Davidwan Saul

Goliat-ta wanutsishqa kaptinmi gobernanti Saulqa soldädukunapa mandaqnin kanampaq Davidta churarqan. Davidqa atska kutichömi chikeqninkunata vencirqan, y reqishqam tikrarirqan. Guërrapita cada kutiptinmi israelïta warmikunaqa tushur y kënö cantar chaskiyaq: “Saulqa miltam wanutsishqa o wañutsishqa, y Davidnam diez milta wanutsishqa”. Tsëmi Saulqa chikipar qallëkurqan y wanutsitam munarqan.

Davidqa arpatam shumaq toquëta yachaq. Tsëmi juk kutichö Saulta kushitsita munar arpata toquëkarqan. Peru Saulqa Davidta wanutsita munarmi lanzanwan clavëta munarqan, peru David witiriptinmi perqallaman clavëkurqan. Saulqa atska kutichömi tsënö wanutsita munarqan, tsëmi Davidqa tsunyaq sitiukunaman qeshpir ëwakurqan.

Saulqa 3.000 soldädunkunata pusharkurmi Davidta wanutsinampaq asheq ëwarqan. Juk kutim juk machëman Saul yëkurirqan, y manam cuentata qokurqantsu Davidwan soldädunkuna rurichö këkäyanqanta. Tsëmi soldädunkunaqa Davidta kënö niyarqan: “¡Juklla wanuratsi!”. Peru Davidqa shumaqlla ëwëkurmi Saulpa mangannaq röpampa kuchunta roqurapurqan. Tsëta ruranqampitam Davidqa shonqunchö mana alli sientikurqan. Tsëmi Davidqa munarqantsu soldädunkuna Saulta wanutsiyänanta. Y tsë machëpita Saul ëwakuykaptinmi Davidqa fuertipa kënö nirqan: “Wanuratseqmanmi karqan, peru manam munarqötsu”. ¿Tsëpitaqa allinatsuraq Davidta Saul tratarqan?

Manam. Saulqa kutin kutinmi wanutsita munarqan. Juk kutim, Davidwan sobrinun Abisai yachëllapa yëkuriyarqan Saul punuykanqan carpanman. Saulta cuidaq Abnerpis pasëpa punukashqam këkarqan. Tsënam Abisaiqa Davidta kënö nirqan: “Kananmi Diosnintsikqa chikishoqnikita entreguëkäshunki, lanzanwan tuksiramushaq”. Peru Davidqa kënömi nirqan: “Ama imanëtsu. Jawnan lädunchö këkaq lanzanllata y yaku puritsinan porongunllata aparkur ëwakushun”.

Davidqa juk jirkamanmi witsarqan, tsëpitam Saulwan soldädunkuna këkäyanqan sitiuman kënö qayakurqan: “¡Abner! ¿Imanirtaq cuidarqunkitsu Israelpa gobernaqninta? ¿Mëtaq lanzan y yaku puritsinan porongun?”. Saulqa David kanqanta reqirirmi kënö nirqan: “Wanuratsimankimanmi karqan, peru llakipämarqunkim. Kananqa allim musyä qamna Israelpa gobernantin kanëkipaq kaqta”. Tsënö nirirmi wayinta kutikurqan. Peru Saul chikipaptimpis wakin familiankunaqa Davidta kuyayaqmi.