanqanta.
▪ Ur markachö këkaptinmi, Dios nirqan reqitsinampaq kaq markapa ëwakunampaq. Abrahanwan warminqa manam musyayarqantsu kawëninkuna imanö kanampaq kaqta: manam musyayarqantsu mëman chäyänampaq kaqta, ni imanir nacionninkunapita ëwakuyänampaq Dios mañëkanqanta. Tsënö kaptimpis, wiyakuyarqanmi y carpakunachömi forastëronölla Canaanchö täräyarqan (Hechos 7:2, 3; Hebreus 11:8, 9, 13).
▪ Wamrankunapis manaraq kaptinmi Abrahantawan Särataqa Jehová awnirqan mirënimpita huk nación yarqunampaq kaqta, y Abrahanwan hinantin Patsapita familiakuna bendecishqa kayänampaqmi nirqan (Génesis 11:30; 12:1-3). Y tiempo pasariptinnam, tsë awninqanta cumplinampaq kaqta rikätsinanrëkur, mirënin imëka ciëlochö qoyllurkunanö mëtsika kanampaq kaqta Dios nirqan (Génesis 15:5, 6).
▪ Wambrayoq kayänampaq Jehová awninqan witsanqa 99 watayoqnam Abrahan karqan, y warminnam 90 watayoqnö. Tsënö kanampaq kaqqa itsachi mana creipaqnö karqan. Pero ichik tiempo pasariptinllam Abrahanwan Säraqa rikäriyarqan “Jehoväpaqqa ni imapis sasatsu” kanqanta (Génesis 18:14). Huk wata pasarinqanllachömi, Abrahan 100 watayoq këkaptin tsurin Isaac yuririrqan (Génesis 17:21; 21:1-5). Tsë tsurimpita llapan nunakuna bendicionta chaskiyänampaq kaqtam Diosqa awnirqan.
▪ Huk tiempo pasariptinnam, mana creipaqtanö ruranampaq Abrahanta Jehová mañarqan: majannaqllaraq y tsurinnaqllaraq kuyashqa tsurin Isaacta sacrificänampaqmi nirqan. Wamranta alläpa llakinan kaptimpis Abrahanqa listom këkarqan Diosta wiyakurnin tsurinta sacrificänampaq. Llapan shonqunwanmi markäkurqan awninqanta cumplinanrëkur Dios kawaritsimïta puëdenqanman (Hebreus 11:19). Pero sacrificänampaq këkaptinnam, Dios michëkurqan. Y Jehoväqa alläpam kushikurqan Abrahan wiyakoq kanqampita, tsëmi awninqanta cumplinampaq yapë nirqan (Génesis 22:1-18).
▪ Abrahanqa wanukurqan 175 watayoq këkarmi, y Bibliaqa nin “alli unë kawakurir, awkinna y kushishqa” wanukunqantam (Génesis 25:7, 8). Tsënömi alli unë kawakurir kushishqana wanukunampaq kaqta Dios awninqan cumplikarqan (Génesis 15:15).
Yachatsimanqantsik
Abrahanqa manam unë witsan kawashqa lluta religioso o reqishqa nunakunanötsu. Kanan witsanyaqpis pëpaqqa yarpäyanran y tukïtam pëpita yachakïta puëdentsik (Hebreus 11:8-10, 17-19). Qateqnin kaq yachatsikïchömi rikäshun ima chusku cösaskunachö alli nuna kanqanta. Pëtaqa markäkïnimpitam más reqiyan, tsëtaraq puntata rikärishun.
[Päginapa ura kuchunchö willakïkuna]
a Puntataqa, Abranmi shutin karqan y warmimpanam Sarai. Pero tsëpitaqa, Abrahanna shutin kanampaqmi Dios nirqan, y tsëqa “Mëtsikaqpa Teytan” ninanmi, y warmimpaqa Särana shutin kanampaqmi nirqan, tsëqa “Princesa” ninanmi (Génesis 17:5, 15). Y tsë shutikunapam kë yachatsikïchöqa reqishun.
b Bibliaqa willakun Diospa shutin Jehová kanqantam.
[4 kaq päginachö recuadru]
Bibliachö más reqishqa nuna
Génesis libropa chunka qallanan capïtulonkunaqa Abelpaq, Enocpaq, Noëpaq y más nunakunapaqmi parlan. Pero qateqnin chunka pitsqa capïtulonkunaqa Abrahanpa kawëninllapaqmi parlan.
Hinamampis, Abrahanpa kawënimpaq willakïkunachöran yurir qallamun Bibliapa wakin precisaq yachatsikïninkuna. Rikärishun:
▪ Génesis 15:1 textochömi nin sirveqninkunapaq Dios escudo cuenta kanqanta (rikärï Deuteronomio 33:29; Salmo 115:9; Proverbios 30:5 textokunata).
▪ Génesis 15:6 textochömi Diosman markäkïpaq parlan.
▪ Génesis 20:7 textochömi huk nunapaq profeta nin.
▪ Génesis 22:2 textochömi teytapa kuyakïnimpaq parlan.