Kima castïgukuna

Esclävu kayaptinmi egipciu nunakunaqa israelïtakunata alläpa trabajatsiyaq, tsëmi Jehoväqa Moisestawan Aaronta mandarqan faraonta kënö niyänampaq: “Jehovämi munan, juntakëkurnin alabayänampaq sirweqnïnkunata tsunyaq sitiuman yarquyänanta dejanëkita”. Peru faraonqa alläpa orgullösu karmi kënö nirqan: “¿¡Pitaq Jehoväqa imata ruranäpaq kaqta nimänampaq!? Manam israelïtakuna yarquyänanta dejashaqtsu”. Y faraonqa masraqmi israelïtakunata trabajatsirqan, tsëmi Jehoväqa faraon yachakunampaq chunka castïgukunawan sufritsirqan. Y Moisestam kënö nirqan: “Faraonqa manam cäsumëta munantsu. Warëmi Nïlu mayuman ëwanqa, tsëmi qampis ëwanëki, y willanki sirwimaqnïkuna ëwakunanta mana dejanqampita tsë mayu yawarman tikranampaq kaqta”. Tsënam Moisesqa Jehoväta cäsur faraon kaqman ëwarqan. Y faraonpa rikëninchömi Aaronqa tukrunwan Nïlu mayuta wirurirqan, y tsë höram yawarman tikrarir asyar qallëkurqan. Tsëmi tsë yakutaqa pipis upuyta puëdirqantsu, y pescädukunapis wanuyarqanmi. Peru tsënö kaptimpis faraonqa manam dejarqantsu israelïtakuna ëwakuyänanta.

Siëti junaq pasariptinnam Jehoväqa Moisesta yapë mandarqan faraonta kënö ninampaq: “Sirwimaqnïkuna Egiptupita yarquyänanta mana dejaptikiqa, entëru Egiptu nacionchömi rachakkunata yuritsimushaq”. Y faraonqa manam cäsukurqantsu, tsëmi Aaronqa tukrunta pallarkurqan y entëru nacionchömi rachakkuna juntarirqan. Wayinkunaman, cämankunaman y plätunkunamanmi juntariyarqan, awmi më tsëchömi karqan. Tsënam faraonqa Moisesta kënö nirqan: “Kë castïguta ushakätsinampaq Jehoväta rogakuyaptikiqa, Egiptupita ëwakuyänëkitam dejashaq”. Tsënam Jehoväqa tsë castïguta ushakäratsirqan, y egipciukunaqa wanushqa rachakkunata monton montonmi juntayarqan, tsëmi entëru nacion asyar qallëkurqan. Peru faraonqa manam dejarqantsu israelïtakuna ëwakuyänanta.

Tsënam Jehoväqa Moisesta kënö nirqan: “Aaronta nï tukrunwan allpata wirunampaq, tsënam allpaqa chuspikunaman tikranqa y entëru Egiptumanmi juntanqa”. Y mëtsika chuspikuna juntarmi nunakunata kanir ushayarqan. Tsëmi wakin egipciu nunakunaqa faraonta kënö niyarqan: “¡Këqa Diospa castïgunmi!”. Peru faraonqa manam dejarqantsu israelïtakuna ëwakuyänanta.