Jonatanqa valienti y alli amïgum karqan

Jonatanqa gobernanti Saulpa mayor tsurinmi karqan, y allim pelyëta yachaq. Tsëmi Davidqa Jonatanpaq kënö nirqan: “Pichakpitapis mas rasmi y leonpitapis mas kallpasapam”. Juk kutim juk jirka jananchö filisteu soldädukuna këkäyarqan, tsëmi Jonatanqa yanapaqnin soldäduta kënö nirqan: “Filisteu nunakunawanqa pelyashun Jehovä yanapamänapaq kaq señalta rikarninraqmi. Tsë señalqa kanqa ‘shayämuy’ nimanqantsikmi”. Y filisteu nunakunaqa “¡pelyanapaq shayämuy!” niyarqanmi. Tsëmi witsarkur 20 filisteu soldädukunata wanutsiyarqan.

Saul wanuriptinqa, mayor kaq tsurin Jonatanmi gobernanti kanan karqan. Peru David gobernanti kananta Jehovä munanqantam Jonatanqa musyarqan, y manam chikiparqantsu. Tsëpa rantinqa alli amïgum kayarqan, y defendinakur y yanapanakur kayänampaqmi parlayarqan. Jonatanqa amïgu kayanqanta rikätsirmi vistirëkanqan mangannaq röpanta, guërrachö utilizänan röpanta, espädanta, arcunta y wachakanta Davidta qararqan.

Juk kutim Saulta mantsar David qeshpinqan sitiuman Jonatan ëwarqan y kënömi nirqan: “Ama mantsakuytsu. Qammi Israelpa gobernantin këman chanki, y tsëtaqa papänïpis musyanmi”. Y qamqa, ¿munankimantsuraq Jonatannö amïguyoq këta?

Jonatanqa amïgun Davidrëkurmi atska kuti vïdanta peligruman churarqan. Tsëmi Davidta wanutsita munanqanta musyarir, Jonatanqa papänin Saulta kënö nirqan: “Davidta wanutsirqa jatun jutsatam ruranki. Pëqa manam ima mana allitapis rurashqatsu”. Tsëmi Saulqa Jonatanwan alläpa cölerakurqan. Juk ishkë watakuna pasariptinmi Saultawan Jonatantaqa juk guërrachö wanuykatsiyarqan.

Tsënam Davidqa Jonatanpa tsurin Mefiböset-ta ashirqan. Y taririrmi kënö nirqan: “Ama mantsakuytsu. Papäniki Jonatan nimanqantam cumplishaq. Tsëmi qamtaqa llakipashqëki. Awiluyki Saulpa chakrankunatam kutitsishqëki, y noqawan juntum imëpis mikunki”. Awmi, Davidqa manam qonqëkurqantsu amïgun Jonatanta.