Abrahan markäkunqanmi o yärakunqanmi pruëbaman churakarqan

Jehoväta kuyanampaq y änikunqankunaman confiakunampaqmi Abrahanqa tsurin Isaacta yachatsirqan. Peru Isaac 25 watayoqnö këkaptinmi Jehoväqa juk sasa o aja rurëta ruranampaq Abrahanta mandarqan. ¿Musyankiku imata mandanqanta?

Diosqa kënömi nirqan: “Japallan kuyë tsuriki Isaacta pusharkur Moria nir reqiyanqan sitiuman ëwë. Tsë jirkachö tsurikita rupatsina qarëtanö entregamë”. Imanir tsëta Jehovä mandanqanta mana musyëkarpis Abrahanqa cäsukurqanmi.

Waränin junaqqa, patsa waräriptinllam Abrahanqa Isaacta y ishkë sirweqninkunata pusharkur Moria niyanqan jirkaman ëwarqan. Kima o kimsa junaqna ëwëkarmi tsë jirkata rikäriyarqan. Tsënam Abrahanqa sirweqninkunata kënö nirqan: “Këllachö shuyëkäyämë, tsurïllawanmi taqë sitiuman ëwar Teyta Diosta adorarir kutirayämushaq”. Y rupatsinampaq apayanqan yantatam tsurinta aparitsirqan, peru cuchillutaqa kikinmi aparqan. Tsënam Isaacqa papäninta kënö tapurqan: “¿Mëtan pishtar rupatsinapaq üshaqa?”. Abrahannam kënö nirqan: “Hïju, pishtar rupatsinapaq üshataqa Teyta Diosmi yuritsimunqa”.

Y tsë jirkaman chärirmi juk altarta perqayarqan, nïkurnam Abrahanqa chakipita y makipita pankarkur Isaacta altar jananman pallarkurqan.

Tsëpitanam Isaacta wanutsinampaq cuchilluta tsarirkurqan, y tsë höram Jehoväpa juk angelnin ciëlupita kënö nirqan: “¡Abrahan! Ama imatapis rurëtsu, ama tsurikita wanutsitsu. Qamqa decidïdum këkarqunki japallan tsurikita qaramänëkipaq, tsëmi kananqa alli musyä rasumpa respetamar imëpis cäsumanqëkita”. Tsëpitanam Abrahanqa rikärirqan juk plantachö awrikashqa këkaq carnëruta. Tsëmi Isaacta jinan höra paskarir, tsë carnërutana Jehoväpaq rupatsirqan.

Tsë junaqpitam Jehoväqa Abrahan amïgun kanqanta nirqan. ¿Musyankiku imanir tsënö ninqanta? Tsëtaqa nirqan mandanqankunata llapanta mana entiendirpis cäsukuptinmi.

Jehoväqa yapëmi Abrahanta kënö nir änirqan: “Bendicishqëkim, y qampa kastëkikunaqa mëtsikaqmi kayanqa”. Tsënöqa nirqan, Abrahanpa kastankunapaq y llapan alli portakoq nunakunapaq imëka allikunata ruranan kaptinmi.