Joqta castïgukuna

Moiseswan Aaronqa Dios kënö ninqanta willaqmi faraonman ëwayarqan: “Sirwimaqnïkuna yarquyänanta mana dejaptikiqa, kanikoq jatusaq chuspikunatam yuritsimushaq”. Tsëmi mëtsika chuspikuna Egiptuchö llapan nunakunapa wayinkunaman juntariyarqan. Entëru nacionchömi karqan. Peru israelïtakuna täräyanqan Gosen markachöqa manam ni jukpis karqantsu. Tsë chusku kaq castïgupitaqa egipciu nunakunallanam castïgukunata chaskiyarqan, tsëmi faraonqa Moisesta kënö rogarqan: “Kë jatusaq chuspikuna ushakänampaq Diosnikiman mañakuy, tsëqa dejashaqmi adoraq ëwakuyänëkita”. Peru chuspikunata Jehovä ushakäratsiptinqa faraonqa manam ëwakuyänanta munarqannatsu. ¿Faraonqa imëllapis cuentata qokunmantsuraq karqan Jehovä imanir castiguëkanqanta?

Tsëpitanam Jehoväqa kënö nirqan: “Sirwimaqnïkuna ëwakunanta faraon mana dejaptinqa, egipciu nunakunapa animalninkunam qeshyar wanuyanqa”. Y ninqannöllam waränin junaqqa pasakurqan, peru israelïtakunapa animalninkunaqa manam wanuyarqantsu, tsënö kaptimpis chukru shonqu karmi faraonqa cäsukurqantsu.

Tsëmi Jehoväqa Moisesta mandarqan faraon kaqman yapë kutïkur uchpata vientuman jitanampaq, y tsë uchpaqa llapan egipciu nunakunapa janankunamanmi juntarqan. Nunakunapa y animalkunapa qarankunatam qeri usharqan, peru faraonqa israelïtakuna ëwakuyänanta manam dejarqantsu.

Jehoväqa yapëmi Moisesta mandarqan faraonta kënö ninampaq: “¿¡Imanirtaq sirweqnïkuna ëwakuyänanta dejankitsu!? Mana cäsukoq kaptikim runtu tamyata warë tamyatsimushaq”. Y waränin junaqqa, runtu tamya y räyukunam feyupa pashtayarqan, tsënöqa manam ni imëpis Egiptuchö pasashqatsu karqan. Llapan montikunata y chakrachö plantakunatam ushakätsirqan, peru Gosen markachö kaqtaqa manam. Tsënam faraonqa kënö nirqan: “Këkuna päranampaq Jehoväman mañakuy, tsëqa ëwakuyankim”. Peru pärariptinqa faraonqa manam israelïtakuna ëwakuyänanta munarqantsu.

Tsënam Moisesqa kënö nirqan: “Warëmi chukllushkunata juntatsimushaq, y runtu tamya mana ushakätsinqan montikunata y plantakunatam mikur ushayanqa”. Tsënam mëtsika chukllushkuna montikunata y plantakunata mikur ushariyarqan. Faraonqa yapëmi Moisesta kënö rogarqan: “Jehoväman mañakuy chukllushkunata ushakätsinampaq”. Peru tsë chukllushkunata Jehovä ushakäratsiptimpis faraonqa manam cäsukurqantsu.

Jehoväqa kënömi Moisesta nirqan: “Makikita ciëluman pallari”. Y pallarkuptinqa jinan höram ampïrirqan o tsakärirqan. Egiptuchö nunakunaqa kima o kimsa junaqmi ni imatapis rikäyarqantsu, peru israelïtakuna täräyanqanchöqa inti o rupay atsikyarqanmi.

Faraonqa kënömi Moisesta nirqan: “Llapëkikuna ëwakuyë, peru animalnikikunataqa manam apayankitsu”. Tsënam Moisesqa kënö nirqan: “Jehovä Diosnïkunata adorarmi wakin animalnïkunata pishtar rupatsiyäshaq, tsëmi llapan animalnïkunata apayänä”. Tsënam faraonqa alläpa cölerakur kënö nirqan: “¡Këpita yarquy! Yapë kutimuptikiqa wanutsishqëkim o wañutsishqëkim”.