Jesusmi Sauluta akrarqan

Sauluqa Tarsu markachö yurikoq romänu nunam karqan. Fariseum karqan, y judïukunapa leyninkunata allim reqeq. Peru Jesuspa qateqninkunatam alläpa chikeq. Wayin wayin ëwarmi wayinkunaman yëkuykur, carcelman apanampaq warmitapis ollqutapis qarachëpa jipimoq. Juk kutinäqa Jesusman creikoq Estëbanta rumiwan tsampir o saqmar wanutsiyanqantam kushishqa rikararqan.

Peru Sauluqa manam Jerusalenchö cristiänukunata prësutsinqanllawantsu conformakurqan. Tsëmi mandakoq kaq sacerdötita permïsuta mañakurqan Damascu markachöpis tsënö ruranampaq. Y tsë markaman chänampaqna këkaptinmi ciëlupita aktsi illaqpita tsaparkurqan. Y patsaman ishkirirmi kënö neqta wiyarqan: “Saulu, Saulu, ¿imanirtan imëkata rurar sufrikätsimanki?”. Tsënam pëqa, “¿pitan kanki?” nir tapurqan. Jesusnam kënö contestarqan: “Noqaqa sufrikätsinqëki Jesusmi kä. Peru sharkur ëwëkanqëki Damascuman yëkuy, tsëchömi imata ruranëkipaq kaqta niyäshunki”. Y tsë höram Sauluqa wisku quedarirqan. Tsëmi Damascu markayaq jancharkur apayarqan.

Damascu markachömi Ananïas jutiyoq Jesuspa qateqnin karqan. Pëtam Jesusqa suëñuyninchönö nirqan: “Sharkur Derëchu niyanqan cälliman ëwë, y Tarsupita Saulu jutiyoq nunata ashi”. Tsënam Ananïasqa kënö nirqan: “Teytë, tsë nunapaq mëtsikaq parlayanqanta, y Jerusalenchö sirwishoqnikikunata imëkata rurar sufritsinqantam wiyarqö”. Peru Jesusqa kënömi nirqan: “Ëwëlla, tsë nunataqa, juk nacion nunakunaman, gobernaqkunaman y Israelpa tsurinkunaman, jutïta chätsir yanapakunampaqmi akrarqö”.

Tsëmi Ananïasqa Sauluwan parlaq ëwarqan y yëkurirmi makinta pëman churarkur kënö nirqan: “Saulu, wawqi, shamunqëki nänichö yuripushoqniki Señor Jesusmi, yapë rikänëkipaq y santu espïrituta chaskinëkipaq qamman mandamashqa”. Tsë höram Sauluqa rikar qallëkurqan. Y Jesuspita imëkata yachakurirmi Jesuspa qateqnin tikrarirqan. Tsëmi bautizakurirnin Diosta adorayänan wayikunachö, Jesuspita yachatsikur qallëkurqan. Jesuspita yachatsikuykaqta rikëkurqa, ¿ima niyarqanraq judïu mayinkuna? Pëkunaqa, “¿Manaku tsë nunaqa Jerusalenchö tsë jutiman confiakoqkunata imëkata rurar sufritseq?” niyarqanmi.

Sauluqa kima o kimsa watapam Damascuchö yachatsikurqan. Tsëmi judïukunaqa chikirnin wanutsita munayarqan. Peru tsëta musyarirmi Jesuspa qateqninkunaqa qeshpir ëwakunampaq yanapayarqan. Perqapa juk uchkumpam canastawan bajatsiyarqan.

Jerusalenman chëkurqa Jesuspa qateqninkunawanmi imëkanöpa juntakëta munarqan. Peru Jesuspa qateqnin tikranqanta mana creirmi llapankuna mantsayaq. Tsëmi Bernabëqa yanapaq ëwar apostolkunaman pusharqan, y cambiashqana kanqantam pëkunata entienditsirqan. Sauluqa Jerusalenchö creikoqkunawan juntum Diospa alli noticiankunata mana mantsakushpa yachatsikur qallëkurqan. Y tiempuwanqa Pablu nirnam reqiyarqan.