¡Ollqu wamrankunam yurirqan!

Abrahanwan Säraqa unënam casädu kayarqan, y Ur markachö wayinkunata dejarirmi carpakunallachöna täräyarqan. Säraqa Jehoväman confiakurmi kushishqa kawakoq.

Säraqa wamrayoq këta munarmi Abrahanta kënö nirqan: “Sirwimaqnï Agarwan wamrëki kanampaqmi rogakoq. Pëwan wamrëki kaptinqa, kikïpa wamrä cuentam kanqa”. Tiempu pasariptinqa, Agarpa juk ollqu wamranmi yurirqan, y Ismael nirmi jutin churayarqan.

Tsëpita atska tiempu pasariptinnam, Abrahan 99 watayoq këkaptin y Sära 89 watayoq këkaptin kimaq o kimsaq nunakuna watukaq chäyarqan. Abrahanqa juk monti jawanmanmi jamatsirqan y mikuyninkunam qararqan. ¿Tsë watukaqkuna pikuna kayanqanta musyankiku? Angelkunam kayarqan. Y jukninnam Abrahanta kënö nirqan: “Watan kënö witsanmi kutimushaq, y warmiki Säraqa wamrayoqnam kanqa”. Säraqa carpa rurinllapitam tsëta wiyëkarqan, tsëmi shonqunllachö asikur nirqan, “¿chakwanna këkartsuraq wamrayoq kashaq?”.

Qateqnin wataqa Jehoväpa angelnin ninqannöllam Särapa juk ollqu wamran yurirqan. Abrahanqa Isaac nirmi jutin churarqan, tsëqa, “asikuy” ninanmi.

Isaac pitsqa watayoq këkaptinmi Säraqa cuentata qokurqan Ismaelqa Isaacpita burlakunqanta. Tsëmi wamranta imapis mana pasananta munar Abrahanta kënö nirqan: “¡Tsë sirwipakoq warmita y wamranta këpita qarquy!”. Peru Abrahanqa Sära ninqanta manam rurëta munarqantsu. Tsëmi Jehoväqa Isaacta imapis mana pasananta munar, Abrahanta kënö nirqan: “Sirwishoqniki warmipaq y tsurikipaq Sära nishunqëkipita ama llakikuytsu. Kastëkikunaqa Isaacpitam kanqa, Sära nishunqëkita rurë”.