Israelpa punta kaq gobernantin

Jehoväqa israelïtakunata diriginampaqmi juezkunata churarqan, peru israelïtakunaqa gobernantiyoq këtam munayarqan. Tsëmi Samuelta kënö niyarqan: “Wakin nacionkunapanö gobernantïkuna kanampaq, juk gobernantïkuna churamunëkitam munayä”. Samuelqa mana allitanömi tsëta rikarqan. Tsëmi Jehoväman mañakurqan, y Jehoväqa kënömi nirqan: “Llapan niyäshunqëkita rurë, manam qamtatsu despreciëkäyäshunki, sinöqa noqatam. Gobernantiyoq kayänampaq kaqta nï, y tsë gobernanti imakunata mañanampaq kaqtapis cläru willë”. Tsënam israelïtakunaqa kënö niyarqan: “¡Imanö kaptimpis, gobernantïkuna kanantam munayä!”.

Tsënam Jehoväqa Samuelta nirqan punta kaq gobernantiqa Saul jutiyoq nuna kanampaq kaqta. Juk kutim Samuelta watukaq Ramä markaman Saul ëwarqan, tsëchömi gobernanti kanampaq peqanman o umanman aceitita Samuel jichapurqan.

Nïkurmi Samuelqa llapan israelïtakunata qayatsirqan gobernantinkuna pï kanampaq kaqta willanampaq. Peru Saulqa mana rikäyänanta munarmi qepikuna rurinman yëkurqan, tsëmi ni pipis tarita puëdirqantsu. Y alli ashïkur-ran taririyarqan, nïkurmi llapan nunakunapa chowpinman apayarqan. Pëqa llapan nunakunapitapis mas jatun y mas shumaqllanmi karqan. Samuelqa kënömi nirqan: “Rikäyë, pëtam Jehovä Dios akrashqa gobernantikikuna kanampaq”. Y nunakunaqa alläpam kushikuyarqan.

Gobernanti kanampa churayanqan witsanqa Saulqa cäsukoqmi karqan, tsëmi Jehoväta y Samueltapis cäsukoq. Peru tsëpitaqa orgullösum tikrakurirqan. Juk kutim Samuelqa Saulta nirqan “animalkunata rupatsinapaq shuyämanki”. Gobernantikunaqa manam puëdiyaqtsu Jehoväpaq animalkunata rupatsita. Peru Samuel mana ras chaptinmi Saulqa mana ruranampaq kaqta rurarqan. Y Samuel chärirnam kënö nirqan: “Manam Jehovä Diosnintsik mandashunqëkita cäsukurqunkitsu”. ¿Saulqa yachakurqantsuraq Jehoväta cäsukunan imëpis mas alli kanqanta?

Tsëpitaqa Amaleq nunakunawan pelyaqmi Saul ëwarqan, y Samuelqa llapan nunakunata wanutsiyänampaqmi Saulta nirqan. Peru Saulqa manam gobernanti Agagta wanutsirqantsu, tsëmi Jehoväqa Samuelta kënö nirqan: “Saulqa munëninta rurakurmi llapan ninqäkunata cäsumashqatsu”. Samuelqa alläpa llakishqam sientikurqan, tsëmi Saulta kënö nirqan: “Mana cäsukoq kaptikim Jehoväqa juktana gobernaq kanampaq akranqa”. Tsënö nirir kutikuykaptinmi Saulqa Samuelpa röpampa ura kuchumpita achkurkurqan, y röpampa kuchunmi rachiskirqan. Tsënam Samuelqa kënö nirqan: “Imanöllam kë röpa rachirishqa, tsënömi qamtapis Jehovä Dios Israelta gobernanqëkipita qarqushunki”. Tsënö nirmi rikätsikurqan Jehoväta rasumpa kuyaq y cäsukoq kaqna gobernanti kanampaq kaqta.