Chunka kaq castïgu

Moisesmi faraonta nirqan, “manam yapëqa kutimushaqnatsu”, y manaraq ëwakurmi kënö nirqan: “Pullan paqasmi Egiptuchö llapan familiakunapa mayor kaq wamrankuna wanuyanqa, faraonpa mayor tsurin y sirweqninkunapa mayor wamrankunapis wanuyanqam”.

Israelïtakunataqa kënömi Jehovä nirqan: “Mikuyänëkipaq juk watayoq orqu üshata o orqu cabrata pishtayë, y punkuykikunapa ishkan kuchunta y jananta tsë pishtayanqëki animalpa yawarninwan llushiyë. Nïkurna tsë animalpa ëtsanta kankëkur levadürannaq tantatawan mikuyë. Y yarquyänëkipaq alli vistikushqa y llanqishqa këkäyë. Kanan paqasmi librayashqëki”. ¡Tsëta wiyarirqa israelïtakunaqa alläpachi kushikuyarqan!

Pullan paqasmi Jehoväpa angelnin Egiptuchö llapan wayikunapa pasarqan. Y punkupa marcunchö yawarta mana rikarqa, tsë wayichö mayor kaq wamrakunatam wanutsirqan. Peru yawarwan llushishqa kaq wayikunachöqa manam wanutsirqantsu. Egiptuchöqa llapan familiakunapam wamrankuna wanuyarqan, peru israelïtakunapaqa manam ni jukpis wanurqantsu.

Faraonpa mayor kaq tsurimpis wanurqanmi, tsëmi faraonqa imatapis rurëta manana puëdir Moisestawan Aaronta kënö nirqan: “¡Ras ëwakuyë! ¡Ëwakuyë y Diosnikikunata adorayë! ¡Animalnikikunatapis aparkur ëwakuyë!”.

Tsë paqasqa jatun killam karqan y israelïtakunaqa familiapura y kastapura juntakëkurmi Egiptupita yarquyarqan. 600.000 ollqukuna, y mëtsika warmikuna y wamrakunam kayarqan. Mana israelïta kaqkunapis Jehoväta adorayänampaqmi pëkunawan ëwakuyarqan. ¡Israelïtakunaqa librinam tikrariyarqan!

Jehovä salvanqanta yarpäyänampaqmi israelïtakunaqa cada wata, tsë paqas mikuyanqan mikuyta rurayänan karqan, tsëtam Pascua nir reqiyarqan.